ތިނަދޫ ކޮވިޑް ފެސިލިޓީގެ މަސައްކަތް ނިންމާލައިފި
ޕްލޭނިން މިނިސްޓްރީއާ މިހާރު ވަނީ ހަވާލުކޮށްފައި
ގދ. ތިނަދޫގައި ގާއިމްކުރި ކޮވިޑް ފެސިލިޓީ
ގދ. ތިނަދޫގައި ގާއިމްކުރާ ކޮވިޑް ފެސިލިޓީގެ މަސައްކަތް ނިންމާލައިފިއެވެ.
މި ފެސިލިޓީގެ މަސައްކަތް ކުރި މޯލްޑިވްސް ޓްރާންސްޕޯޓު އެންޑް ކޮންޓްރެކްޓިންގް ކޮމްޕެނީ (އެމްޓީސީސީ) އިން ބުނީ ތިނަދޫގައި އިމާރާތް ކުރި އެމަރޖެންސީ ކޮވިޑް ފެސިލިޓީގެ މަސައްކަތް ނިންމާފައިވާ ކަމަށެވެ. އަދި ޕްލޭނިން މިނިސްޓްރީއަށް ހަވާލު ކޮށްފައިވާ ކަމަށް އެ ކުންފުނިން ބުނެއެވެ.
އެމްޓީސީސީން ބުނީ މި މަސައްކަތް ނިންމާލާފައިވަނީ އެންމެ 20 ދުވަހުން ކަމަށެވެ.
ތިނަދޫގައި 22 އެނދުގެ ކޮވިޑް ފެސިލިޓީއެއް ގާއިމު ކުރުމުގެ މަސައްކަތް ފެށީ 25 ސެޕްޓެމްބަރުގައެވެ. އަދި އެ ފެސިލިޓީގައި އިންޓެންސިވް ކެއާ ޔުނިޓެއް ގާއިމްކޮށްފައި ވެއެވެ.
ތިނަދޫގައި ކޮވިޑް ފެސިލިޓީއެއް ގާއިމް ކުރުމަށް ނިންމީ އެ ރަށުން ކޮވިޑް-19 އަށް ޕޮޒިޓިވްވި މީހަކު، ގއ. ވިލިނގިލީގައި ހުންނަ ކޮވިޑް ފެސިލިޓީއަށް ފަރުވާ ހޯދުމަށް ގެންދިޔުމުން ރަށަށް ނޭރުވުމުންނެވެ. އެ ރަށުގެ ބަޔަކު ދެކޮޅު ހެދުމާ ގުޅިގެން އެންމެ ފަހުން އެ މީހާއަށް ފަރުވާ ދިނުމަށް އެއަރޓެކްސީއެއްގައި ގެނައީ މާލެއަށެވެ.
މި ހާދިސާއާ ގުޅިގެން ގިނަ ބައެއްގެ ފާޑުކިޔުން ވެސް ވިލިނގިލީގެ ރައްޔިތުންނަށް ކުރިމަތިވެގެން ދިޔައެވެ. އަދި މިހާރު ވިލިނގިލި ކޮވިޑް ފެސިލިޓީގައި ދަނީ ބައެއް މީހުންނަށް ފަރުވާ ދެމުންނެވެ.
ކޮވިޑް- 19 ގުޅިގެން އަތޮޅުތެރޭގެ 5 ސަރަހައްދެއްގައި މެޑިކަލް ފެސިލިޓީސް ސަރުކާރުން ގާއިމް ކުރިއެވެ. އެގޮތުން ގދ. ޒޯނުގެ ކޮވިޑް މެނޭޖްމަންޓް ފެސިލިޓީ ގާއިމް ކުރެވިފައި ވަނީ ވިލިނގިލީގައެވެ. ވިލިނގިލީ ކޮވިޑް ފެސިލިޓީގައި 23 އައިސީޔޫ އެނދާއި ވެންޓިލޭޓަރުގައި ފަރުވާ ދެވޭނެ އިންތިޒާމު ވަނީ ހަމަޖައްސާފައެވެ.
