ކުޅުދުއްފުށީ ބަނދަރު ބޮޑުކުރުމުގެ މަޝްރޫއުގެ ބޮޑުބައި ނިންމާލައިފި
މި މަޝްރޫއުއަކީ 129،529 މިލިއަން ރުފިޔާގެ މަޝްރޫއެއް
ކުޅުދުއްފުށި ބަނދަރު ބޮޑުކުރުމުގެ މަޝްރޫއުގެ ފޮޓޯއެއް
ހދ. ކުޅުދުއްފުށީ ވެލިގަނޑު ސަރަހައްދުގައި މޯލްޑިވްސް ޓްރާސްޕޯޓް އެންޑް ކޮންޓްރެކްޓިން ކޮމްޕެނީ (އެމްޓީސީސީ) އާ ހަވާލު ކޮށްގެން ސަރުކާރުން ހަދަމުންދާ ލޯކަލް ބަނދަރުގެ ބޮޑުބައި ނިންމައިފިއެވެ.
އެމްޓީސީސީން ބުނީ، ކުޅުދުއްފުށީ ބަނދަރު ފުޅާކޮށް ބޮޑުކުރުމުގެ މަޝްރޫއުގެ މަސައްކަތުގެ 98 ޕަސެންޓް މިހާރު ވަނީ ނިމިފައިވާ ކަމަށާއި މި މަޝްރޫއުގެ ތެރެއިން ކުރިން ފުންކޮށްފައިވާ ފަޅު އަލުން ފުން ކުރުމުގެ މަސައްކަތުގެ 30 ޕަސެންޓް ވެސް މިހާރު ނިމިފައި ކަމަށެވެ. އެ ކުންފުނިން ބުނީ، ކުޅުދުއްފުށި ބަނދަރު ބޮޑުކުރުމުގެ މި މަޝްރޫއުގެ މަސައްކަތް މި އޮކްޓޯބަރު މަހުގެ ނިޔަލަށް މުޅިން ނިންމާލެވޭނެ ކަމަށް ލަފާ ކުރެވޭ ކަމަށެވެ.
ކުޅުދުއްފުށި ބަނދަރު ބޮޑުކުރުމުގެ މި މަޝްރޫއުގެ ދަށުން، 236،844 ކިއުބިކް މީޓަރުގެ ސަރަހައްދެއްގެ ފަޅު ފުންކުރުމާއި، 24،450 ކިއުބިކް މީޓަރުގެ ސަރަހައްދެއްގެ ބިން ހިއްކުމާއި، 1،000 މީޓަރުގެ ސަރަހައްދެއްގައި އެއްގަމުތޮށި ލުމަށް ބޭނުންވާ ކޮންކްރީޓް މަސައްކަތްތައް ކުރުން ހިމެނެއެވެ. އަދި އެއްގަމުތޮށި ހިމެނޭ ސަރަހައްދުގެ ބިންގަނޑު އެއްވަރު ކުރުމާއި، އެ ސަރަހައްދުގައި ގައު އެތުރުމާއި، ކާނުގެ މަތިގަނޑު އެޅުން ހިމެނެއެވެ.
މީގެ އިތުރުން ކުޅުދުއްފުށީ ބަނދަރުގައި ފެރީ ޓާމިނަލެއް އިމާރާތް ކުރުމަށާއި، ފެރީ އޮޕަރޭޓްކުރާ ފަރާތްތަކަށް ޓިކެޓް ކައުންޓަރުތައް ހެދުމާއި، އޮފީސްތަކާއި ރީޓެއިލް ފިހާރަތަކާއި ނަމާދުކުރާ ތަނެއް އަދި ކޮންވީނިއަންސް ސްޓޯރު ކެފޭ އާއި މައިންނަށް ހާއްސަ ސަރަހައްދެއް ތަރައްޤީ ކުރުން ވެސް މި މަޝްރޫޢުގައި ހިމެނެއެވެ.
މި މަޝްރޫއުއަކީ 129،529 މިލިއަން ރުފިޔާގެ މަޝްރޫއެކެވެ. މިނިސްޓްރީ އޮފް ނޭޝަނަލް ޕްލޭނިންގ ހައުސިންގ އެންޑް އިންފްރާސްޓްރަކްޗަރގެ ފަރާތުން އެމްޓީސީސީއާ މި މަޝްރޫއު ހިންގަން ހަވާލުކޮށްފައިވަނީ 26 ޑިސެމްބަރ 2018 ގައެވެ.
