ޑިޕާޓްމެންޓް އޮފް ޖުޑިޝަލް އެޑްމިނިސްޓްރޭޝަން (ޑީޖޭއޭ) ޖުޑިޝަލް ސާވިސް ކޮމިޝަން (ޖޭއެސްސީ) ގެ ދަށަށް ބަދަލުކުރުމުން ރަނގަޅު ނަތީޖާތަކެއް ފެންނަމުންދާ ކަމަށް ފޮނަދޫ ދާއިރާގެ މެމްބަރ މޫސާ ސިރާޖު ވިދާޅުވެއްޖެއެވެ.
ކުރިން ޑީޖޭއޭ ހިނގަމުން އައީ ސުޕްރީމް ކޯޓުގެ ދަށުންނެވެ. ނަމަވެސް 19 ވަނަ ރައްޔިތުންގެ މަޖިލީހުން ޖުޑީޝަރީ އިސްލާހުކުރުމަށް ކުރަމުންދާ މަސައްކަތުގެ ތެރެއިން ޑީޖޭއޭ ޖޭއެސްސީގެ ދަށަށް ބަދަލުކުރުމަށް ވަނީ ޤާނޫނަށް އެބަދަލު ގެނެސްފައެވެ. އެ އިސްލާހު މަޖިލީހަށް ހުށަހެޅުއްވީވެސް ފޮނަދޫ ދާއިރާގެ މެމްބަރ މޫސާ ސިރާޖެވެ.
ރާއްޖެ ޓީވީގެ "ފަލަސުރުޚީ" ޕްރޮގްރާމްގައި މިބަދަލުގެ ނަތީޖާ ރަނގަޅުތޯ ކުރެވުނު ސުވާލަށް ޖަވާބުދެއްވަމުން ސިރާޖު ވިދާޅުވީ ކުރިޔަށްވުރެ މާބޮޑަށްވެސް ނަތީޖާ ރަނގަޅުކަަމަށް ދެކެވަޑައިގަންނަވާ ކަމަށެވެ. އޭރު ޑީޖޭއޭ ސުޕްރީމް ކޯޓުގެ ބެލުމުގެ ދަށަށް އެކޯޓުގެ ފަނޑިޔާރުން ގެންދިޔައީ ޤާނޫނު އަސާސީއާ ޚިލާފަށް ކަމަށް މޫސާ ސިރާޖު ވިދާޅުވިއެވެ. ސިރާޖު ވިދާޅުވީ މިހާރު އޮތް ސުޕްރީމް ކޯޓަކީ އޭރު އޮތް ސުޕްރީމް ކޯޓާއި ޚިލާފަށް ޤާނޫނު އަސާސީގެ ބެލެނިވެރިކަމަށް ދައުވާ ކުރާ ބަޔެއް ނޫންކަމަށެވެ.
މައްސަލަ ޖެހުނު ހިސާބަކީވެސް އެއީ. ސްޕްރީމްކޯޓަށް އޭރުގައި ހީވީ މުޅި ދިވެހި ގައުމުގެ އެންމެ ބޮޑުތަނަކީ ސްޕްރީމް ކޯޓޭ. އެހެނެއްނޫން. ދިވެހި ދައުލަތް ހިނގާނީ ޤާނޫނު އަސާސީގައި އެދެވިފައިވާ ބާރެއް އެ ދެވިފައިވާ ހިސާބަކަށް. އެކަން މިހާރު އޮތް ސްޕްރީމް ކޯޓަށް ގަބޫލުކުރޭ. އެހެންވީމާ ޑީޖޭއޭ ބަދަލުކުރުމަށް ޤަނޫނަށް ގެނައި ބަދަލާއެކު އިދާރީ ގޮތުން ހިންގުން ރަނގަޅުކަމަށް ފެނޭ. ބައެއް ކަންބޮޑުވުންތައް ފުރަތަމަ ފަށައިގަންނައިރު އައިސްދާނެ. އެހެންނަމަވެސް ކުރިޔަށްވުރެ މާބޮޑަށް އިދާރީ ގޮތުން ފަސޭހަވެ މިނިވަން ކަމާއެކީގައި މަސައްކަތްކުރަން ފެށީމާ ފަނޑިޔާރުންނަކީ އިދާރީ ގޮތުން ހިންގަންޖެހޭ ބައެއް ނޫންކަން އެނގޭނެ.ފޮނަދޫ ދާއިރާގެ މެމްބަރ މޫސާ ސިރާޖު
ސިރާޖު ވިދާޅުވީ އެމްޑީޕީން ޖުޑީޝަރީ އިސްލާހުކުރުމަށް ވީ ވައުދުގެ ދަށުން ކުރެވެމުންދާ މަސައްކަތްތަކުގެ ރަނގަޅު ނަތީޖާތަކެއް ފެންނަމުންދާ ކަމަށެވެ. އެ ވައުދު ދަނީ ފުއްދެމުން ކަމަށް ގަބޫލުކުރައްވާ ކަމަށްވެސް ސިރާޖު ވިދާޅުވިއެވެ.
