ސައުދީ އަރަބިއާގައި އަންހެން ދަރިފުޅު ގައިގައި ތެޅި ބައްޕައަކު ހައްޔަރުކޮށްފި
8 އޮކްޓޯބަރު 2020 | ބުރާސްފަތި 00:51އޭނާ ހައްޔަރުކުރީ އެ ކުއްޖާ ގައިގައި ތަޅާ ވީޑިއޯ ސޯޝަލްމީޑިއާގައި ވައިރަލްވެފައި ވަނިކޮށް
ސައުދީ އަރަބިއާގެ މަގެއްގެ މަތީގައި ފުލުހުންތަކެއް ހަރަކާތްތެރިވަނީ
ސައުދީ އަރަބިއްޔާގެ މައްކާއިން، އަންހެން ދަރިފުޅުގެ ގައިގައި ތެޅި ބައްޕައަކު ހައްޔަރުކޮށްފިއެވެ.
އަރަބް ނިއުސްގައި ރިޕޯޓްކޮށްފައިވާ ގޮތުން އެ މީހާ ހައްޔަރުކޮށްފައި ވަނީ އޭނާގެ އަންހެން ދަރިފުޅު ގައިގައި ތަޅާ ވީޑިއޯ ސޯޝަލް މީޑިއާގައި ވައިރަލްވެފައި ވަނިކޮށެވެ. މައްކާ ފުލުހުންގެ ތަރުޖަމާނާ ހަވާލާދީ މީޑިއާތަކުން ރިޕޯޓްކޮށްފައިވާ ގޮތުގައި، މި ވީޑިއޯ ސޯޝަލް މީޑިއާއަށް އަޕްލޯޑް ކުރީވެސް އެ 40 އަހަރުގެ ފިރިހެން މީހާއެވެ.
ގާތްގަނޑަކަށް ދެ މިނެޓާއި 19 ސިކުންތުގެ ވީޑިއޯއިން ފެންނަ ގޮތުގައި އަންހެން ދަރިފުޅަށް ބައްޕަ އަނިޔާ ކުރަމުން ދިޔަ އިރު، އޭނާ އޮތީ ބިންމައްޗަށް ވެއްޓިފައެވެ. އަދި އެ ކުއްޖާ ހަރުގަނޑެއްގައި އެއްސުމަށްފަހު، ޗާބޫކުން އޭނާގެ ގައިގައި ތަޅާ މަންޒަރު ފެނެއެވެ.
އަނިޔާ ނުކުރުމަށް އެދި އެ ކުއްޖާ ބައްޕަ ގާތު އާދޭސް ކުރާ މަންޒަރުވެސް ވީޑިއޯ އިން ފެނިގެންދެއެވެ. މައްކާ ފުލުހުން މައުލޫމާތުދޭ ގޮތުގައި އެ މީހާ ހައްޔަރުކޮށް، މައްސަލަ ތަހުގީގުކުރުމަށްފަހު މިހާރު ވަނީ ދައުވާކުރަން ފޮނުވާފައެވެ.
