އިތުރު ފަރުވާ އަށް ނަވަލްނީ ޖަރުމަނަށް ފުރުވާލުމުގައި އެހީތެރިވެ ދިނިން: ޕުޓިން
23 އޮކްޓޯބަރު 2020 | ހުކުރު 08:20ރަޝިޔާއިން ވިހަދިން ކަމަށް ދެކެވޭ ވާހަކަތައް ދޮގުކުރެއްވި
ރަޝިޔާގެ އިދިކޮޅު ލީޑަރު ނަވަލްނީ (ކ) އަދި ރައީސް ޕުޓިން (ވ)
ވިހަދިން ރަޝިޔާގެ އިދިކޮޅު ލީޑަރު އެލެކްސީ ނަވަލްނީ އިތުރު ފަރުވާއަށް ރަޝިޔާ އިން ޖަރުމަނަށް ފޮނުވާލުމުގައި އެހީތެރިކަން ފޯރުކޮށްދީފައިވާނެ ކަމަށާއި، އޭނާ އަށް އެންމެ އެކަށީގެންވާ ފަރުވާ ލިބޭތޯ ޔަގީންކުރެއްވި ކަމަށް ރަޝިޔާގެ ރައީސް ލަޑީމިޔާ ޕުޓިން ވިދާޅުވެއްޖެއެވެ.
ކޮރަޕްޝަނާ ދެކޮޅަށް އަޑު އުފުއްލަވަމުން ގެންދަވާ ނަވަލްނީގެ ސިއްހީ ހާލުކޮޅު ގޯސްވީ އޮގަސްޓު މަހުގެ 20 ވަނަ ދުވަހު ސައިބީރިޔާ އިން މޮސްކޯ އަށް ދަތުރު ކުރަމުން ދިޔަ ފްލައިޓެއްގެ ތެރެއިން ސައިފޮދެއް ހިއްޕެވި ފަހުންނެވެ. އިދިކޮޅުން ތުހުމަތުކުރާ ގޮތުގައި ނަވްލްނީ އަށް ވިހަ ދިނުމުގެ ފަހަތުގައި ވަނީ ރަޝިޔާ ސަރުކާރެވެ. އެކަމަކު ސަރުކާރުން ވަނީ އެ ވާހަކަތައް ދޮގުކޮށްފައެވެ.
ބުރާސްފަތި ދުވަހު، މޮސްކޯގެ ވަލްޑައި ޑިސްކަޝަން ކްލަބް ގައި ވާހަކަފުޅު ދައްކަވަމުން ޕުޓިން ވިދާޅުވީ، ނަވަލްނީ އަށް ގައުމުން ބޭރަށް ވަޑައިގަތުމުގެ ހުއްދަ އަށް އޭނާގެ އަނބިކަނބަލުން އެދިވަޑައިގަތުމުން އެ ހުއްދަ ދެއްވުމަށް ޕްރޮސެކިއުޓާގެ އޮފީހުގައި އެދިލެއްވި އެމަނިކުފާނު އަމިއްލަފުޅަށް ކަމަށެވެ.
''ތަހުގީގު ކުރަމުންދާ މަައްސަލަތަކާއި ގުޅިގެން އޭނާއާ މެދު ވަނީ ދަތުރުކުރުން މަނާކުރުމުގެ ފިޔަވަޅުތަކެއް އަޅާފައި''ޕުޓިން ވިދާޅުވިއެވެ.
ޕުޓިން ވިދާޅުވި ގޮތުގައި، ރަޝިޔާ ސަރުކާރުން ނަވަލްނީ އަށް ވިހަދިން ނަމަ ޖަރުމަނަށް ފުރުމުގެ ހުއްދަ ނުދެއްވީސް ކަމަށެވެ.
ޕުޓިންގެ ވާހަކަފުޅުގައި ނަވަލްނީ ގެ އަސްލު ނަމުން މުހާތަބެއް ނުކުރައްވައެވެ. ދާދި ފަހަކުން ފެށިގެން ޕުޓިންގެ ތަރުޖަމާނު ނަވަލްނީއާ މުހާތަބު ކުރައްވަމުން ގެންދަވަނީ ''ބާލިން ޕޭޝަންޓު'' ގެ ނަމުންނެވެ.
ޖަރުމަނުގައި ފަރުވާ ހޯއްދެއްވުމަށް ފަހު ނަވަލްނީގެ ހާލުކޮޅު އަންނަނީ މިހާރު ރަނގަޅުވަމުންނެވެ.
