ކުޅިވަރުތަކަށް ހުއްދަ ދެވޭނީ ފެންނަ ކޭސްތަކުގެ އަދަދަށް ބަލާފައި: ޑރ. ނަޒްލާ

މާލެ ސަރަހައްދުގައި އަޅާފައިވާ ފިޔަވަޅުތަކަށް ލުދިނުމުގެ ތެރެއިން ކުޅިވަރު ހަރަކާތްތަކަށް ހުއްދަ ދެވޭނީ ފެންނަ ކޭސްތަކުގެ އަދަދަށް ބެލުމަށްފަހުގައި ކަމަށް ހެލްތު އެމަޖެންސީ އޮޕަރޭޝަން ސެންޓަރު (އެޗްއީއޯސީ) އިން ބުނެފިއެވެ.

ހޯމަ ދުވަހުގެރޭ ބޭއްވި ނޫސްވެރިންގެ ބައްދަލުވުމުގައި ނޫސްވެރިއަކު ކުރި ސުވާލަކަށް ޖަވާބުދެއްވަމުން އެ ސެންޓަރުގެ ތަރުޖަމާނު ޑރ. ނަޒްލާ ރަފީގު ވިދާޅުވީ ލުއި ދިނުމުގައި ފުރަތަމަ ކަމަކަށް ބައްލަވާނީ މަޑުމަޑުން ލުއިތައް ދެވޭތޯ ކަމަށާއި، ދެވަނަ ކަމަކަށް ލުއިދޭ އިރު ބަލަނީ އިތުރު ދެ ކަމަކަށް ކަމަށެވެ. އެގޮތުން އެއީ އެ ހަރަކާތެއްގެ ސަބަބުން ރިސްކް އޮތް މިންވަރާއި އަދި ދިރިއުޅުމުގެ ޒަރޫރީ ބޭނުންތަކަށް އެކަމުގެ ސަބަބުން ކުރާ އަސަރުތަކަށް ކަމަށް ޑރ. ނަޒްލާ ވިދާޅުވިއެވެ.

ޑރ. ނަޒްލާ ވިދާޅުވީ ދެން ކުރިއަށް އޮތްތަނުގައި ކޭސްތައް ދައްވަމުންދާ ވަރަކަށް ބަލާފައި އިތުރަށް އެހެނިހެން ފިޔަވަޅުތަކަށް ލުއިދޭން ނިންމާނެ ކަމަށެވެ. ހާއްސަކޮށް ކޮންޓެކްޓް ސްޕޯޓްސްއަކީ ވަރަށް ބޮޑަށް ގާތްގޯޅިވެގެން ކުޅޭ ކުޅިވަރުތަކެއް ކަމުން، ކުޅިވަރުތައް ކުޅޭ އިރު މާސްކް ނޭޅުމާއި، ގައިދުރުކަން ނުބެހެއްޓޭނެ ކަމަށެވެ. މިކަމުގެ ސަބަބުން ވައިރަސް ހުރި މީހަކު ކަމުގައިވާނަމަ އެހެންމީހުންނަށް ބަލި ފެތުރުމުގެ ފުރުސަތު މިފަދަ ކުޅިވަރުތަކުގައި ބޮޑުވާނެ ކަމަށް ނަޒްލާ ވިދާޅުވިއެވެ.

ޑރ. ނަޒްލާ ވިދާޅުވީ ކޮންޓެކްޓް ސްޕޯޓިންނަށް ހުއްދަ ދިނުމަކީ މި ދަނޑިވަޅަށް ބަލާއިރު، ރިސްކް ބޮޑު ކަމެއް ކަމަށާއި، އެހެންކަމުން މިކަމުގައި އިތުރަށް ބަލަންޖެހޭ ކަންކަން އެބަހުރި ކަމަށެވެ.

ޑރ. ނަޒްލާ މިހެން ވިދާޅުވިއިރު، ފުރަތަމަ ޑިވިޝަނުގެ ކުލަބުތަކުން ފަރިތަކުރުންތައް ނުފެށި ލަސްވާތީ އަންނަނީ ކަންބޮޑުވުން ފާޅުކުރަމުންނެވެ. އަދި ކޮވިޑް-19 އާ ގުޅިގެން އެފްއޭ ކަޕްގެ އެއްބައި ކުޅުމަށްފަހު މިދިޔަ ސީޒަން ކެންސަލް ކުރިއިރު، އައު ސީޒަން އަންނަ ޑިސެމްބަރު މަހު ފަށަން ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) އިން އަންނަނީ މަސައްކަތް ކުރަމުންނެވެ.