ޤާސިމްގެ މަރުގެ ޝަރީއަތުގައި އަދުހަމް: "މި އޮންނަނީ ކޮތަރު ކޮއްޓެއްގައި، ވަކީލަކު އައްޔަނު ކުރަން ވަގުތު ބޭނުންވޭ"
މީގެ ކުރިން އެންމެ ފަހުން އަޑުއެހުމެއް ބާއްވާފައިވަނީ މި ހިނގާ އޮކްޓޯބަރު މަހުގެ 1 ވަނަ ދުވަހު
ޤާސިމްގެ މަރާ ގުޅިގެން އަދުހަމުގެ މައްޗަށް އުފުލާފައިވާ ދައުވާއާ ގުޅިގެން އާދިއްތަ ދުވަހު ކްރިމިނަލް ކޯޓުގައި ކުރިއަށް ދިޔަ އަޑުއެހުން
ޓެކްސީ ޑްރައިވަރު، 59 އަހަރުގެ ގާސިމް ހަސަން މަރާލި މައްސަލާގައި، ގަސްދުގައި މީހަކު މެރުމުގެ ކުށުގެ ދައުވާ އުފުލާފައިވާ ޅ. ހިންނަވަރު، ބޮޑުހިޔާގެ، އަދުހަމް މުހައްމަދު (21 އ) ގެ ޝަރީއަތުގެ އަޑުއެހުމެއް އާދިއްތަ ދުވަހަށް ކްރިމިނަލް ކޯޓުގައި ކުރިއަށް ގެންގޮސްފިއެވެ.
މި މައްސަލައިގައި އާދިއްތަ ދުވަހު ކްރިމިނަލް ކޯޓުގައި ކުރިއަށް ގެންދިޔަ އިބްތިދާއީ އަޑުއެހުމުގައި މައްސަލަ ބައްލަވާ ގާޒީ ވަނީ ވަކީލަކު އައްޔަނު ކުރުމަށް ދެއްވި މުއްދަތުގައި ވަކީލަކު އައްޔަނު ކުރައްވާފައި ނުވަނީ ކީއްވެތޯ ސުވާލު އުފައްދަވާފައެވެ. އެކަމާ ގުޅިގެން އަދުހަމު ބުނީ، ވަކީލަކު އައްޔަނު ކުރުމަށް ފޯމެއް ހުށައަޅައިގެންވެސް ޖަވާބެއް ނުލިބޭ ކަމަށާއި، "ކޮތަރު ކޮއްޓެއްގައި އޮންނަންޖެހޭއިރު" ވަކީލަކު އައްޔަނު ކުރަން ދަތިވާނެކަމަށެވެ. އަދި މިހާރު ވަކީލަކާ ނުލައިވެސް މައްސަލަ ކުރިއަށް ގެންދަން އެއްބަސް ކަމަށާއި، ނަމަވެސް ދައުވާއާ ގުޅޭ ހުރިހާ ލިއެކިއުންތައް ބޭނުންވާކަން އަދުހަމު ފާހަގަ ކުރިއެވެ.
އެއާއެކު ގާޒީ ވަނީ ވަކީލަކު އައްޔަނު ކުރުމަށް އިތުރު ފުރުސަތެއް ބޭނުންވޭތޯ އަދުހަމާ ސުވާލު ކުރައްވާފައެވެ. އެކަމާ ގުޅިގެން އަދުހަމު ވަނީ މި ވަގުތު ވަކީލެއް ބޭނުން ނުވާ ކަމަށާއި، މައްސަލައިން ދިފާއުވުމަށް ވާހަކަ ދެއްކޭނެ ކަމަށް ބުނެފައެވެ.
ވަކީލަކު ބޭނުންނުވާކަން އަދުހަމު ފާހަގަ ކުރުމާއެކު މައްސަލަ ބައްލަވާ ގާޒީ ވަނީ ވަކީލަކާ ނުލައި މައްސަލަ ކުރިއަށް ގެންގޮސް، ދިފާއީ ވަކީލު އަތުގައި ހުރި ލިއެކިއުންތައް އަވަހަށް ފޯރުކޮށްދިނުމުގެ އިންތިޒާމު ހަމަޖައްސައި ދެއްވުމަށް އެދިވަޑައިގެންފައެވެ. އަދި އެ ލިއެކިއުންތައް ކަރެކްޝަންސް މެދުވެރިކޮށް އާދިއްތަ ދުވަހުގެ ވަގުތެއްގައި ޙަވާލު ކުރައްވާނެކަން ދައުލަތުން ފާހަގަކުރިއެވެ.
އެހެން ނަމަވެސް، މި މައްސަލައިގައި ގާޒީއާއި ދައުލަތުން ފާހަގަކުރި ކަންކަމަށްފަހު އަދުހަމު ވަނީ މައްސަލައާ ގުޅިގެން ވަކީލަކާ މަޝްވަރާ ކުރުމުގެ އެކަށީގެންވާ ފުރުސަތު ލިބިއްޖެނަމަ، އައު ވަކީލަކާއެކު ކުރިއަށް ދިއުމަށް ބޭނުންވާކަން ފާހަގަކޮށްފައެވެ. އަދި ގާޒީ ވަނީ އެ ފުރުސަތު ދެއްވުމަށް ނިންމަވައި އެހެން ދުވަހަކަށް އަޑުއެހުން ތާވަލުކޮށްފައެވެ. މި މައްސަލައިގެ ދެން އަޑުއެހުމެއް އޮންނާނެ ދުވަހެއް ގާޒީ އިއުލާނު ކުރައްވާފައެއް ނުވެއެވެ.
މި މައްސަލައިގައި އެންމެ ފަހުން އަޑުއެހުމެއް ބާއްވާފައިވަނީ މިހިނގާ އޮކްޓޯބަރު މަހުގެ 1 ވަނަ ދުވަހުއެވެ. އެ ދުވަހުގެ އަޑުއެހުމުގައި އަދުހަމް ވަނީ، މީގެކުރިން ދައުލަތުން އޭނާއަށް ހަމަޖައްސައިދިން ގާނޫނީ ވަކީލާއެކު މި މައްސަލާގައި ކުރިއަށް ދިއުމުގެ ބަދަލުގައި، އަމިއްލައަށް ގާނޫނީ ވަކީލެއް އައްޔަން ކުރުމަށްފަހު، މައްސަލާގައި ކުރިއަށް ދިއުމަށް ބޭނުންވާ ކަމަށް ބުނެފައެވެ. އެގޮތުން ޤާނޫނީ ވަކީލެއް ހަމަޖެއްސުމަށް ޤާނޫނީ ވަކީލަކާއެކު ވާހަކަ ދެކެވެމުންދާ ކަމަށާއި، ތިން ދުވަސް ތެރޭގައި ވަކީލެއް ހަމަޖެހޭނެ ކަމަށް އުއްމީދު ކުރާ ކަމަށް އަދުހަމު އޭރު ވަނީ ބުނެފައެވެ.
ގާސިމްގެ މަރުގެ މައްސަލާގައި އަދުހަމުގެ ޝަރީއަތުގެ އަޑުއެހުމެއް އެންމެފަހުން ބާއްވާފައިވަނީ މިއަހަރުގެ ފެބްރުއަރީ މަހުގެ 18 ވަނަ ދުވަހުއެވެ. އެ ދުވަހު ބޭއްވި ޝަރީއަތުގެ އަޑުއެހުމަކީ، ގާސިމް މަރާލުމާއި ގުޅިގެން، ގަސްތުގައި މީހަކު މެރުމުގެ ދައުވާއަށް އަދުހަމް އިއުތިރާފްވެފައިވާތީ އަވަސް ނިޔާގެ ޝަރީއަތުގެ އަޑުއެހުމެކެވެ.
ނަމަވެސް އެ ޝަރީއަތުގެ މަޖިލީހުގައި ކުރިން ވެފައިވާ އިއުތިރާފް އަދުހަމް އަނބުރާ ގެންގޮސް، އޭނާ ވަނީ ދައުވާއަށް އިންކާރު ކޮށްފައެވެ. އެހެންކަމުން އަވަސް ނިޔާގެ ޝަރީއަތުގެ މަރުހަލާ އެވަނީ ނިމިފައެވެ. ދެން ކުރިއަށްދާނީ ޖިނާއީ އެހެން މައްސަލަތައްވެސް ކުރިއަށްދާގޮތަށް އިބްތިދާއީ އަޑުހެންތަކަށްފަހު، ޝަރީއަތުގެ އަޑު އަޑުއެހުންތަކެވެ. އަދުހަމްގެ މައްޗަށް ދައުލަތުން އުފުލާފައިވަނީ، ތޫނު އެއްޗެއް ބޭނުންކޮށްގެން ގަސްތުގައި މީހަކު މެރުމުގެ ކުށުގެ ދައުވާއެވެ.
ގާސިމް މަރާލާފައި މަގުމަތީ އޮތްވާ ފެނިގެން މީހަކު، ފުލުހުންނަށް ރިޕޯޓް ކޮށްފައިވަނީ މިދިއަ އަހަރުގެ ޑިސެންބަރު މަހުގެ ހަތަރު ވަނަ ދުވަހުގެ ރޭ 21:07 ހާއިރުއެވެ.
ފުލުހުން ބުނެފައިވާގޮތުން، އަދުހަމަކީ މަސްތުވާތަކެތީގެ މައްސަލަތަކާއި ވައްކަމާއި، ފޭރުމާއި، މާރާމާރީގެ އިތުރުން ތަފާތު އެކިއެކި މައްސަލަތަކުގެ ރެކޯޑު އޮތް މީހެއް ކަމަށެވެ. އެގޮތުން ގާސިމް މަރާލި ދުވަހު ވެސް އޭނާ މަސްތުވުމަށާއި ޒަރޫރީ އެކިއެކި ބޭނުންތަކަށް ފައިސާ ހޯދުމަށް ފޭރުމަށް މަސައްކަތް ކުރި ކަމަށެވެ. އަދި މާލެއިންނާއި ހުޅުމާއިން ބަޔަކާއެކު މަސްތުވާތަކެތި ބޭނުންކޮށްފައިވާ ކަމަށް ފުލުހުން ބުނެފައިވެއެވެ.
