ހއ. މާރަންދޫ ކަމަނާ ކަޕް 2020 ގެ ކުޅުން ފަށައިފިއެވެ.

މާރަންދޫގެ އަންހެނުންނަށް ހުޅުވާލައިގެން ބާއްވާ ހޭންޑްބޯޅަ މުބާރާތުގެ ކުޅުން ބުދަ ދުވަހުގެ ހަވީރު ފެށިއިރު، މި މުބާރާތުގައި ޖުމްލަ ހަތަރު ޓީމެއް ވަނީ ބައިވެރިވެފައެވެ. މި މުބާރާތުގައި ބައިވެރިވެފައިވާ ޓީމުތަކަކީ މާރަންދޫ ޔޫތު ސޮސައިޓީ، އަންހެނުންގެ ކޮމިިޓީ، ބަނޑޭރި ސްޓާ ސްޕޯޓްސް ކުލަބު އަދި ޗެޕޭ ސްޕޯޓްސް އެކެޑަމީއެވެ.

މުބާރާތުގެ ފުރަތަމަ މެޗުގައި ޗެޕޭ ސްޕޯޓްސް އެކެޑަމީ އާއި އަންހެނުންގެ ކޮމިޓީ ބައްދަލުކުރިއިރު، މި މެޗު 7-3 ގެ ނަތީޖާއަކުން ކާމިޔާބުކޮށްފައިވަނީ ޗެޕޭ ސްޕޯޓްސް އެކެޑަމީންނެވެ. މި މެޗުގެ މޮޅު ކުޅުންތެރިއަކަށް ހޮވިފައިވަނީ ޗެޕޭ ސްޕޯޓްސް އެކެޑަމީގެ އާތިކާ ދާއޫދެވެ.

މުބާރާތުގެ ދެވަނަ މެޗުގައި މާރަންދޫ ޔޫތު ސޮސައިޓީ އާއި ބަނޑޭރި ސްޓާ ސްޕޯޓްސް ކުލަބު ބައްދަލުކުރިއިރު، މި މެޗު މާރަންދޫ ޔޫތު ސޮސައިޓީން ކާމިޔާބުކޮށްފައިވަނީ 9-4 ގެ ނަތީޖާއަކުންނެވެ. މި މެޗުގެ މޮޅު ކުޅުންތެރިއަކީ މާރަންދޫ ޔޫތު ސޮސައިޓީގެ ޝިމާނާ އަބްދުﷲ އެވެ.

މި މުބާރާތް އިންތިޒާމުކުރުމުގައި އިސްކޮށް އުޅުއްވާ އަބްދުލް ކަރީމް އަބްދުއްރަޙުމާން ވިދާޅުވީ މި މުބާރާތަކީ މާރަންދޫ ކައުންސިލާއި، އެ ރަށުގެ އިޖުތިމާޢީ މަރުކަޒު ގުޅިގެން ރަށުގެ އަންހެނުން ކުޅިވަރަށް އަހުލުވެރިކޮށް، ކުޅިވަރުގެ މައިދާނުގައި ކުރިއަށްދިޔުމަށް ހުޅުވާލެވިގެން ކުރިއަށްގެންދާ މުބާރާތެއް ކަމަށެވެ.

މުބާރާތުގެ ކުޅުން ބުދަ ދުވަހުގެ ހަވީރު ފެށިއިރު، މި މުބާރާތުގެ ފައިނަލް މެޗު ތާވަލުކޮށްފައިވަނީ މި މަހުގެ 28 ވަނަ ދުވަހަށެވެ.