ޗައިނާ އާއި ރާއްޖެއާ ދެމެދު ރައީސް އަބްދުﷲ ޔާމީންގެ ސަރުކާރުގައި ސޮއިކޮށްފައިވާ ފްރީ ޓްރޭޑް އެގްރިމަންޓުން މިހާތަނަށް ބެލިބެލުމުން މަސްވެރިންނަށް މާބޮޑު ފައިދާއެއް ނުވާކަމަށް ފާހަގަވާ ކަމަށް ފިނޭންސް މިނިސްޓަރު އިބްރާހިމް އަމީރު ވިދާޅުވެއްޖެ އެވެ.
ރައްޔިތުންގެ މަޖިލީހުގެ ބުދަ ދުވަހުގެ ޖަލްސާގައި ކާށިދޫ ދާއިރާގެ މެމްބަރ އަބްދުﷲ ޖާބިރު ފިނޭންސް މިނިސްޓަރ އިބްރާހީމް އަމީރާއި ސުވާލު ކުރައްވަމުން ދިވެހި ސަރުކާރާއި ޗައިނާ އާ ދެމެދު ހަދާފައިވާ ފްރީ ޓްރޭޑް އެގްރިމެންޓްގެ ދަށުން ދިވެހި މަސްވެރިންނަށް ލިބެން ޖެހޭ މަންފާތައް ހިފަހައްޓާފައިވާ ކަމަށް ވިދާޅުވިއެވެ. އެއަަށް ޖަވާބު ދެއްވަމުން ފިނޭންސް މިނިސްޓަރ ވިދާޅުވީ މިވަގުތު ހިނގަމުންދާ ފްރީ ޓްރޭޑް އެގްރިމެންޓެއް އޮތް ކަމަށް އެމަނިކުފާނު ދެކެވަޑައިނުގަންނަވާ ކަމަށެވެ.
އެއީ މިހާރު ފްރީ ޓްރޭޑް އެގްރިމެންޓެއްގައި ސޮއިކޮށްފައި އޮތަސް އެއަށް އަމަލު ކުރަމުން ދާނީ އެކަމާއި ގުޅޭ ޤާނޫނުތައް ރައްޔިތުންގެ މަޖިލީހުން ހަދައިގެން ކަމަށްވާތީ ކަމަށް މިނިސްޓަރ ވިދާޅުވި އެވެ.
މިހާރު އެފްޓީއޭގައި ސޮއިކޮށްފައި އޮތަސް އެ އޮޕަރޭޝަނަލައިޒް ވާނީ މިމަޖިލީހުން އިތުރު ގުޅޭ ޤާނޫނުތަކެއް ހަދައިގެން. އެއީ މަޖިލީހުގެ ޒިންމާއެއް. އަދި މިހާތަނަށް ބެލިބެލުމުގައި މަސްވެރިންނަށް މިއެފްޓީއޭގެ ދަށުން މާބޮޑު ފައިދާއެއް ނުވާކަން ފާހަގަވޭ.ފިނޭންސް މިނިސްޓަރ އިބްރާހީމް އަމީރު
މިނިިސްޓަރުގެ ޖަވާބުތަކާ ގުޅިގެން މެމްބަރު ޖާބިރު ވަނީ ތަކުރާރުކޮށް ޗައިނާއާ އެކު ހަދާފައި އޮތް އެއްބަސްވުން ބާތިލު ވީތޯއާ މެދު ސުވާލު އުފައްދަވާފައެވެ، އެކަމާ ގުޅިގެން މިނިސްޓަރު އަމީރު ވިދާޅުވީ ކުރީ ސަރުކާރުން ހަދާފައިވާ އެއްވެސް އެއްބަސްވުމެއް މި ސަރުކާރުން އުވާލާފައި ނުވާ ކަމަށެވެ. އެހެންނަމަވެސް ކުރީ ސަރުކާރުން ގޯސްކޮށްކޮށްފައިވާ ކަންކަން އިސްލާހުކޮށްގެން ކުރިޔަށް ގެންދިޔުމަކީ ސަރުކާރުގެ ސިޔާސަތެއް ކަމަށް މިނިސްޓަރ ވިދާޅުވިއެވެ.
ކުރީ ސަރުކާރުން ކުރިޔަށް ގެންދިޔަ ޕްރޮޖެޖްޓްތައް މިސަރުކާރުގައިވެސް ކުރިޔަށްދާނެ. އެއީ ސަރުކާރުގެ ޕޮލިސީއެއް ނޫން އެއް ސަރުކާރުގައި ހިންގަމުން އަންނަ ޕްރޮޖެޓްތައް ސަރުކާރު ބަދަލުވީމާ ހުއްޓާލައިގެން އެގޮތަށް ކުރިޔަށް ގެންދިޔުން. އެހެންނެއްނޫން ކުރީ ސަރުކާރުން ކޮށްފައި ހުރި ނުރަނގަޅު ކަންތައްތައް އިތުރަށް ބަލާ ދިރާސާކޮށް އެއަށް ކަރެކްޓިވް މެޝަރސް ތައް އަޅަންޖެހޭ ނަމަ އެކަން ކުރަމުން ގެންދާނަން.ފިނޭންސް މިނިސްޓަރ އިބްރާހީމް އަމީރު
ޗައިނާ އާއި ރާއްޖެ އާ ދެެމުދެ ވެފައިވާ އެއްބަސްވުން މިހާރު ނެތް ކަމަށް ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދު ވަނީ ޖަލްސާގައި ވިދާޅުވެފައެވެ. އަދި އެގޮތަށް ވިދާޅުވަނީ އެގްރިމަންޓްގެ އަރޓިކަލް ނަންބަރު 165 ގައި އެގްރިމަންޓް އުފެދޭތާ 30 ދުވަހުގެ ތެރޭގައި ދެ ފަރާތުން އެތެރޭގައި ހުރި އެގްރިމެންޓްތަކާއި ޤާނޫނުތައް ނިންމައި އެ ޤާނޫނުތަކުގެ މައުލޫމާތު ދެ ފަރާތުގެ ދެމެދުގައި ބަދަލުވާން ޖެހޭ ކަމަށް އޮންނައިރު އެކަން އެގޮތަށް ހިނގާފައިނުވާތީ ކަމަށް ރައީސް ނަޝީދު ވިދާޅުވިއެވެ. އެގްރިމަންޓަކަށް ބަދަލު ވެގެންދަނީ އެ މައުލޫމާތުތައް ބަދަލު ކުރުމަށްފަހު ކަމަށް ނަޝީދު ވިދާޅުވިއެވެ.
ޗައިނާ އާއި ރާއްޖެއާ ދެމެދު ސޮއިކޮށްފައިވާ ފްރީ ޓްރޭޑް އެގްރިމަންޓާ އެމްޑީޕީއިން އަބަދުވެސް އަންނަނީ ދެކޮޅު ހަދަމުންނެވެ. އެމްޑީޕީން ބުނަމުން އަންނަނީ އެ އެގްރިމަންޓްގައި ސޮއިކުރީ އަވަސް އަރުވާލައިގެން ބަލަންޖެހޭ ވަރަށް ކަންކަން ނުބަލާ ކަމަށެވެ. އަދި ދެ ގައުމުގެ ބެލެންސް އޮފް ޕޭމަންޓްގައި ބޮޑު ތަފާތެއް ހުރުމުން އޭގެ ގެއްލުން ރާއްޖޭގެ ވިޔަފާރިތަކަށް ވުމުގެ ފުރުސަތު ބޮޑުވާނެ ކަމަށް އެމްޑީޕީން ބުނެއެވެ.
