ތަހުޤީޤެއް ކުރިއަށް ދާތީ ވަޒީފާ ނުލިބޭ މައްސަލައަށް އޭސީސީއާއި ޕީޖީ: އެއީ ބޭއިންސާފެއް!
މިހާރުވެސް 4554 މީހުންގެ މައްޗަށް ތުހުމަތު ކުރެވޭ މައްސަލަތައް ކޯޓުގައި ކުރިއަށްދޭ
ބުދަ ދުވަހު އޮތް މިނިވަން މުއައްސަސާތަކާބެހޭ ކޮމިޓީގައި ޕީޖީ ޝަމީމްއާއި އޭސީސީގެ ރައީސާ މަރިޔަމް ޝިއުނާ ބައިވެރިވެވަޑައިގެންނެވި
އެންޓި ކޮރަޕްޝަން ކޮމިޝަން (އޭސީސީ) ގައި ތަޙުޤީޤު ކުރަމުންދާ މައްސަލަތަކުގައި ތުހުމަތު ކުރެވޭ މީހުންނަށް ވަޒީފާ ލިބުން ދަތިވުމަކީ ކުރިމަތިވާ ބޭއިންސާފެއް ކަމަށް އޭސީސީއާއި ޕްރޮސެކިއުޓަރ ޖެނެރަލް (ޕީޖީ) އޮފީހުން ބުނެފިއެވެ.
އެ މައްސަލަ މަޖިލީހުގެ ސަމާލު ކަމަށް އައިސްފައިވާ އިރު، ބުދަ ދުވަހު އޮތް މިނިވަން މުއައްސަސާތަކާބެހޭ ކޮމިޓީގައި މެމްބަރުން ވަނީ އެއީ އެންމެ އިންސާފުވެރި ގޮތެއްތޯ ސުވާލު އުފައްދަވާފައެވެ. އެގޮތުން ކޮމިޓީގެ މުޤައްރިރު އަދި އައްޑޫ މީދޫ ދާއިރާގެ މެމްބަރު ރޮޒެއިނާ އާދަމް ވިދާޅުވީ، އޭސީސީއަކީ ކޮންމެ މީހެއްގެ މައްޗަށް ވެސް ތުހުމަތެއް ކޮށް، މައްސަލަ ހުށައެޅޭ އިދާރާއަކަށްވާ އިރު، އެ މައްސަލަތަކުގައި ގޮތެއް ނިންމުން ލަސް ވެގެން ދިއުމުގެ ސަބަބުން ވަޒީފާ ލިބުމަށް ދަތިވާ މައްސަލައަށް ޙައްލެއް އަންނަން ޖެހޭ ކަމަށެވެ.
އެކަމާ ގުޅޭގޮތުން އޭސީސީގެ ރައީސް މަރިޔަމް ޝިއުނާ ވިދާޅުވީ، ކުށުގެ ރެކޯޑު ސާފު ކުރާ އިރު އެ މީހެއްގެ މައްޗަށް މައްސަލައެއް ތަޙުޤީޤު ކުރެވެމުންދާ ކަން ނުވަތަ ނޫން ކަން މުއައްސަސާއަކުން ސާފުކުރަން ބޭނުންވާ ނަމަ ކޮމިޝަނުން އެ މައުލޫމާތު ދެއްވާ ކަމަށެވެ. އަދި އެކަމުގެ ސަބަބުން ވަޒީފާ ނުލިބުމަކީ ވަރަށް ބޮޑު ބޭއިންސާފެއް ކަމަށް ޝިއުނާ ވިދާޅުވިއެވެ.
އެކަމާ ގުޅިގެން ޕީޖީ ހުސައިން ޝަމީމް ވިދާޅުވީ، މީހެއްގެ މައްޗަށް ތުހުމަތެއް ކުރެވުމުން ވަޒީފާ ނުލިބުމަކީ ވަރަށް ބޮޑު ބޭއިންސާފެއް ކަމަށާއި، އެކަމަށް ދާއިމީ ޙައްލެއް ގެނައުމަށް ޤާނޫނަށް ބައެއް ބަދަލުތަކެއް ގެނެވިދާނެ ކަމަށެވެ. އެގޮތުން ރާއްޖޭގައި މިހާރުވެސް 4554 މީހުންގެ މައްޗަށް ތުހުމަތު ކުރެވޭ މައްސަލަތައް ކޯޓުގައި ކުރިއަށްދާ ކަމަށާއި، އޭސީސީން ވެސް 800 އެއްހާ މައްސަލަ ތަހުޤީޤު ކުރަމުންދާ އިރު، އެ މައްސަލަތަކާ ގުޅިގެން ވަޒީފާއެއް ނުލިބި ލަސްވެގެން ދިއުމަކީ އެންމެ އިންސާފުވެރި ގޮތެއް ނޫން ކަމަށް ޕީޖީ ވިދާޅުވިއެވެ.
ޕީޖީ އެހެން ވިދާޅުވެފައިވާ އިރު، މަސްތުވާތަކެތީގެ ފަރުވާއަށް އެދިގެން ފަރުވާއަށް ހުކުމް ކޮށްފައިވީ ނަމަވެސް ޖާގަ ނެތުމުގެ ސަބަބުން ފަރުވާއަށް ނުދެވިފައި އެތައް ބަޔަކު ތިބިކަން ނޭޝަނަލް ޑްރަގް އޭޖެންސީ (އެންޑީއޭ) ގެ ތަފާސްހިސާބުތަކުން ވެސް ދައްކައެވެ.
ރާއްޖޭގައި އިތުރު ރިހެބިލިޓޭޝަން ސެންޓަރުތަކެއް ގާއިމް ކޮށް، އެ ތަންތަނުން ފަރުވާގެ ފެންވަރު ރަނގަޅު ކުރުމަކީ މި ސަރުކާރުގެ ސްޓްރެޓިޖިކް އެކްޝަން ޕްލޭންގައި ވެސް ހިމަނާފައިވާ ކަންކަމެވެ.
