މާލެ ސިޓީ ކައުންސިލުން އިންތިޒާމް ކޮށްގެން ވީކް އެންޑް މާކެޓް ބޭއްވުމުގެ މަސައްކަތް ކުރަމުންދާ ކަމަށް ސިޓީ ކައުންސިލުން ބުނެފިއެވެ.

''ރާއްޖެ.އެމްވީ'' އަށް ދެއްވި ހާއްސަ އިންޓަވިއުއެއްގައި މާލެ ސިޓީ ކައުންސިލްގެ މޭޔަރު ޝިފާ މުހައްމަދު ވިދާޅުވީ، ކޮވިޑް-19 ގެ ހާލަތާއި ގުޅިގެން ވަރަށް ގިނަ އާއިލާތަކެއް ނިކަމެތިވެ، ދަތިތަކާއި ކުރިމަތިލާން ޖެހިފައިވާ ކަމަށެވެ.

އެކަންތައްތަކާއި ގުޅިގެން ކައުންސިލުން ބޭނުން ވަނީ ރައްޔިތުންނަށް އާމްދަނީ އެއް ހޯދައި ދިނުމަށް ވީކެންޑް މާކެޓް އެއް ހުޅުވާލަން ކަމަށެވެ. ހޯމަ ދުވަހު ބޭއްވި ސިޓީ ކައުންސިލްގެ ބައްދަލުވުމުގައި ވީކެންޑް މާކެޓް ބާއްވަން ވަނީ ފާސް ކޮށްފައެވެ. ޝިފާ ވިދާޅުވީ، ވީކެންޑް މާކެޓް ބާއްވަން އިންޑަސްޓްރިއަލް ޒޯން ސަރަހައްދުން ތަނެއް ހަމަޖެހިފައިވާ ކަމަށެވެ. އަދި އެތަނުގައި އަމަލު ކުރާނެ ގޮތުގެ އުސޫލުގެ އިތުރުން ފަށާނެ ތާރީހެއް ވަރަށް އަވަހަށް އިއުލާން ކުރައްވާނެ ކަމަށް ވިދާޅުވިއެވެ.

މީގެ ކުރިން ކޮންމެ ހަފްތާއެއްގެ ނިމުން ފާހަގަ ކުރުމުގެ ގޮތުން މާލޭ ރަސްފަންނު ސަރަހައްދުގައި ޔޫތް މިނިސްޓްރީން އިންތިޒާމު ކޮށްގެން ''ހަފްތާ ރެސް'' ވީކެންޑް މާކެޓް އެއް ބާއްވަމުންނެވެ. އެކަމަކު ކޮވިޑް-19 ސަބަބުން އެ މާކެޓް ބޭއްވުން އޮތީ މަޑުޖައްސާލަފައެވެ. ހަފްތާ ނިމުމުގެ ގޮތުން ވީކެންޑް މާކެޓާއި، ''ހަފްތާ ރެސް'' ބޭއްވުމަކީ ސަރުކާރުގެ 30 ދުވަހުގެ ވައުދުތަކުގެ ތެރޭގައި ހިމެނިގެން ބާއްވަމުން އައި ޙަރަކާތްތަކެވެ. އެ މާކެޓް އަކީ ގިނަ އަދަދެއްގެ ސްޓޯލް ހިމެނޭ ގޮތަށް ބާއްވަމުން އައި މާކެޓްއެކެވެ.

''ހަފްތާ ރެސް'' މާކެޓް އަކީ އާންމު ފަރުދުންނާއި ޒުވާނުންނާއި، އަންހެނުންނާއި، އަދި ހާއްސަ އެހީއަށް ބޭނުންވާ ފަރާތްތަކުގެ ކުދި އަދި މެދުފަންތީގެ ވިޔަފާރިތައް ކުރިއަރުވައި، އެ ފަރާތްތަކުން ބާރުވެރި ކުރުވުމުގެ މަގްސަދުގައި ސަރުކާރުން ކުރިޔަށް ގެންދިޔަ ހަރަކާތެކެވެ.

ކުދި އަދި މެދު ފަންތީގެ ވިޔަފާރިތަކަށް މި ސަރުކާރުން އަންނަނީ ވަރަށް ބޮޑު އަހަމިއްޔަތު ކަމެއް ދެމުންނެވެ. އެ ފަރާތްތަކަށް ހާއްސަކޮށް ސަރުކާރުން ވަނީ ސްމޯލް އެންޑް މީޑިއަމް އެންޓަޕްރައިޒަސް (އެސްއެމްއީ) ބޭންކެއް ޤާއިމް ކޮށްފައެވެ . ކޮވިޑް-19 ގެ ހާލަތާއި ގުޅިގެން ކުދި އަދި މެދު ފަންތީގެ ވިޔަފާރިތަކަށް ލިބިފައިވާ ގެއްލުންތަކުން އަރައި ގަތުމަށް ސަރުކާރުން ދަނީ އެކި ފެންވަރުގައި މަސައްކަތްތަކެއް ކުރަމުންނެވެ.