ހުޅުމާލެ ފްލެޓެއް ކައިރިން ފޭރިގަތް އަންހެނެއްގެ އަތް ދަބަސް ހޯދައި، ތުހުމަތު ކުރެވޭ ދެ މީހަކު ހައްޔަރު ކޮށްފިއެވެ.

ފުލުހުންގެ މީޑިއާއިން ބުނީ، އާދިއްތަ ދުވަހު ހުޅުމާލެ ޕޮލިސް އަށް ހުށަހެޅުނު ފޭރުމުގެ މި މައްސަލާގައި ހިމެނޭ އަތް ދަބަސް ހޯދާފައިވަނީ އާންމު ރައްޔިތެއްގެ އެހީތެރިކަމާއެކު ފުލުހުންނެވެ.

މި މައްސަލާގައި ހައްޔަރު ކޮށްފައިވަނީ 23 އަހަރުގެ ފިރިހެނަކާއި 25 އަހަރުގެ ފިރިހެނެއް ކަމަށާއި އެ ދެމީހުން ހައްޔަރު ކޮށްފައިވަނީ އާދިއްތަ ދުވަހުގެ ވަގުތެއްގައި ހުޅުމާލެ 66 ނަންބަރު ފްލެޓް ކައިރިން ކަމަށް ފުުލުހުން ބުނެއެވެ. އަދި މި މައްސަލަ ހުޅުމާލެ ޕޮލިސް ސްޓޭޝަނުން ތަހުގީގު ކުރަމުންދާ ކަމަށް ވެސް ފުލުހުންގެ މީޑިއާއިން ބުނެއެވެ.

މަގުމަތިން ފޭރުމުގެ އަމަލުތައް ދޭތެރެދޭތެރެއިން ހިންގަމުންދާއިރު، ބޮޑެތި ފައިސާގެ އަދަދުތަކުން ވެސް މީގެކުރިން މަގުމަތިން ފޭރިގެންފައި ވެއެވެ.