ދަރަނި ދެއްކުން މަޑުޖައްސާލުމަށް ޖީ-20 އިން ނިންމާފައިވާ މުއްދަތު އިތުރު ކުރުމަށް ޝާހިދު ގޮވާލައްވައިފި
6 އޮކްޓޯބަރު 2020 | އަންގާރަ 07:42ހުރިހާ ގައުމަކަށް އެއްވަރަކަށް ގެއްލުން ލިބުނޭ ދެންނެވޭކަށް ނެތް ކަމަށް މިނިސްޓަރު ވިދާޅުވި
ފޮރިން މިނިސްޓަރު އަބްދުﷲ ޝާހިދު
ދުނިޔޭގެ އެންމެ ކުރިއަރާފައިވާ ގައުމުތައް ކަމަށްވާ ޖީ-20 ގައުމުތަކުން ކުދި އަދި ކުރިއަރަމުން އަންނަ އިގްތިސާދުތަކުން އެ ގައުމުތަކަށް ދައްކަން ޖެހޭ ދަރަނި ދެއްކުން މިއަހަރުގެ ނިޔަލަށް މަޑުޖައްސާލަން ނިންމާފައިވާ ނިންމުން މުރާޖައާ ކުރުމަށް ފޮރިން މިނިސްޓަރ އަބްދުﷲ ޝާހިދު ގޮވާލައްވައިފިއެވެ.
ނިމިދިޔަ ހަފްތާގައި އދގެ އައްމު މަޖިލީހުގެ 75 ވަނަ ސެޝަން ގައި ތަގުރީރު ކުރައްވަމުން މިނިސްޓަރ ޝާހިދު ވިދާޅުވީ، ކޮވިޑް-19 ގެ އަސަރު އެކި ގައުމުތަކަށް އެކި މިންވަރަށް ކުރުމާއި ޓެކްނޮލޮޖީގެ ރޮނގުން ގައުމުތަކުގެ މެދުގައިވާ ފަރަގު، ދަތުރުފަތުރު ހުއްޓުމަކަށް އައުމުން އިގްތިޞާދަށް ލިބުނު ގެއްލުންތަކަކީ، ދުނިޔޭގެ ނާރެހުން ކޮންމެ ދިމާލަކަށް ނަޒަރު ހިންގާލިޔަސް، މިއަދު ކުރިމަތިލާންޖެހިފައިވާ ހަގީގަތް ކަމަށާއި، ނަމަވެސް، މިއީ ހުރިހާ ގައުމަކަށް އެއްވަރަކަށް ލިބުނު ގެއްލުންތަކެކޭ ދެންނެވޭކަށް ނެތް ކަމަށެވެ.
އަދި ޖީ-20 ގައުމުތަކުން އެގައުމުތަކަށް އެހެން ގައުމުތަކުން ދައްކަން ޖެހޭ ދަރަނި ނެގުން ވަގުތީ ގޮތުން ހުއްޓާލުމަށް ނިންމެވި ނިންމެވުމަށް ޝުކުރު އަދާކުރައްވަމުން ޝާހިދު ވިދާޅުވީ މިއަހަރުގެ ޑިސެމްބަރު މަހުގެ 31 ވަނަ ދުވަހާ އަންނަ އަހަރުގެ ޖެނުއަރީ މަހުގެ އެއް ވަނަ ދުވަހާ ހުރި ހަމައެކަނި ފަރަގަކީ ތާރީހު ކަމަށާއި، އިގްތިސާދީ ހާލަތަށް ބަދަލެއް ނާންނާނެ ކަމަށެވެ. އެހެންކަމުން ލޯނުތަކާ ދަރަނި ދެއްކުން އަންނަ އަހަރުގެ ނިޔަލަށް ފަސްކޮށްދެވުމަށް، ޝާހިދު ދުނިޔޭގެ ކުރިއަރާފައިވާ ގައުމުތަކަށް ގޮވާލެއްވިއެވެ.
އިތުރަށް ވާހަކަ ދައްކަވަމުން ޝާހިދު ވިދާޅުވީ ދަރަނި ދެއްކުން ވަގުތީ ގޮތުން ހުއްޓާލުމަކީ، ތަރައްޤީވަމުން އަންނަ ކުދި ޖަޒީރާ ގައުމުތަކަށް ކޮވިޑް-19 ގެ ސަބަބުން ލިބޭ ގެއްލުންތަކަށް ކުޑަ ކުރުމަށް ކުރެވޭ މަސައްކަތުގެ ކުޑަ މިންވަރެއް ކަމަށާއި، މިއަދު އެންމެ ބޮޑަށް ބޭނުންޖެހިފައި މިވަނީ ފަސޭހައިން ލިބޭ މާލީ އެހީތެރި ކަމަށް ކަމަށެވެ.
އަދި، ރާއްޖެ ފަދަ ޖަޒީރާތަކުގެ ނާޒުކު ކަމުގެ ސަބަބުން ދިމާވާ ގޮންޖެހުންތައް ފަސޭހަކަމާއެކު ދެނެގަނެވޭނެ ނިޒާމެއް ގާއިމު ކުރުމުން އެ މައްސަލަތަކަށް ހައްލުކުރުމަށް ބޭނުންވާ ހާއްސަ ފިޔަވަޅުތަކެއް ކަނޑައެޅިގެންދާނެ ކަމަށް ވެސް ޝާހިދު ވިދާޅުވިއެވެ.
ކުރިއަރަމުން އަންނަ އިގްތިސާދުތަކުން އެ ގައުމުތަކަށް ދައްކަން ޖެހޭ ދަރަނި ދެއްކުން މިއަހަރުގެ ނިޔަލަށް މަޑުޖައްސާލަން ނިންމާފައިވާ ނިންމުން މުރާޖައާ ކޮށްދެއްވުމަށް ޝާހިދު ވިދާޅުވެފައިވާއިރު، ކޮވިޑް-19 ގެ ސަބަބުން ރާއްޖޭގެ އިގްތިސާދަށް ވެސް ވަނީ ވަރަށް ބޮޑަށް އޭގެ އަސަރު ކޮށްފައެވެ. އިގްތިސާދީ ގޮތުން އަރައި ގަންނަން ބޭރުގެ ގައުމުތަކުގެ އެހީ ހޯއްދަވަން ޝާހިދު ގެންދަވަނީ ގިނަ މަސައްކަތްތަކެއް ކުރައްވަމުންނެވެ.
