އިންކަމް ސަޕޯޓް އެލަވަންސްގެ ގޮތުގައި 106 މިލިއަން ރުފިޔާ ދޫކޮށްފި
20 އޮކްޓޯބަރު 2020 | އަންގާރަ 04:24މި މަހުގެ 15 ވަނަ ދުވަހުގެ ނިޔަލަށް 9989 މީހަކު ވަނީ އެލަވަންސަށް އެދިފައި
އިންކަމް ސަޕޯޓް އެލަވަންސް ސަރުކާރުން ދޫކުރަނީ އާމްދަނީއަށް ނުރަނގަޅު އަސަރުކޮށްފައިވާ ފަރުދުންނަށް
ކޮވިޑް-19 އާއި ގުޅިގެން އާމްދަނީއަށް އަސަރު ކޮށްފައިވާ ފަރާތްތަކަށް އިންކަމް ސަޕޯޓް އެލަވަންސްގެ ގޮތުގައި 106 މިލިއަން ރުފިޔާ ދޫކޮށްފައިވާ ކަމަށް ފިނޭންސް މިނިސްޓްރީއިން ހާމަކޮށްފިއެވެ.
އިންކަމް ސަޕޯޓް އެލަވަންސަކީ ކޮވިޑް-19ގެ ސަބަބުން އާމްދަނީއަށް ނޭދެވޭ އަސަރުކޮށްފައިވާ މުވައްޒަފުންނަށް ރައްކާތެރިކަން ފޯރުކޮށްދީ، ކުރިމަތިވެފައިވާ ދަތިތަކަށް ލުއެއް ހޯދާދިނުމުގެ ގޮތުން ދެމުން އަންނަ އެލަވެންސެކެވެ. މި އެލަވަންސް މި އަހަރުގެ ނިޔަލަށް ޝަރުތު ހަމަވާ ވަކިވަކި ފަރުދުންނަށް ދިނުމަށް ވަނީ ނިންމާފައެވެ. މިގޮތުން ކޮވިޑް-19 އާ ގުޅުންހުރި ސަބަބަކާ ގުޅިގެން ދިވެހިންގެ ތެރެއިން އެލަވަންސް ދެނީ މިވަގުތު ވަޒީފާއެއް ނެތް ނުވަތަ ނޯ ޕޭ ލީވްގައި ހުރި މުވައްޒަފުންނާއި މުސާރައިން ބައެއް އުނިކޮށްފައިވާ އަދި އާމްދަނީ ހޯދުމަށް ދަތިވެފައިވާ މުވައްޒަފުންނަށެވެ.
ބަލިމަޑުކަމުގެ ސަބަބުން އާމްދަނީއަށް އަސަރުކޮށްފައިވާ ފަރާތްތަކަށް އެހީތެރިވުމުގެ ގޮތުން ސަރުކާރުން ދޫކުރަމުން އަންނަ މި އެލަވަންސް މި މަހުގެ 15 ވަނަ ދުވަހުގެ ނިޔަލަށް 9989 މީހުން އެދިފައިވާ ކަމަށް ފިނޭންސް މިނިސްޓްރީގެ ތަފާސް ހިސާބުތައް ދައްކައެވެ. އަދި އެކިފަހަރު މަތިން 25،030 ފަރާތަކަށް އެލަވަންސް ދީފައިވެއެވެ.
ކޯވިޑް-19 ގެ ޙާލަތާއި ގުޅިގެން ޢާމްދަނީއަށް ނުރަނގަޅު އަސަރު ކޮށްފައިވާ ފަރާތްތަކަށް އިންކަމް ސަޕޯޓް އެލަވަންސްގެ ގޮތުގައި، މަހަކު 5000 ރުފިޔާ ދިނުމަށް ސަރުކާރުން ނިންމާފައިވަނީ މެއި މަހުގެ 20 ވަނަ ދުވަހުއެވެ.
ވަޒީފާއަށް އަސަރު ކޮށްފައިވާ މީހުންނަށް އެލަވަންސް ދިނުމުގެ ޝަރުޠުތަކުގެ ތެރޭގައި، ދިވެހި ރައްޔިތަކަށް ވުމާއެކު، ދިވެހިރާއްޖޭގައި ދިރިއުޅޭ މީހެއްކަމުގައި ވާންޖެހެއެވެ. އިންކަމް ސަޕޯޓަށް އެދި ހުށައަޅާ މީހަކީ ޢުމުރުން 18 އަހަރާއި، 65 އަހަރާއި ދެމެދުގެ މީހަކަށް ވާންޖެހެއެވެ.
ކޮވިޑް-19 އާއި ގުޅިގެން އެކު ފަރާތްތަކަށް 5،000 ރުފިޔާއާ ހަމަޔަށް މާލީ އެހީތެރިކަން ފޯރުކޮށްދެވިގެން ދާނެއެވެ. މިގޮތުން މި އެލަވަންސަށް ކުރިމަތިލައްވާ ފަތާތްތަކުން 01 ޑިސެމްބަރ 2019 އާ ހަމަޔަށް ވަޒީފާއެއްގައި މަސައްކަތްކޮށްފައިވާ މީހެއްކަމުގައި ޝަރުތުހަމަވާންނާނެއެވެ.
