ޒިޔާދާގެ ކުރީގެ ފިރިމީހާ މަހަށް ނުކުމެ އުޅެނި ކޮށް މަރުވެއްޖެ

ގދ. ތިނަދޫ ކަޅިރަވަ ދޯނިން މަހަށް ނުކުމެ އުޅުނު މީހަކު މަރުވެއްޖެއެވެ.

"ރާއްޖެ.އެމްވީ" އަށް މައުލޫމާތު ލިބިފައިވާ ގޮތުގައި މަހަށް ނުކުމެ އުޅެނިކޮށް މަރުވެފައި ވަނީ ގދ. ތިނަދޫ ޖަވާހިރުމާގޭ ދެކުނު އިބްރާހީމް ޝާހުއެވެ.

ގއ. ހޮސްޕިޓަލުން ވަނީ މިކަން ކަށަވަރު ކޮށްދީފައެވެ. އެ ހޮސްޕިޓަލުން ބުނީ މަހަށް ނުކުމެ އުޅުނު މީހެއް ނިޔާވެފައި އޮއްވާ އެ ހޮސްޕިޓަލަށް ގެނެވިފައިވާ ކަމަށާއި، އޭނާގެ ހަށިގަނޑުގެ ބޭރު ފުށުން އެއްވެސް އަނިޔާއެއް ލިބިފައި ނުވާ ކަމަށެވެ.

މައުލޫމާތު ލިބިފައިވާ ގޮތުން ޝާހު މަރުވީ އޭނާގެ މޭ މަތީގައި މަހަކުން ޖެހި ލިބުނު އަނިޔާގައެވެ.

ޝާހުއަކީ، ޖިންސީ އަނިޔާތަކާއި ގުޅިގެން ފަރުވާ ހޯދަމުން ދަނިކޮށް މަރުވި ޒިޔާދާ ނައީމުގެ ކުރީގެ ފިރިމީހާއެވެ.

މި މައްސަލައިގައި ޝާހުގެ މައްޗަށް ވަނީ ތިން އަހަރުގެ ހުކުމެއް އިއްވާފައެވެ. ނަމަވެސް އޭނާ މިނިވަން ވެފައިވަނީ ޝަރީއަށް ނިމެންދެން ބަންދުގައި ހުރިއިރު ތިން އަހަރަށް ވުރެ ގިނަ ދުވަސް ފާއިތުވެފައި ވުމުން އެ ދުވަސްތައް އުނި ކުރުމުން ކަމަށް ކަރެކްޝަނުން ވަނީ ބުނެފައެވެ.