ނޮވެމްބަރ 8 އަށް ހޯރަފުށި އެއަރޕޯޓް ތަރައްގީކޮށް ނިމޭނެ: އެމްޓީސީސީ
އެއަރޕޯޓް ރަންވޭ، ޓެކްސީވޭ އަދި އޭޕްރަން ތަރައްގީކުރުމުގެ މަޝްރޫއުގެ 95 އިންސައްތަ މަސައްކަތް މިހާރު ވަނީ ނިންމާލާފައި
ހޯރަފުށި އެއާޕޯޓް ހުޅުވުމަށް ތާވާލުކޮށްފައި ވަނިީ ނޮވެމްބަރ 11 ވަނަ ދުވަހަށް
ކުރިއަށް އޮތް ނޮވެމްބަރ މަހުގެ 8 ވަނަ ދުވަހަށް ހޯރަފުށީގައި ތަރައްގީ ކުރަމުން އަންނަ އެއަރޕޯޓްގެ މަސައްކަތް ނިންމާ ލެވޭނެ ކަމަށް މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ (އެމްޓީސީސީ) އިން ބުނެފިއެވެ.
ރާއްޖެޓީވީގެ 60 މިނެޓަށް ދެއްވި ހާއްސަ އިންޓަވިއުއެއްގައި އެމްޓީސީސީގެ މެނޭޖިން ޑިރެކްޓަރ އާދަމް އާޒިމް ވިދާޅުވީ، ހޯރަފުށި އެއަރޕޯޓްގެ މަސައްކަތްތައް ދަނީ ތާވާލާއި އެއްގޮތަށް ކަމަށާއި ކަނޑައަޅާފައިވާ ތާރީހަށް އެއަރޕޯޓްގެ ހުރިހާ މަސައްކަތްތަކެއް ނިންމާ ލެވޭނެ ކަމަށެވެ.
އެއަރޕޯޓްގެ ތަރައްގީ ކުރުމުގެ މަސައްކަތްތައް 24 ގަޑިއިރު ކުރިއަށް ގެންދާ އިރު މުވައްޒަފުންގެ މަސައްކަތްތައް ރާވާފައި ހުރި މަސައްކަތް ބުރަ ނުވާނެހެންނެވެ. އެގޮތުން، މުވައްޒަފުންނަށް ލުއި ދިނުމަށް އިތުރު މުވައްޒަފުން ވެސް ގެންނާނެ ކަމަށް ފާހަގަ ކުރައްވާ އާޒިމް ވިދާޅުވީ، ހޮނިހިރު ދުވަހު އެމްޓީސީސީގެ ސްކިލްޑް ލޭބަރުންނާއި ޓެކްނިކަލް މުވައްޒަފުން ހޯރަފުއްޓަށް ދާނެ ކަމަށެވެ.
އާޒިމް ވަނީ އެއާޕޯޓް ތަރައްގީ ކުރުމުގެ މަސައްކަތުގައި އެމްޓީސީސީގެ ދާއިމީ މުވައްޒަފުންގެ އިތުރުން ހޯރަފުށިން ނަގާފައިވާ 80 ވަރަކަށް މުވައްޒަފުން ހަރަކާތްތެރި ވަމުންދާ ކަމަށް ފާހަގަ ކުރައްވާފައެވެ.
މިނިސްޓްރީ އޮފް ޓްރާންސްޕޯޓް އެންޑް ސިވިލް އޭވިއޭޝަނުން 2019 ވަނަ އަހަރުގެ މާޗް މަހުގެ 25 ވަނަ ދުވަހު ހޯރަފުށީގައި އެއާޕޯޓެއް ތަރައްގީކުރުމުގެ މަސައްކަތް އެމްޓީސީސީ އާއި ހަވާލުކޮށްފައިވާ އިރު، އެއަރޕޯޓް ރަންވޭ، ޓެކްސީވޭ އަދި އޭޕްރަން ތަރައްގީ ކުރުމުގެ މަޝްރޫއުގެ 95 އިންސައްތަ މަސައްކަތް މިހާރު ވަނީ ނިންމާލާފައެވެ.
މީގެ އިތުރުން އެއަރޕޯޓް ޓާމިނަލް އަދި ފަޔަރ ބިލްޑިން ތަރައްގީ ކުރުމުގެ މަޝްރޫއުގެ މަސައްކަތް 2020 ވަނަ އަހަރުގެ ސެޕްޓެމްބަރ މަހުގެ 13 ވަނަ ދުވަހު އެމްޓީސީސީ އާއި ޓްރާންސްޕޯޓް މިނިސްޓްރީ އިން ހަވާލުކޮށްފައިވާ އިރު، މި މަޝްރޫގެ 35 އިންސައްތަ މަސައްކަތް މިހާރު ވަނީ ނިންމާލާފައެވެ.
ހޯރަފުށި އެއަރޕޯޓްގެ ރަންވޭ، ޓެކްސީވޭ އަދި އޭޕްރަން ތަރައްގީ ކުރުމުގެ މަޝްރޫއުގެ އަގު 198 މިލިއަނަށް އަރާ އިރު، އެއަރޕޯޓް ޓާމިނަލް އަދި ފަޔަރ ބިލްޑިން ތަރައްގީ ކުރުމަށް 13.8 މިލިއަން ރުފިޔާ ހަރަދު ވާނެ ކަމަށް އެމްޓީސީސީއިން ބުނެއެވެ. ސަރުކާރުން ވަނީ މި އެއާޕޯޓް ނޮވެމްބަރ 11 ވަނަ ދުވަހު ހުޅުވުމަށް ތާވާލު ކޮށްފައެވެ.
