ހުޅުމާލެ ކައިރީގައި އޮތް ބޯޓަކުން 100 ކިލޯއަށްވުރެ ގިނަ މަސްތުވާތަކެތި އަތުލައިގެންފި
12 އޮކްޓޯބަރު 2020 | ހޯމަ 07:10އަތުލައިގެންފައިވަނީ 100 ކިލޯގެ ހެރޮއިންއާއި މެތެމްފެޓަމިން
ހޯމަ ދުވަހު ފުލުހުން ހިންގި ޚާއްސަ އޮޕަރޭޝަންގައި އަތުލައިގެންފައިވާ މަސްތުވާތަކެތި
ހުޅުމާލޭ ފަޅުގައި އޮތް ބޯޓަކުން 100 ކިލޯއަށްވުރެ ގިނަ މަސްތުވާތަކެތި އަތުލައިގެންފިއެވެ.
އެކަމާ ގުޅޭގޮތުން ކޮމިޝަނަރ އޮފް ޕޮލިސް މުޙައްމަދު ހަމީދު ކުރެއްވި ޓްވީޓެއްގައި ވިދާޅުވީ، މިއީ ފުލުހުންގެ ޑްރަގް އެންފޯސްމަންޓް ޑިޕާޓްމަންޓާއި، އިންޓެލިޖެންސްގެ އިތުރުން، މެރިން ފުލުހުން ގުޅިގެން ހިންގި އޮޕަރޭޝަނެއް ކަމަށެވެ. އެގޮތުން މި އޮޕަރޭޝަންގައި 100 ކިލޯއަށްވުރެ ގިނަ މަސްތުވާތަކެތި އަތުލައިގެންފައިވާކަން ސީޕީ ފާހަގަ ކުރެއްވިއެވެ.
ސީޕީ ވިދާޅުވީ، މި އޮޕަރޭޝަންގައި އަތުލައިގެންފައިވަނީ 100 ކިލޯގެ ހެރޮއިންއާއި މެތެމްފެޓަމިން ކަމަށެވެ. އަދި މި އޮޕަރޭޝަން ހިންގާފައިވަނީ ހޯމަ ދުވަހުގެ ހެނދުނުގެ ވަގުތެއްގައިކަން ސީޕީ ފާހަގަ ކުރެއްވިއެވެ.
އޭގެ އިތުރުން، ޑްރަގް ޓްރެފިކިންގ ގެ މައްސަލަތަކާއި ގުޅިގެން ނުކުންނަ އިޖުތިމާއީ އަދި އިޤްތިސާދީ މައްސަލަތައް ގިނަކަން ފާހަގަ ކުރައްވައި ސީޕީ އިތުރަށް ވިދާޅުވީ، ޑްރަގްގެ ވިޔަފާރި ކުރުން ހުއްޓުވުމަށް ކުރަމުންދާ މަސައްކަތް ފުލުހުން ހުއްޓުމެއް ނެތި ކުރަމުންދާނެ ކަމަށެވެ.
ފުލުހުން ވަނީ ދާދި ފަހުންވެސް މިފަދަ ބޮޑު އޮޕަރޭޝަނެއް ހިންގާފައެވެ. އެގޮތުން އައްޑޫ ސިޓީގައި ފުލުހުން ހިންގި ޚާއްސަ އޮޕަރޭޝަންގައި 98.6 ކިލޯގެ މަސްތުވާތަކެތި ވަނީ އަތުލައިގެންފައެވެ. މި މަސްތުވާތަކެތި އަތުލައިގެންފައި ވަނީ ރާއްޖޭގެ ކަނޑާއި އަރަބި ކަނޑު ގުޅުނު ސަރަޙައްދުން، އެތަކެތި ހިފައިގެން ޑިންގީއެއްގައި ބަޔަކު ދަތުރުކޮށްފައި އައްޑޫއަށް އަންނަނިކޮށް ދިވެހި ފުލުހުންނެވެ.
