ފަތުރުވެރިކަމަށް ހާއްސަކޮށްގެން އިންޝްއެރަންސް ޕެކޭޖްއެއް ލޯންޗްކޮށްފި އެވެ.
މިނިސްޓްރީ އޮފް ޓްރަރިޒަމް އާއި އެލައިޑް އިންޝްއެރެންސް ގުޅިގެން މި ޕެކޭޖް ލޯންޗްކޮށްފައިވަނީ ބުރާސްފަތި ދުވަހު ބޭއްވި ވާރޗުލްކޮށް ބޭއްވި ރަސްމިއްޔާތެއްގައެވެ.
އިންޝްއުރެންސް ފޯ ޓުއަރޒިމްގެ ނަމުގައި ލޯންޗް ކުރި މި ޕެކޭޖްގައި 2 ޕޮލިސީއެއް ހިމެނެއެވެ. އެއީ އެލައިޑް އިންބައުންޑް އަދި އެލައިޑް އިންބައުޑް ޕްލަސް އެވެ.
މި ރަސްމިއްޔާތުގައި ވާހަކަ ދައްވަމުން ޓުއަރިޒަމް މިނިސްޓަރ ޑރ. އަބްދުﷲ މައުސޫމް ވިދާޅުވީ މިއަދަކީ ވަރަށް އުފާވެރި ދުވަހެއް ކަމަށާއި 15 ޖުލައިގައި ބޯޑަރު ހުޅުވާލިއިރު އެންމެ ބޮޑު ގޮންޖެހުމަކަށް ދިމާވެފައިވަނީ ފަތުރުވެރިންނަށް ހާއްސަ މިފަދަ އިންޝްއަރެންސް ޕެކޭޖެއް ޤާއިމްވެފައި ނެތުމުން ކަމަށެވެ. އެހެންނަމަވެސް އެލައިޑުން ކުރިއަށް މިގެންދިޔަ މަސައްކަތް ފާހަގަކޮށް އެކުންފުންޏަށް މިނިސްޓަރ ވަނީ ޝުކުރު އަދާކުރައްވާފައެވެ.
15 ޖުލައިގައި ބޯޑަރުތައް ހުޅުވާލީ ވަރަށް ބޮޑު ޗެލެންޖަކާއި އެކު ކަން ފާހަގަކުރައްވަމުން މިނިސްޓަރު ވިދާޅުވީ އެއީ ރައީސުލްޖުމްހޫރިއްޔާ އިބްރާހިމް މުހައްމަދު ސޯލިޚް ނެންގެވި ވަރަށް ހިތްވަރު ގަދަ ނިންމެވުމަށެވެ. އަދި ކޮވިޑްގެ މިދަނޑިވަޅުގައި ފަތުރުވެރިން ރާއްޖެއަށް ޒިޔާރަތް ކުރަމުންދާއިރު، މިއީ ސޭފް ޑެސްޓިނޭޝަނެއްކަން ދުނިޔޭގެ ގައުމުތަކުން ޤަބޫލު ކުރަމުންދާ ކަމަށެވެ.
މިނިސްޓަރ ވިދާޅުވީ ކުރިން އޮތް ގޮތުން ނަމަ ޓުއަރިސްޓުންނަށް ދިމާވާ ކަންކަމުގެ ޒިންމާ ނަގަން ޖެހިފައި އޮންނަނީ އެ ޓުއަރިސްޓް ފެސިލިޓީއަކުން ކަމަށާއި އެހެންނަމަވެސް މިފަދަ އިންޝުއަރެންސެއް އައުމަކީ ރިސޯޓް، ގެސްޓްހައުސް އަދި ސަފާރީތަކަށް ލިބިގެންދާނެ ވަރަށް ބޮޑު ކުރިއެރުމެއް ކަމަށެވެ.
އެހެންކަމުން ފަތުރުވެރިން ބުކިން ހަދާއިރު އިންޝްއަރެންސް ނެގުން ބުއްދިވެރިކަމަށް އެފަރާތްތަކަށް ބުނެދިނުމާއި މި އިންޝްއަރެންސްގެ މުހިއްމުކަން އެފަރާތްތަކަށް ކިޔައިދިނުމަށް މިނިސްޓަރ އިލްތިމާސްކުރެއްވި އެވެ.
މިރަސްމިއްޔާތުގައި އެލައިޑު އިންޝްއަރެންސްގެ މެނޭޖިން ޑިރެކްޓަރ މުހައްމަދު ޝަފާޒް ވިދާޅުވީ ކޮވިޑްގެ މިދަނޑިވަޅުގައި ފަތުރުވެރިންނަށް ހާއްސަކޮށްގެން ކޮވިޑް ކަވަރު ކުރާ އިންޝްއުރެންސް ޕްލޭންއެއް ތަޢާރަފް ވެގެންދިއުމަކީ ފަތުރުވެރިކަމުގެ ދާއިރާ އިތުރަށް ކުރިއަރައިގެންދާނެ ކަމެއް ކަމަށެވެ.
ރާއްޖެއަށް އަންނަ ފަތުރުވެރިންނަށް ދިމާވާ އެންމެ ބޮޑު ގޮންޖެހުމަކީ ޕޮޒިޓިވް ވެއްޖެ ނަމަ އެފަރާތްތަކުން އަމިއްލަ ހަރަދުގެ މެޑިކަލް ކަންކަން ހަމަޖެއްސުން ކަމަށްވާއިރު އަލަށް ތަޢާރަފްކުރި ޕެކޭޖްގެ ތެރެއިން މެޑިކަލް އިމަރޖެންސީ އަދި ކޮވިޑަށް ޕޮޒިޓިވްވެއްޖެ ނަމަ ފެސިލިޓީތަކަށް ގެންދިއުމަށް ދާ ޓްރާންސްޕޯޓް ހަރަދާއި އައިސޮލޭޝަން ފެސިލިޓީއަށްދާ ހަރަދުވެސް ކަވަރ ކުރާނެ ކަމަށް ޝަފާޒް ވިދާޅުވި އެވެ.
ޓުއަރިސްޓުންނަށް މި ޕެކޭޖްތައް ނެގޭނީ ރާއްޖެ އައުމުގެ ކުރިން ކަމަށާއި އެގޮތުން އެލައިޑުގެ ވެބްސައިޓުންނާއި އަދި ބޭރުގެ ވަރަށް ގިނަ ވެބްސައިޓުތަކުން ލިންކު ފެންނަން ހުންނާނެ އެވެ.
