އަތޮޅުތެރޭގެ ޕްރީސްކޫލްތައް ހުޅުވުމަކީ މިވަގުތު އެންމެ ރައްކާތެރި ގޮތެއް ނޫން: އެޑިޔުކޭޝަން މިނިސްޓްރީ
ކޮވިޑުގެ ހާލަތު އޮތް ގޮތުން އަތޮޅު ތެރޭގެ ޕްރީސްކޫލްތައް އަދި ހުޅުވޭކަށް ނެތް
ހުޅުމާލޭގައި ހިންގަމުން އަންނަ ޖެމްސް ލިޓްސް ޕްރީ ސްކޫލުގައި ބޭއްވި ހަރަކާތެއްގެ ތެރެއިން އެ ސްކޫލުގެ ބައެއް ދަރިވަރުން
އަތޮޅުތެރޭގެ ޕްރީސްކޫލްތައް ހުޅުވުމަކީ މިވަގުތު އެންމެ ރައްކާތެރި ގޮތެއް ނޫން ކަމަށް އެޑިޔުކޭޝަން މިނިސްޓްރީން ބުނެފިއެވެ.
ރާއްޖެޓީވީގެ "ތައުލީމާ ބެހޭ ހާއްސަ ޕްރޮގްރާމަށް" ގައި އެޑިޔުކޭޝަން މިނިސްޓްރީގެ ޕާމަނަންޓް ސެކެރަޓަރީ އަހްމަދު އަލީ ވިދާޅުވީ އަތޮޅު ތެރޭގެ ބައެއް ޕްރީސްކޫލްތައް ހުޅުވުމަށް ހުށަހެޅުންތައް ލިބުނު ކަމަށާއި އެކަމާއި ގުޅިގެން އެޑިޔުކޭޝަން މިނިސްޓްރީން މަޝްވަރާތައް ކުރިކަމަށެވެ.
އަދި، ކޮވިޑުގެ ހާލަތު އޮތް ގޮތުން އަދި ޕްރީސްކޫލްތަކުގެ ކިޔެވުން ފަށައިގެން ކުރިއަށް ގެންދިޔުމަކީ އެންމެ ރައްކާތެރި ގޮތް ނޫން ކަމަށާއި ބަލަންޖެހޭ އިތުރު ކަންތައްތައް ބެލުމަށް ލަފާ ލިބިފައި އޮތުމުން ޕްރީސްކޫލްތައް ހުޅުވުމުން މަޑުޖެހިފައިވާ ކަމަށް އަލީ ވިދާޅުވިއެވެ. އެހެންނަމަވެސް މަޝްވަރާތައް އަދިވެސް ކުރިއަށްދާ ކަމަށް ފާހަގަކުރެއްވިއެވެ.
އަތޮޅު ތެރޭގެ ޕްރީސްކޫލްތައް ހުޅުވުމުން މަޑުޖައްސާލާފައިވާއިރު އަތޮޅު ތެރޭގެ ރަށްތަކުން ފެންނަ ކޮވިޑުގެ ކޭސްތައް އިތުރުކަން ފާހަގަކޮށްލެވެއެވެ. އެގޮތުން އެޗްޕީއޭ އިން އެންމެ ފަހުން އާންމުކޮށްފައިވާ ތަފާސްހިސާބުތަކަށް ބަލާއިރު ޖުމްލަ 18 ރަށަކުން 146 ކޭސް ވަނީ މިހާތަނަށް ފެނިފައެވެ. އޭގެ ތެރޭގައި 87 ދިވެހިންނާއި 59 ބިދޭސީން ހިމެނެއެވެ.
މާލެސިޓީގައި މިހާރު ގްރޭޑް 9ން 12ށް ކިޔަވައިދޭން ފަށާފައިވާއިރު ގްރޭޑް 8 އަދި 7 ގެ ކިޔެވުން ފެށުމަށް އެޑިއުކޭޝަން މިނިސްޓްރީން ވަނީ ނިންމާފައެވެ.
އެޑިޔުކޭޝަން މިނިސްޓްރީން ބުނީ ކޮވިޑް-19 ގެ މިހާރުގެ ހާލަތަށް ރިޢާޔަތްކޮށް، އެޗްޕީއޭގެ ލަފާގެ މަތިން، އޮކްޓޫބަރު މަހުގެ 19ން ފެށިގެން މާލޭ ސިޓީގެ ސްކޫލްތަކުގައި ގްރޭޑް 8 ގެ ކިޔެވުން ފެށުމަށް އެ މިނިސްޓްރީން ނިންމާފައިވާ ކަމަށެވެ. އަދި އޮކްޓޫބަރު މަހުގެ 25ން ފެށިގެން މާލޭ ސިޓީގެ ސްކޫލްތަކުގައި ގްރޭޑް 7 ގެ ކިޔެވުން ވެސް ފަށާނެ ކަމަށް އެ މިނިސްޓްރީން ބުންޏެވެ.
މާލެ ސިޓީގެ ސްކޫލުތަކުގައި މިހާރު ކިޔަވައިދޭން ފަށާފައިވާ ގްރޭޑްތަކުގެ އިތުރުން އެހެން ގްރޭޑްތަކަށް ކިޔަވައިދޭން ފެށި ނަމަވެސް އިތުރު ނުރައްކަލެއް ނެތް ކަމަށް ހެލްތު އިމަރޖެންސީ އޮޕަރޭޝަން ސެންޓަރު (އެޗްއީއޯސީ)ގެ ތަރުޖަމާނު ޑރ. ނަޒްލާ ރަފީގް ވިދާޅުވެފައިވެއެވެ. ސްކޫލުތަކުގެ ކިޔެވުން ފަށަނީ އެޗްޕީއޭގެ ގައިޑްލައިންތަކާ އެއްގޮތަށް ރައްކާތެރިކަމުގެ ގިނަ ފިޔަވަޅުތަކާއެކުއެވެ.
އެގޮތުން ސްކޫލުތަކުގައި ދަރިވަރުން އަތް ދޮވެވޭނެ އިންތިޒާމް ހަމަޖައްސާފައިވާއިރު، މާސްކުއެޅުމާއި، ހުން ޗެކްކުރުމުގެ އިތުރުން އިޖްތިމާއީ ގައިދުރުކަމަށް ވަނީ ޚާއްސަ ސަމާލުކަމެއްދީފައެވެ.
