ނަފްސާނީ ދުޅަހެޔޮ ކަމުގެ ދުވަހުގެ ހާއްސަ ވެބިނާއެއް، ފަސްޓް ލޭޑީ ބައިވެރިވެވަޑައިގަންނަވާނެ
އިންތިޒާމް ކުރަނީ އެމްއާރްސީއާ ޔުނިސެފް ގުޅިގެން
ާއެމްއާރްސީގެ ސައިކޮސޯޝަލް ސެންޓަރުގައި ވޮލެންޓިއަރުން ހަރަކާތްތެރިވަނީ
ހޮނިހިރު ދުވަހު ފާހަގަކުރާ ބައިނަލްއަގްވާމި ނަފްސާނީ ދުޅަހެޔޮކަމުގެ ދުވަސް ފާހަގަކުރުމުގެ ގޮތުން ދިވެހި ރެޑް ކްރެސެންޓް (އެމްއާރްސީ) އާއި ޔުނިސެފް ގުޅިގެން ހާއްސަ ވެބިނަރއެއް ބޭއްވުމަށް ހަމަޖެހިއްޖެއެވެ.
ބައިނަލްއަގުވާމީ ނަފްސާނީ ދުޅަހެޔޮކަމުގެ ދުވަހަކީ އޮކްޓޫބަރު މަހުގެ 10 ވަނަ ދުވަސް ކަމަށް ކަނޑައަޅާފައިވަނީ 1992 ވަނަ އަހަރުއެވެ. އެއަށް ފަހު ކޮންމެ އަހަރެއްގައިވެސް ދުނިޔޭގެ އެކި ކަންކޮޅުތަކުގައި އަންނަނީ މި ދުވަސް ފާހަގަކުރަމުންނެވެ. މި އަހަރުގެ ޝިޔާރަކީ '' މޫވް ފޯ މެންޓަލް ހެލްތް: އިންކްރީޒްޑް އިންވެސްޓްމެންޓް އިން މެންޓަލް ހެލްތް'' އެވެ.
ރާއްޖޭގައި ނަފްސާނީ ދުޅަހެޔޮކަމުގެ ދުވަސް ފާހަގަކުރުމުގެ ގޮތުން ބާއްވާ ހާއްސަ އޮންލައިން ވެބިނަރ ކުރިޔަށްދާނީ ހޮނިހިރު ދުވަހުގެރޭ 08:30 އިން 10:00 އަށެވެ. ވެބިނާގާއި ރައީސުލްޖުމްހޫރިއްޔާގެ އަނބިކަނބަލުން ފަޒްނާ އަހުމަދު، އެމްއާރްސީގެ ސެކެރެޓަރީ ޖެނެރަލް ފާތިމަތު ހިިމްޔާ، ޔުނިސެފް މޯލްޑިވްސްގެ ޕްރޮގްރާމް ސްޕެޝަލިސްޓު ޝަހުލާ އަހުމަދު، ރައީސް އޮފީހުގެ އަންޑަ ސެކެރެޓަރީ ޑރ. އަބްދުލް މަލިކް އަދި އައިޖީއެމްއެޗްގެ ސެންޓަ ފޯ މެންޓަލް ހެލްތްގެ ހެޑް ޑރ. ޝަނޫހަ މަންސޫރުގެ އިތުރުން އެޗްޕީއޭގެ ޑިރެކްޓާ އައިމިނަތު ޝަހުޒާ ބައިވެރިވެވަޑައިގަންނަވާނެއެވެ.
އެމްްއާރްސީން ބުނީ، މި ވެބިނަރގައި މައިގަނޑު ގޮތެއްގައި ބައިވެރިންގެ މެދުގައި މަޝްވަރާ ކުރަން ހަމަޖެހިފައިވަނީ، ނަފްސާނީ ދުޅަހެޔޮ ކަމަށް ދިމާވާ މައްސަލަތަކުގައި އަމިއްލަ ފަރުދީ ހައިސިއްޔަތުން ކުރެވިދާނެ މަސައްކަތާއި، ޕޮލިސީ ލެވެލްގައި ކުރެވޭނެ ކަންތައްތަކުގެ މައްޗަށް ކަމަށެވެ.
