ކުއްލި ހާލަތުގައި ހއ. އުލިގަމަށް ބަނދަރުކުރި ބޭރުގެ ޓަގު ބޯޓް އަދިވެސް ނުފުރާ އެބައޮތް ކަމަށް އެމްއެންޑީއެފުން ބުނެފި އެވެ.

އެމްއެންޑީއެފްގެ މީޑިއާ އޮފިޝަލް "ރާއްޖެއެމްވީ"އަށް ވިދާޅުވީ އެ ޓަގު ބޯޓު އަދިވެސް ނުފުރާ މަޑުކޮށްލައިގެން އޮތީ މޫސުމް އަދިވެސް ހަމައަކަށް ނޭޅޭތީ ކަމަށެވެ. އޮފިޝަލް ވިދާޅުވީ އެ ޓަގު ބޯޓު ދަތުރު ކުރަމުންދާ ރޫޓްގެ މޫސުމް އަދިވެސް އެހާރަނގަޅު ނޫންކަމަށެވެ. މި އުޅަނދު ދަތުރު ކުރަމުން ދިޔައީ އަށް ޑިގްރީ ޗެނަލް ބޭރުގައެވެ. އަދި މި އުޅުނަދުކީ ޑޮމިނިކަން ރިޕަބްލިކަންގައި ރަޖިސްޓްރީކޮށް އިންޑިއާގެ ކުންފުންޏަކުން އޮޕްރޭޓް ކުރަމުންދާ އުޅަނދެއް ކަމަށް ވެސް އެމްއެންޑީއެފްގެ އޮފިޝަލް ވިދާޅުވެފައިވެއެވެ.

 "ގޯލްޑަން ޕްރައިޑް" ނަމަކަށް ކިޔާ ޓަގު ބޯޓް އުލިގަމު އިރުމަތީފަރާތުގައި ބަނދަރު ކުރީ  ހުކުރު ދުވަހު ހަވީރު 3:00 އެއްހާއިރު އެވެ.

ފަންސަވީސް މީހުން ދަތުރުކުރި މި ޓަގު ބޯޓް އުލިގަމުގައި ބަނދަރު ކުރީ ކުއްލި ހާލަތުގައި އެހީއަށް އެދިގެން ކަމާއި އަދި އުލިގަމުގައި ބަނދަރު ކުރީ ސަރުކާރުގެ ކަމާބެހޭ ފަރާތްތަކުގެ ހުއްދަ ލިބިގެން ކަމަށް އެމްއެންޑީއެފްގެ އޮފިޝަލް ވިދާޅުވެފައިވެއެވެ.

ރާއްޖޭގެ މޫސުމާބެހޭ ގައުމީ އިދާރާ، މޯލްޑިވްސް މީޓިއޮލޮޖިކަލް ސާރވިސް (މެޓް އޮފީސް) އިން އާދިއްތަ ދުވަހު ބުނީ ރާއްޖޭގެ މޫސުމް ގޯސްވެ ކުރަމުންދިޔަ ވިއްސާރައަށްފަހު މޫސުން ރަނގަޅު ވަމުން އަންނަ ކަމަށެވެ.  ވައިގެ ބާރުމިން އާއްމު ގޮތެއްގައި ހުރީ ގަޑިއަކު 05 މޭލާއި 15 މޭލުގެ ބާރު މިނުގަ ކަމަށްވެސް މެޓް އޮފީހުން ބުނެއެވެ.