އައްޑޫ މަގުހެދުމުގެ މަސައްކަތް ހަވާލުކުރުމަށް އިންޑިއާގެ 3 ކުންފުންޏެއް ޝޯޓްލިސްޓް ކޮށްފި
އައްޑޫގެ ތަރައްގީގެ ބޮޑު މަޝްރޫއުގެ ފައިސާ ހަމަޖެހިގެން އައީ އިންޑިއަން އެގްޒިމް ބޭންކުން
އައްޑޫ ސިޓީ، މަގުހެދުމުގެ އަމަލީ މަސައްކަތް ހަވާލުކުރުމަށް ތިން ކުންފުންޏެއް ވަނީ ޝޯޓްލިސްޓް ކުރެވިފައި
އައްޑޫ ސިޓީ މަގުހެދުމުގެ މަޝްރޫއުގެ އަމަލީ މަސައްކަތް ހަވާލުކުރުމަށް ތިން ކުންފުންޏެއް ޝޯޓްލިސްޓް ކުރެވިފައިވާ ކަމަށް އައްޑޫ ސިޓީގެ މޭޔަރ، އަބްދުﷲ ސޯދިގު (ސޯބެ) ވިދާޅުވެއްޖެއެވެ.
މޭޔަރު ސޯބެ މިހެން ވިދާޅުވީ، ރާއްޖެޓީވީގެ "ފަލަސުރުހީ" ޕްރޮގްރާމްގައި ވާހަކަ ދައްކަވަމުންނެވެ.
އެގޮތުން އައްޑޫގެ ތަރައްގީގެ ބޮޑު މަޝްރޫއުގެ ފައިސާ ހަމަޖެހިގެން އައީ އިންޑިއަން އެގްޒިމް ބޭންކުން ކަމަށާއި ކޮވިޑްގެ ސަބަބުން މަސައްކަތުގެ އަމަލީ މަސައްކަތް ފެށުމަށް ލަސްތަކެއް ވެގެން ދިޔަ ނަމަވެސް މި މަޝްރޫއު ފެއްޓުމަށްޓަކައި ކުރަންޖެހޭ އެހެނިހެން ގިނަ މަސައްކަތްތައް މިދުވަސްކޮޅުގެ ތެރޭގައި ކުރެވިގެން ދިޔަ ކަމަށް ސޯބެ ވިދާޅުވިއެވެ.
މިފަދަ ބޮޑު މަޝްރޫއެއް ކުރިއަށް ގެންދާއިރު ވަރަށް ގިނަ މަރުހަލާތައް ވޭތުކުރަން ޖެހޭނެ ކަމަށާއި މަޝްރޫއު އެކުލަވާލުމަށްޓަކައި ކޮންސަލްޓެންޓް ހޯދުމުގެ މަސައްކަތް ކުރިއަށް ގެންގޮސްފައިވާ ކަމަށް ސޯބެ ވިދާޅުވިއެވެ. އެގޮތުން މަޝްރޫއުގެ ކޮންސަލްޓެންޓް ކުންފުނި ހޮވުމަށް އިއުލާންކޮށް، ބިޑް ކުރުމުގެ މަރުހަލާ ފުރިހަމަކޮށް އިންޑިއާގެ ކުންފުންޏެއް ކަމަށްވާ އެލްއެންޓީ މަޝްރޫއުގެ ކޮންސަލްޓެންޓް ކުންފުނީގެ ގޮތުގައި ފާއިތުވި އަހަރު ހަމަޖައްސާފައިވާ ކަމަށް ސޯބެ ވިދާޅުވިއެވެ.
ސޯބެ ވިދާޅުވީ އެލްއެންޓީ އިން އައްޑޫ ސިޓީ އަށް ގޮސް އައްޑޫ ގައި މަޝްރޫއު އާއި ގުޅޭ ގިނަ ސަރވޭތަކެއް ކުރިއަށް ގެންގޮސްފައިވާ ކަމަށެވެ. އެކުންފުނިން އައްޑޫގެ ބިން ސަރވޭ ކުރުމުގެ އިތުރުން، މަގު ހެދުމާއި ފެން ހިންދުމުގެ ނިޒާމާއި ބިން ހިއްކުމަށް ބޭނުންވާ ސަރވޭ ކުރިއަށް ގެންގޮސްފައިވާ ކަމަށް މޭޔަރ ފާހަގަކުރެއްވިއެވެ.
މިއީ ވަރަށް ގިނަ ޓެކްނިކަލް މަސައްކަތްތައްކަން ފާހަގަކުރައްވާ މިހުރިހާ ސަރވޭ އެއް ނިންމައި އެ ސަރވޭ ތަކުުގެ ރިޕޯޓް ތައްޔާރުކޮށް ބޭންކަށް ހުށައަޅައި މަޝްރޫއުގެ އަމަލީ މަސައްކަތް ކުރާނެ ފަރާތެއް ހޯދަން އިއުލާން ކުރެވި އޭގެތެރެއިން އިންޑިއާގެ ފަސް ކުންފުންޏަކުން ކުރިމަތިލައި ތިން ކުންފުންޏެއް ޝޯޓްލިސްޓް ކުރެވުނު ކަމަށްވެސް ސޯބެ ވިދާޅުވިއެވެ.
މި ތިން ކުންފުންޏަކީ ކޮން ކުންފުނިތަކެއްކަން ސޯބެ ހާމަ ނުކުރެއްވި ނަމަވެސް ކުރިއަށް އޮތް ދެތިން މަހުގެ ތެރޭގައި އެކުންފުނިތަކަށް ބިޑް ހުށައެޅުމުގެ ފުރުސަތު ދެވިގެންދާނެ ކަމަށް ވިދާޅުވިއެވެ. އަދި އޭގެ ތެރެއިން ކުންފުންޏެއް ކަނޑައަޅައި ކޮންޓްރެކްޓް ސޮއިކުރެވި މަސައްކަތް ހަވާލުކުރެވިގެންދާނެ ކަމަށް އޭނާ ވިދާޅުވިއެވެ.
ސޯބެ ވަނީ އައްޑޫގެ މަގު ހެދުމާއި ފެން ހިއްކުމުގެ މަޝްރޫއުގެ އީއައިއޭ ހެދުމުގެ މަސައްކަތް މިހާރު ފެށިފައިވާކަމަށާއި ބިން ހިއްކުމުގެ މަޝްރޫއުގެ އީއައޭގެ ހެދުމުގެ މަސައްކަތް ވެސް ވަރަށް އަވަހަށް ފެށިގެން ދާނެ ކަމަށް ވިދާޅުވެފައެވެ.
