އެޗްޕީއޭގެ ގައިޑްލައިންތަކަށް ފުރަތަމަ ޑިވިޝަނުގެ ކުލަބުތައް އަހުލުވެރިކޮށްފި
11 އޮކްޓޯބަރު 2020 | އާދީއްތަ 16:27ފުރަތަމަ ޑިވިޝަނުގެ ޓީމުތަކަށް ވަނީ ފަރިތަކުރުންތައް ފެށުމުގެ ހުއްދަ ދީފައި
ހޮނިހިރު ދުވަހު އެފްއޭއެމުން ފުރަތަމަ ޑިވިޝަނުގެ ކުލަބުތަކާއެކު ބޭއްވި ބައްދަލުވުމުގެ ތެރެއިން
ހެލްތު ޕްރޮޓެކްޝަން އޭޖެންސީ (އެޗްޕީއޭ) އާއި ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) އިން ފަރިތަކުރުންތައް ކުރިއަށްގެންދަން އެކުލަވާލި ގައިޑްލައިނުތަކަށް ފުރަތަމަ ޑިވިޝަނުގެ ކުލަބުތައް އަހުލުވެރިކޮށްފިއެވެ.
މި މަހުގެ އެއްވަނަ ދުވަހު އެޗްޕީއޭއިން ވަނީ ފުރަތަމަ ޑިވިޝަނުގެ ޓީމުތަކަށް ފަރިތަކުރުންތައް ފެށުމުގެ ހުއްދަ ދީފައެވެ. އަދި ބުރާސްފަތި ދުވަހު ޑިރެކްޓާ ޖެނަރަލް އޮފް ޕަބްލިކް ހެލްތު މައިމޫނާ އަބޫބަކުރާއި، އެފްއޭއެމުގެ ޖެނެރަލް ސެކްރެޓަރީ ހުސެއިން ޖަވާޒް (ޖަވާ) ގެ އިތުރުން އެ އިދާރާގެ އޮފިޝަލުންނާއި، ކުޅިވަރާ ބެހޭ ވުޒާރާގެ ސްޓޭޓް މިނިސްޓަރު އަސްހަދު އަލީގެ އިތުރުން ޓެކްނިކަލް އެޑްވައިޒަރީ ގްރޫޕް (ޓެގް) އާއި ފުލުހުން އެކުގައި ބޭއްވި ބައްދަލުވުމުގައި ވަނީ ނިއު ނޯމަލްގައި ފަރިތަކުރުންތައް ކުރިއަށްގެންދާނެ ގޮތުގެ ގައިޑްލައިން ފައިނަލް ކޮށްފައެވެ.
އެއާއެކު ހޮނިހިރު ދުވަހު އެފްއޭއެމުން ވަނީ ފުރަތަމަ ޑިވިޝަނުގެ ކުލަބުތަކުގެ ހައިޖީން އޮފިސަރުން ކަނޑައަޅާ، ގައިޑްލައިންތަކަށް އަހުލުވެރިކުރުމުގެ ބައްދަލުވުމެއް ބާއްވާފައެވެ. އަދި ކުރިއަށް އޮތް ސީޒަނަށް ކުލަބުތަކުން ތައްޔާރުވަމުންދާއިރު، ޓީމުގެ ހުރިހާ ކަމެއްވެސް ހުރީ އެޗްޕީއޭގެ މިންގަނޑުތަކަށް ފެތޭ ގޮތެއްގެ މަތިންތޯ ބަލާނެ ގޮތްތައްވެސް މި ބައްދަލުވުމުގައި ވަނީ ކިޔައިދީފައެވެ.
މީގެ އިތުރުން މި ބައްދަލުވުމުގައި ކުރިއަށް އޮތް ސީޒަނަށް ތައްޔާރުވުމަށް އެފްއޭއެމުން ކުރަމުންދާ މަސައްކަތްތަކާ ބެހޭގޮތުން ކުލަބުތަކަށް މައުލޫމާތު ދީފައިވާއިރު، ކުލަބު ލައިސަންސް އާއި ފައިނޭންޝަލް ރިޕޯޓިންގ އެސްޕެކްޓްސްއާ ބެހޭގޮތުންވެސް ކުލަބުތަކަށް ވަނީ މައުލޫމާތުދީފައެވެ.
ފުރަތަމަ ޑިވިޝަނުގެ ޓީމުތަކަށް ފަރިތަކުރުންތައް ފެށުމުގެ ހުއްދަ ދީފައިވާއިރު، ހޮނިހިރު ދުވަހުގެ ހަވީރު އެންމެ ފަހުގެ ޗެމްޕިއަން މާޒިޔާ ސްޕޯޓްސް އެންޑް ރެކްރިއޭޝަނުން ވަނީ ފަރިތަކުރުންތައް ފަށާފައެވެ. އެއާއެކު މާޒިޔާ ވެފައިވަނީ އައު ސީޒަނަށް ފަރިތަކުރުންތައް ފެށި ފުރަތަމަ ޓީމަށެވެ.
ކޮވިޑް-19 އާ ގުޅިގެން އައު ސީޒަން ފެށުން ލަސްވެފައިވާއިރު، އަންނަ ޑިސެމްބަރު މަހު ފުޓްބޯޅަ ސީޒަން ފަށަން އެފްއޭއެމުން އަންނަނީ މަސައްކަތް ކުރަމުންނެވެ. އެކަމަކު ދާދި ފަހުން ހެލްތު އެމަޖެންސީ އޮޕަރޭޝަން ސެންޓަރު (އެޗްއީއޯސީ) ގެ ތަރުޖަމާނު ޑރ. ނަޒްލާ ރަފީގު ވަނީ މާލެ ސަރަހައްދުގައި އަޅާފައިވާ ފިޔަވަޅުތަކަށް ލުދިނުމުގެ ތެރެއިން ކުޅިވަރު ހަރަކާތްތަކަށް ހުއްދަ ދެވޭނީ ފެންނަ ކޭސްތަކުގެ އަދަދަށް ބެލުމަށްފަހުގައި ކަމަށް ވިދާޅުވެފައެވެ.
