ހޮނިހިރު 24 އޮކްޓޯބަރ 2020
07 ހެއި
1442 ރަބީއުލް އައްވަލް 07
ފަތިސް 04:36
އިރުއަރާ 05:49
މެންދުރު 11:54
އަސްރު 15:11
އިރުއޮއްސޭ 17:52
އިޝާ 19:05
ބްރިޓިޝް އެއަރވޭސްގެ ދަތުރުތައް ފެށުން

ބްރިޓިޝް އެއަރވޭސްގެ ދަތުރުތައް އަލުން ރާއްޖެއަށް ފަށައިފި

  • ހަފްތާގެ 3 ދުވަހު އެ އެއަރލައިންގެ ދަތުރުތައް ރާއްޖެއަށް ބާއްވާނެ
  • ރާއްޖެއަށް ދަތުރުކުރާ އެއާލައިންތަކުގެ އަދަދުތައް އަންނަނީ އިތުރުވަމުން
  • ދިވެހިރާއްޖެއަކީ އިނގިރޭސި ފަތުރުވެރިންގެ މެދުގައި ވަރަށް މަގުބޫލު މަންޒިލެއް

ކ. މާލެ | 17 އޮކްޓޯބަރ 2020 | ހޮނިހިރު 21:13 | 3,058

ބްރިޓިޝް އެއަރވޭސްގެ ދަތުރުތައް މެދުކަނޑާލީ ކޮވިޑް-19 ގެ ބަލިމަޑު ކަމާއި ގުޅިގެން - ވެލާނާ އެއާޕޯޓް

ކޮވިޑް-19 ގެ ބަލިމަޑު ކަމާއި ގުޅިގެން ދަތުރުތައް މެދުކަނޑާލުމަށްފަހު ބްރިޓިޝް އެއަރވޭސްގެ ދަތުރުތައް ހޮނިހިރު ދުވަހު އަލުން ރާއްޖެއަށް ފަށައިފިއެވެ.

ބްރިޓިޝް އެއަރވޭސްގެ ދަތުރުތައް ރާއްޖެއަށް ކުރަނީ ލަންޑަންގެ ހީތްރޯ އެއަރޕޯޓުން ވެލާނާ އިންޓަނޭޝަނަލް އެއަރޕޯޓަށެވެ. ހަފްތާގެ 3 ދުވަހު އެ އެއަރލައިންގެ ދަތުރުތައް ރާއްޖެއަށް ބާއްވަން ވަނީ ހަމަޖެހިފައެވެ.

ބްރިޓިޝް އެއާރވޭސް ލަންޑަންއިން ރާއްޖެއަށް ދަތުރުތައް ކުރާނީ އާދިއްތަ، ބުދަ، އަދި ހުކުރު ދުވަހުއެވެ. ރާއްޖެއިން ލަންޑަންއަށް ދަތުރުކުރުމަށް ހަމަޖެހިފައިވަނީ ހޯމަ، ބުރާސްފަތި އަދި ހޮނިހިރު ދުވަހުއެވެ.

މިކަމާ ބެހޭގޮތުން ހޮނިހިރު ދުވަހު ޓްވީޓް ކުރައްވަމުން މިނިސްޓަރ އޮފް ޓުއަރިޒަމް އަބްދުﷲ މައުސޫމް ވަނީ ބްރިޓިޝް އެއަރވޭސްއަށް ޝުކުރު އަދާކޮށްފައެވެ. އަދި އިނގިރޭސިވިލާތުން ރާއްޖެއަށް ކަނޑައަޅުއްވާފައި ހުންނަވާ ސަފީރު ކެރޯން ރޮސްލާ މިކަމުގައި ދެއްވި އެހީތެރިކަމަށް ވެސް ޑރ. މައުސޫމް ވަނީ ޝުކުރު އަދާކުރައްވާފައެވެ.

ބްރިޓިޝް އެއަރވޭސްއަކީ ރާއްޖެއަށް ގިނަ އަދަދެއްގެ ފަތުރުވެރިން އަންނަ އެއަރލައިނެކެވެ. އަދި ދިވެހިރާއްޖެއަށް އެންމެ ގިނައިން ފަތުރުވެރިން އަންނަ ގައުމުތަކުގެ އިނގިރޭސިވިލާތް ހިމެނޭއިރު، ރާއްޖެއަކީ އިނގިރޭސި ފަތުރުވެރިންގެ މެދުގައި ވަރަށް މަގުބޫލު މަންޒިލެއް ކަމަށް އެ ގައުމުގައި މި ފަހުން ނެގި ބައެއް ޕޯލްތަކުން ވެސް ވަނީ ހާމަވެފައެވެ.

ކޮވިޑް-19 އާ ގުޅިގެން ތިން މަހަށް ވުރެ ގިނަ ދުވަހަށް ފަހު ރާއްޖޭގެ ބޯޑަރުތައް ބަންދުކުރުމަށްފަހު ޖުލައި މަހުގެ 15 ވަނަ ދުވަހު ރާއްޖޭގެ ބޯޑަރު ހުޅުވާލިފަހުން، އެއާލައިންތަކުން ރާއްޖެއަށް ބާއްވަމުން އަންނަ ދަތުރުތަކުގެ އަދަދުތައް އަންނަނީ އިތުރު ކުރަމުންނެވެ. އަދި ދުނިޔޭގެ ނަން މަޝްހޫރު ގިނަ އެއާލައިންތަކުގެ ދަތުރުތައް ރާއްޖެއަށް ފަށާފައިވާއިރު އިތުރު އެއާލައިންތަކުގެ ދަތުރުތައް މި މަހުގައި ފެށުމަށް ނިންމާފައިވެއެވެ.

އެންމެ ފަހުން އަޕްޑޭޓް ކުރީ: 7 ދުވަަސް ކުރިން | ރިވިއު ކުރީ: އަމަން ހަލީމް

މި ލިޔުން ކިޔާލުމުން

ޚަބަރެއް ނުވަތަ މައުލޫމާތެއް ރާއްޖެއެމްވީ އަށް ދެއްވުމަށް [email protected] އަށް އީމެއިލް ކުރައްވާ ނުވަތަ 3007773 ނަންބަރަށް ގުޅުއްވާ.