ހެޕީ މާކެޓްގެ ގްރީން ފްލީޓްތައް ރަސްމީކޮށް ބޭނުން ކުރަން ފަށައިފި

ހެޕީ މާކެޓްގެ ގްރީން ފްލީޓްތައް ރަސްމީކޮށް ބޭނުން ކުރަން ފަށައިފިއެވެ.

ހޮނިހިރު ދުވަހު ތަޢާރަފް ކުރެވިގެންދިޔަ މި ޚިދުމަތާއި ގުޅޭގޮތުން ހެފީ މާކެޓްގެ ސީއީއޯ އަލީ އިހުސާން ވިދާޅުވީ އެކުންފުންޏަކީ ޒިންމާދާރު ގޮތުގައި ރައްޔިތުންނަށް ޚިދުމަތްދޭން ބޭނުންވާ ކުންފުންޏެއް ކަމަށާއި އެގޮތުން ކާބަން ފުޓްޕްރިންޓް ވީހާވެސް ކުޑަ ކުރުމަކީ ކުންފުނީގެ އަމާޒު ކަމަށެވެ.

އިހުސާން ވިދާޅުވީ މި އުޅަނދުތަކުގެ ތެރޭގައި 2 ޓަނުގެ އަދި 1.5 ޓަނުގެ ކެޕޭސިޓީގެ އުޅަނދުތައް ހިމެނޭ ކަމަށެވެ.

މި އުޅަނދު ތަކުގެ ސަބަބުން ކުންފުންޏަށް ޚަރަދުތަކެއް ކުޑަވެ، ލިބޭ ގެއްލުން ކުޑަވެގެންދާނެ ކަމަށެވެ.

މީގެ އިތުރުން އުޅަނދު ތަކުގެ ސައިޒް ކުޑަވުން މަގުތަކުގައި ޓްރެފިކް ޖޭމް ވުމަށް ވެސް ހައްލު ލިބިގެންދާނެ ކަމަށް އޭނާ ވިދާޅުވިއެވެ.

އިހުސާން ވިދާޅުވީ މި އުޅަނދުތައް މާލޭގެ އިތުރުން، ވިލިމާލެ، ހުޅުމާލެ، ކުޅުދުއްފުށީ އަދި އައްޑޫ ސިޓީގައި ވެސް ބޭނުން ކުރުމަށް ނިންމާފައިވާ ކަމަށެވެ. އަދި އެކުންފުނި ވެގެން ދާނީ ކުރިމަގުގައި ތިމާވެއްޓާ ރަށްޓެހި ކުންފުންޏަކަށް ކަމަށް އޭނާ ވިދާޅުވިއެވެ.