ސުޕްރީމް ކޯޓުން ފުރަތަމަ ފަހަރަށް އޮންލައިން ފޯރަމެއް ބާއްވައިފި
މި ފޯރަމް ކުރިއަށް ގެންދިޔައީ ވަކާލާތު ކުރުމުގެ ހުއްދަ ލިބިފައިވާ ޤާނޫނީ ވަކީލުންނަށް އަމާޒު ކޮށްގެން
އޮންލައިން ފޯރަމްގެ ތެރެއިން
ސުޕްރީމް ކޯޓުގައި ވަކާލާތު ކުރުމުގެ ހުއްދަ ލިބިފައިވާ ޤާނޫނީ ވަކީލުންނަށް އަމާޒު ކޮށްގެން އޮންލައިން ފޯރަމެއް ބާއްވައިފިއެވެ.
މި ފޯރަމް އަކީ، 2020 އޮކްޓޫބަރު 10 ވަނަ ދުވަހުގައި ޢަމަލު ކުރަން ފެށުނު ސުޕްރީމް ކޯޓުގެ ގަވާއިދު (2020) އާއި ގުޅޭ މަޢުލޫމާތު ޙިއްޞާކޮށް ވަކީލުންގެ ފަރާތުން ފާހަގަ ކުރައްވަން ބޭނުންފުޅުވާ ކަންކަން ޙިއްޞާ ކުރުމުގެ މަޤުޞަދުގައި ބޭއްވުނު ފޯރަމެއް ކަމަށް ސުޕްރީމް ކޯޓުން ބުންޏެވެ.
އޮކްޓޯބަރ މަހުގެ 15 ވަނަ ދުވަހުގެ ހަވީރު 4:00 ގައި ފެށުނު މި ފޯރަމްގައި، ސުޕްރީމް ކޯޓުގެ ގަވާއިދު (2020) ދަށުން އަލަށް ތަޢާރަފު ކުރެވުނު ކަންތައްތަކާއި، ސުޕްރީމް ކޯޓުގައި ޢަމަލުކުރެވެމުންދާ އިޖުރާއަތުތަކަށް މި ގަވާއިދުގެ ދަށުން އައިސްފައިވާ ބަދަލުތައް ޙިއްޞާ ކުރެވުނު ކަމަށް ވެސް އެ ކޯޓުން ވަނީ ބުނެފައެވެ.
އަދި މި ގަވާއިދާ ގުޅިގެން ވަކީލުންގެ ފަރާތުން ފާހަގަ ކުރައްވަން ބޭނުންފުޅުވާ ކަންކަން ޙިއްޞާ ކުރައްވާފައިވާއިރު މިއީ، ސުޕްރީމް ކޯޓުން އޮންލައިންކޮށް ކުރިއަށް ގެންދެވުނު ފުރަތަމަ ފޯރަމެވެ.
ސުޕްރީމް ކޯޓުން އަލަށް ފޯރަމެއް ބާއްވާފައިވާއިރު ޒަމާނީ ބޮޑެތި، ގިނަ ބަދަލުތަކެއް ގެނައުމަށްފަހު ދިވެހިރާއްޖޭގެ ސުޕްރީމް ކޯޓުގެ އައު ގަވާއިދު އެ ކޯޓުން ވަނީ އާންމުކޮށްފައެވެ.
އާންމުކޮށްފައިވާ ސުޕްރީމް ކޯޓުގެ މި ގަވާއިދަކީ ދިވެހިރާއްޖޭގެ އެންމެ މަތީ ކޯޓު ކަމުގައިވާ ސުޕްރީމް ކޯޓަށް މައްސަލަ ހުށަހެޅުމާއި، އެ ކޯޓުން މައްސަލަ ބަލައި ގަތުމާއި، އެ ކޯޓުގައި މައްސަލަ ހިންގުމާއި، މިނޫންވެސް ސުޕްރީމް ކޯޓުގައި ހިންގޭ ޝަރީޢަތްތަކާއި ބޭއްވޭ އަޑުއެހުންތަކާ ގުޅޭ އިދާރީ އަދި އިޖުރާއީ ކަންކަން ބަޔާން ކުރާ ޤަވާއިދެވެ.
ސުޕްރީމް ކޯޓުގެ ގަވައިދަށް ބޮޑެތި ބަދަލުތަކެއް ގެނެސްފައިވާއިރު، ޒަމާނީ ބަދަލުތައްވެސް ހިމަނާފައިވެއެވެ. އެގޮތުން ކޯޓު އަމުރުތައް ރައްދުކުރުމާއި ގުޅޭގޮތުން، އިލެކްޓްރޯނިކް ވަސީލަތްތައް މެދުވެރިކޮށް ކޯޓު އަމުރު ރައްދުކުރެވިދާނެކަމަށް އައު ގަވާއިދުގައި ބުނެފައިވެއެވެ.
ސުޕްރީމް ކޯޓުގެ އައު ގަވާއިދަށް ވެސް އަމަލުކުރަން ފަށާއިރު، އެ ކޯޓުގެ ފަނޑިޔާރުންގެ އަދަދަށް ފަނޑިޔާރުން އައްޔަންކޮށް ނިިމި، ކޯޓުގެ މަސައްކަތްތައް ވަނީ ފަށާފަ އެވެ. އައު ސަރުކާރާއެކު ކުރިއަށް އޮތް ސުޕްރީމް ކޯޓުގެ ފަނޑިޔާރުންގެ މަޖިލީސް ވަނީ އެއްކޮށް ބަދަލުކޮށް، ކުރިިން ފަސް ފަނޑިޔާރުން ތިއްބެވި ސުޕްރީމް ކޯޓުގެ ފަނޑިޔާރުންގެ އަދަދު ހަތަކަށް ބަދަލުކޮށްފައެވެ.
