ހެލްތު މިނިސްޓަރ ކަމުގެ މަގާމުގައި ހުންނެވި އަބްދުﷲ އަމީން އެ މަގާމުން އިސްތިއުފާ ދެއްވީ ރައްޔިތުންގެ މަޖިލީހަށް ހުށަހަޅާފައިވާ އަމީންގެ އިތުބާރު ނެތް ކަމުގެ މައްސަލައިގައި ޖަވާބުދާރީ ވުމަށް ނޯޓިސް ފޮނުވާފައި ވަނިކޮށް ކަމަށް ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދު ވިިދާޅުވެއްޖެއެވެ.

ހެލްތު މިނިސްޓަރ ކަމުގެ މަގާމުން އަމީން އިސްތިއުފާ ދެއްވާފައި ވަނީ އަންގާރަ ދުވަހުގެ ރޭ މެންދަމުގެ ވަގުތެއްގައެވެ. އަމީންގެ އިތުބާރު ނެތް ކަމުގެ މައްސަލަ 24 މެމްބަރުންގެ ސޮޔާއެކު މަޖިލީހަށް ހުށަހަޅާފައި ވަނީ އަންގާރަ ދުވަހުގެ ހަވީރުއެވެ.

މިކަމާއި ގުޅޭ ގޮތުން ބުދަ ދުވަހުގެ ޖަލްސާގައި ވާހަކަ ދައްކަވަމުން ރައީސް ނަޝީދު ވިދާޅުވީ އިތުބާރު ނެތްކަމުގެ މައްސަލަ ހުށަހެޅުމުން ޤާނޫނު އަސާސީގެ 101 ވަނަ މާއްދާގެ ށ އަދި މަޖިލީހުގެ ގަވާއިދުގެ 207 ވަނަ މާއްދާގެ ށ ގެ ދަށުން އެ މައްސަލަ އާއި މެދު މަޖިލީހުގައި ބަހުސް ފެށުމުގެ 14 ދުވަސް ކުރިން ދޭން ޖެހޭ ނޯޓިސް ވަނީ އަންގާރަ ދުވަހުގެ ރޭގެ އިޝާ ނަމާދަށް ފަހުގައި، މާ ގިނަ އިރެއް ނުވެ އެ ނޯޓިސް މިނިސްޓަރަށް ފޮނުއްވާފައި ކަމަށެވެ.

އަމީންގެ އިތުބާރު ނެތް ކަމުގެ މައްސަލަ މަޖިލީހަށް ވައްދަން އަންގާރަ ދުވަހު އެމްޑީޕީގެ ޕީޖީގައި ވަނީ ބައްދަލުވުމެއް ބާއްވާފައެވެ. 58 މެމްބަރުން ބައިވެރިވެ ވަޑައިގެންނެވި ބައްދަލުވުމުން އަމީންގެ އިތުބާރު ނެތް ކަމުގެ މައްސަލަ މަޖިލީހަށް ވައްދަން ފާހެއް ނުވިއެވެ. 30 މެމްބަރަކު ވަނީ އެ މައްސަލަ މަޖިލީހަށް ވައްދަން ނުފެންނަކަމަށް ވޯޓު ދެއްވާފައެވެ. އެއާއެކު އެމްޑީޕީގެ މެމްބަރުން ފަހުން ވަނީ 24 މެމްބަރުންގެ ސޮޔާއެކު އަމީންގެ އިތުބާރު ނެތްކަމުގެ މައްސަލަ މަޖިލީހަށް ހުށަހަޅާފައެވެ.

އަންގާރަ ދުވަހުގެ ރޭގެ މެންދަމުގެ ވަގުތެއްގައި އަމީން އިސްތިއުފާ ދެއްވިކަން ހާމަކުރެއްވި އިރު އިސްތިއުފާ ދެއްވަމުން ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހަށް ފޮނުއްވި ސިޓީގައި ވަނީ "މަޤާމުން ދުރުކުރުމަށް، ވާންކުރާކުރުމަކީ، ކޮންމެހެން އެ މަނިކުފާނަށް އަމާޒުވާ އެތި ފަހަރެއް" ކަމަކަށް ދެކި ވަޑައިނުގަންނަވާ ކަމަށާއި، އިސްތިއުފާ ދެއްވީ އެއީ މި ހާލަތުގައި އެންމެ މަސްލަހަތު ރަނގަޅު ގޮތް ކަމުގައި ދެކޭތީ ކަމަށް އަމީން ވިދާޅުވިއެވެ.