ބައެއް ޖޫރިމަނާތައް ކަނޑައެޅިފައިވާ ގޮތް ރިވިއުކުރުން މުހިއްމު ކަމަށް ގަވާއިދު ކޮމިޓީގެ ރިޕޯޓުގައި ބުނެފި
12 އޮކްޓޯބަރު 2020 | ހޯމަ 09:43ރިޕޯޓް ފާސްކުރީ 2020 ވަނަ އަހަރުގެ ތިންވަނަ ދައުރުގެ ހަތަރުވަނަ ޖަލްސާގައި
ރައްޔިތުންގެ މަޖިލީހުގެ ގަވައިދު ކޮމިޓީގެ ބައްދަލުވުމެއްގެ ތެރެއިން
ސަރުކާރުގެ އިދާރާތަކުން ޢަމަލުކުރަމުންގެންދާ ގަވާއިދުތަކުގެ ދަށުން ފީ އަދި ޖޫރިމަނާ ނަގަމުންދާ ގަވާއިދުތައް ބަލައި އެ ފީތައް ނަގަމުންދަނީ ޤާނޫނާ އެތްގޮތަށްތޯ ބަލައިދިނުމަށް އެދި މަޖިލީހުގެ ގަވާއިދު ކޮމިޓީއަށް ހުށަހެޅިފައިވާ މައްސަލަ ދިރާސާކޮށް ނިންމިގޮތުގެ ރިޕޯޓު ފާސްކޮށްފިއެވެ.
ހޯމަ ދުވަހުގެ ޖަލްސާގައި މި ރިޕޯޓު ފާސްކޮށްފައިވަނީ 49 މެމްބަރުންގެ ވޯޓުންނެވެ. ގަވާއިދު ކޮމިޓީން މި ރިޕޯޓުގައި ފާހަގަކޮށްފައިވާ މުހިއްމު ކަންކަމަށް ބަލާއިރު މޯލްޑިވްސް އިންލެންޑް ރެވެނިއު އޮތޯރިޓީ، މިނިސްޓްރީ އޮފް ޓޫރިޒަމް އަދި މިނިސްޓްރީ އޮފް ޓްރާންސްޕޯޓް އެންޑް ސިވިލް އޭވިއޭޝަނުން ޢަމަލުކުރަމުންދާ ގަވާއިދުތަކުގެ ދަށުން ބޮޑެތި ޢަދަދުތަކުން ޖޫރިމަނާ ނަގަމުންދާކަމަށެވެ. ނަމަވެސް ބައެއް ޖޫރިމަނާތަކަކީ ކިހިނެއް ކަނޑައެޅިފައިވާ ޖޫރިމަނާތަކެއްކަން ނޭނގޭތީ، އެކަންކަން ރިވިއުކުރުން މުހިންމުކަމަަށް ދެކޭ ކަމަށް ކޮމިޓީން ވަނީ ފާހަގަކޮށްފައެވެ.
މީގެ އިތުރުން ދިވެހިރާއްޖޭގެ ޓޫރިޒަމާ ބެހޭ ޤާނޫނުގެ ދަށުން ރެގިއުލޭޓް ކުރަމުންދާ ގަވާއިދުތަކަކީ ވަރަށް ކުރީގައި ފާސްކުރެވި ޢަމަލުކުރަމުންދާ ގަވާއިދުތަކެއްކަމުން އެ ގަވާއިދުތައް މުރާޖަޢާކުރުން މުހިންމު ކަމަށްވެސް ކޮމިޓީން ފާހަގަކޮށްފައިވެއެވެ.
ކޮމިޓީ ރިޕޯޓުގައި އިތުރަށް ވަނީ ޤާނޫނުތަކުގެ ދަށުން ހެދިފައިވާ ގަވާއިދުތަކުގެ ދަށުން ވަރަށް ބޮޑު ޢަދަދެއްގެ ފީތަކެއް ނެގެމުންދާކަމާއި، އެ ފީތަކުގެ ޢަދަދު ކަނޑައެޅެނީ ކޮން އުސޫލަކުންކަން ސާފުނުވާކަމަށާއި، ފީތައް ކަނޑައެޅުމުގައި ހަރުދަނާ އުސޫލެއް ކަނޑައެޅުން މުހިންމުކަމަށެވެ.
