ކޮވިޑާއި ގުޅިގެން ސަރުކާރުން ކޮންޓްރެކްޓްގައި ސޮއި ކުރެވިފައިވާ މަޝްރޫޢުތައް ނޫން އެހެން ހުރިހާ މަޝްރޫޢުތައް ހުއްޓާލުމަށް ނިންމީ ވަކި ރަށަކަށް އިސްކަންދީގެން ނޫން ކަމަށް މިނިސްޓަރ އޮފް ނޭޝަނަލް ޕްލޭނިންގ، ހައުސިންގ އެންޑް އިންފްރާސްޓްރަކްޗަރ މުހައްމަދު އަސްލަމް ވިދާޅުވެއްޖެ އެވެ.
މި ދައުރުގެ ފުރަތަމަ ޖަލްސާގައި މިނިސްޓަރ އަސްލަމާއި ސުވާލު ކުރުމަށް ހުޅުވާލި ފުރުސަތުގައި ގިނަ މެމްބަރުންތަކެއް ވަނީ އެ މެމްބަރަކު ހިމެނޭ ދާއިރާގެ ރަށްތަކުގެ މަޝްރޫޢުތައް ހުއްޓިފައިވާތީ އެކަމުގެ ސުވާލުތައް މިނިސްޓަރަށް އަމާޒު ކުރައްވާފައެވެ. އެ ސުވާލުތަކަށް ޖަވާބު ދެއްވަމުން މިނިސްޓަރ ވިދާޅުވީ ކޮވިޑާއި ގުޅިގެން ސޮއި ކުރެވިފައިވާ މަޝްރޫޢުތައް ނޫން އެހެން ހުރިހާ މަޝްރޫޢުތަކެއް ހުއްޓާލުމަށް ސަރުކާރުން ނިންމި ކަމަށާއި އޭގެން ދެން އިސްތިސްނާ ވަނީ ރާއްޖެއިން ބޭރުން ލޯނެއް ހަމަޖެހިގެން ބޭރުގެ ފަންޑުން ކުރެވޭ މަސައްކަތްތައް ކަމަށެވެ.
އެކްސެޕްޓް ރާއްޖެއިން ބޭރުން ލޯނެއް ހަމަޖެހިގެން ބޭރުގެ ފަންޑުން ކުރެވޭ މަސައްކަތްތަކާއި، ފަންޑިން ހަމަޖެހިގެން އެހެން ގޮތަކަށް ނަމަވެސް ކޮންޓްރެކްޓަރ ފައިނޭންސްކޮށްގެން ފަންޑިން ހަމަޖެހިގެން ސަރުކާރަށް އެކްސްޕެކްޓްކުރެވޭ ހަމަތަކެއްގެ ތެރޭގައި ފަންޑިން ހަމަޖެހިގެން ހުންނަ ޕްރޮޖެކްޓްތައް ފިޔަވައި ދެން ހުރި ހުރިހާ މަސައްކަތެއް އިހަށް މަޑުޖައްސާލަން ނިންމީ. އަނެއްހެން ވަކި ރަށެއްގެ އިސްކަން ބޮޑުވެގެންނެއް ނޫން މަސައްކަތް މިހާރު ކުރިޔަށް އެދަނީކީ. އެއީ ކުރީގައި ހިނގަހިނގާ ހުރި މަޝްރޫޢުތައް. ސޮއުކުރެވިފައި ހުރި މަޝްރޫޢުތައް ކުރިޔަށްދަނީމިނިސްޓަރ އޮފް ނޭޝަނަލް ޕްލޭނިންގ، ހައުސިންގ އެންޑް އިންފްރާސްޓްރަކްޗަރ މުހައްމަދު އަސްލަމް
ކޮވިޑް-19 އާއި ގުޅިގެން ރާއްޖެއަށް ލިބޭ އާމްދަނީ ވަނީ ބޮޑުތަނުން ދަށަށް ގޮސްފައެވެ. މި އަހަރު އާމްދަނީ އާއި ހިލޭ އެހީގެ ގޮތުގައި 30 ބިލިއަން ރުފިޔާ ލިބޭނެ ކަމަށް ބަޖެޓްގައި އަންދާޒާ ކޮށްފައިވީ ނަމަވެސް ފިނޭންސް މިނިސްޓަރ އިބްރާހީމް އަމީރު ވިދާޅުވެފައިވަނީ މި އަހަރު ލިބޭނެ ކަމަށް މިހާރު އަންދާޒާ ކުރެވެނީ 14 ބިލިއަން ރުފިޔާ ކަމަށެވެ. މިއާއެކު ސަރުކާރުން މިއަހަރަށް ހިންގުމަށް ހަމަޖައްސާފައިވާ ގިނަ މަޝްރޫޢުތަކެއް ވަނީ މަޑުޖައްސާލާފައެވެ. ހަމައެކަނި ކުރިން ފައިސާ ހަމަޖެހިފައި ހުރި މަޝްރޫޢުތައް ނޫން އެހެން މަޝްރޫޢުތައް މިހާރު ކުރިޔަކަށް ނުދެއެވެ.
