އެއް މިލިއަން ރުފިޔާ އިން ރާއްޖެޓީވީ ޖޫރިމަނާ ކުރުމާ ގުޅިގެން ހުޅުވާފައިވާ "އަބުރުފުޅު ފަންޑު" ލަންކާގައި ހުޅުވައިފި އެވެ.
މި ފަންޑު ފޮށި ބަހައްޓާފައި ހުރީ ނާވަލަ ރޯޑުން ގޮސް ގްރީން ކެބިންގެ 69/10 ގަ އެވެ. އެހެންކަމުން މި ފަންޑު ފޮއްޓާބެހޭ މައުލޫމާތު ލަންކާއިން ނަމަ 00778571061 ނުވަތަ ރާއްޖެޓީވީގެ ސޯޝަލް މީޑިޔާ މެދުވެރިކޮށް އިތުރު މައުލޫމާތުލިބިގެންދާނެ ކަމަށް، ރާއްޖެޓީވީގެ ބިޒްނަސް ޑިވެލޮޕްމެންޓް މެނޭޖާ ސިމާނާ އިސްމާއީލް ވިދާޅުވި އެވެ.
މިފަންޑަކީ ރާއްޖެޓީވީއަށް ހެޔޮއެދޭ ރާއްޖެޓީވީގެ ބެލުންތެރިން ޖޫރިމަނާ ދެއްކުމުގައި އެހީތެރިވުމަށް އެދެމުންދާތީ ހުޅުވާލާ ފަންޑެއް ކަމަށެވެ. "އަބުރުފުޅު ފަންޑު" ފޮށި ރާއްޖެ ޓީވީގައި ބެހެއްޓިނަމަވެސް އެކިއެކި ހިސާބުތަކުން އެފަންޑަށް ދަނީ އެހީތެރިވަމުންނެ އެވެ.
ބްރޮޑްކާސްޓިން ކޮމިޝަނުން ރާއްޖެޓީވީ އެއް މިލިއަން ރުފިޔާ އިން ޖޫރިމަނާކޮށްފައިވަނީ އޭޕްރީލް 6 ވަނަ ދުވަހު އެވެ. އަދި އެފައިސާ އެއްމަސް ދުވަހުގެ ތެރޭގައި ދެއްކުމަށް ބްރޮޑްކާސްޓިން ކޮމިޝަނުން ވަނީ، އަންގާފަ އެވެ
ރާއްޖެޓީވީ ޖޫރިމަނާކޮށްފައި ވަނީ މިދިއަ އަހަރުގެ އޮކްޓޯބަރު 26 ވަނަ ދުވަހުގެ ރޭ އެމްޔޫއޯގެ ހަރުގެ ޖަލްސާ ލައިވްކުރަމުން ދިޔައިރު، ވާހަކަ ދެއްކެވި ބޭފުޅަކު ދެއްކެވި ވާހަކަތަކަކާ ގުޅިގެންނެވެ.
ބްރޯޑްކާސްޓިން ކޮމިޝަނުން މީގެ ކުރިން ވަނީ ރާއްޖެ ޓީވީ ދެލައްކަ ރުފިޔާ އިން ޖޫރިމަނާކޮށްފައެވެ. އެ ޖޫރިމަނާ ފައިސާ ރާއްޖެޓީވީން ވަނީ ދައްކާފަ އެވެ.
ރާއްޖެޓީވީން އިސްނަގައިގެންވަނީ ބްރޯޑްކާސްޓިން ކޮމިޝަނުން މިނިވަން މީޑިއާގެ މާހައުލެއް ގާއިމް ކުރުމުގެ ބަދަލުގައި ވަކިވަކި މީޑިއާތަކަށް ހުރަސްއަޅަމުންދާތީ، އެ ކޮމިޝަނުގައި މިހާރު ތިބި މެންބަރުން މަގާމުން ވަކިކުރުމަށް އެދި ރައްޔިތުންގެ މަޖިލީހަށް ހުށަހަޅާ ޕެޓިޝަނެއް ވެސް އެކުލަވާލާފަ އެވެ.
