ޑރ ވަހީދު ބޭނުން ކޮށްގެން ޕީޕީއެމް އިން ބަޣާވާތެއް ގެންނަން އުޅޭ ކަމުގެ އިޝާރާތެއް
ކަންތައް ދިމާވީމާ ނުވަތަ ހާދިސާއެއް ހިނގީމާ ދެން ޕޮލިސް އިމިޔުނިޓީއޭ ނުވަތަ އެއީ ބަޣާވާތެކޭ ޑރ ވަހީދަކީ މިވެނި މީހެކޭ ދެއްކުމުގެ ފުރުސަތެއް ނޯންނާނެ
މަހިބަދޫ ދާއިރާގެ މެމްބަރ އަހުމަދު ތާރިގް
މިހާރުގެ ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު ގައުމުގެ މިސްރާބު މިހާރު މިގެންދަވާ ގޮތް ބަދަލުނުކޮށްފިނަމަ މިދައުރުގެ ތެރޭގައި ނުރައްކާތެރި ކަންތައްތަކެއް ފެންމަތިވެދާނެ ކަމަށާއި އެހެންކަމުން އެކަން ރައީސްގެ ސަމާލު ކަމަށް ގެންނަ ކަމަށް މަހިބަދޫ ދާއިރާގެ މެމްބަރ ޕީޕީއެމް މެމްބަރު އަހުމަދު ތާރިޤް ވިދާޅުވެއްޖެ އެވެ.
ރައްޔިތުންގެ މަޖިލީހުގެ ހޯމަ ދުވަހުގެ ޖަލްސާގައި ޤާނޫނުލް އުގޫބާތަށް އިސްލާހު ގެނައުމުގެ ބިލްގެ ބަހުސް މަރުހަލާގައި ވާހަކަ ދައްކަވަމުން ތާރިގް ވިދާޅުވީ އެފަދަ ކަމެއް ދިމާވުމުން ދެން ވަކިކަމަކާއި މަތިކޮށް ވާހަކަ ދެއްކުމުގެ ފުރުސަތު ނޯންނާނެ ކަމަށެވެ.
ތާރިގް މިމޭރުމުން ވާހަކަދައްކަވަން ފެއްޓުވުމުން ބިލެތްދޫ ދާއިރާގެ އެމްޑީޕީ މެމްބަރ އަހުމަދު ހަލީމު ވަނީ ހަގީގަތުގައި މިހާރު މިއިވެނީ ބިރު ވެރި ވާހަކަތަކެއް ކަމަށާއި ޕީޕީއެމުން ޑރ ވަހީދު ލައްވާ އަނެއް ބަޣާވާތް ރާވަމުން ދަނީ ކަމަށް ވިދާޅުވެފައެވެ.
ހަލީމު ނިޒާމީ މައްސަލަ ނަންގަވާ މިމޭރުމުން ވާހަކަ ދެއްކެވުމުން ތާރިގް ވާހަކަދައްކަވަމުން ވިދާޅުވީ ޕީޕީއެމްގެ ފަރާތުން ބަޣާވާތެއް ނުކުރާނެ ކަމަށެވެ. ޕީޕީއެމް އަކީ ޤާނޫނުތަކުގެ ތެރެއިން ކަންތައްތައް ކުރާނެ ޕާޓީއެއް ކަމަށާއި އޮތް ހަމައެކަނި ކަންބޮޑުވުމަކީ ޤައުމުގެ މިސްރާބު މިހާރު މިދަނީ ބޮޑު ގައުމެއްގެ އަތް ދަށަށް ކަމަށްވުމުން ކަމަށެވެ. އެހެންކަމުން އެ މިސްރާބު ބަދަލު ކުރުމަށް ރައީސަށް ގޮވާލާ ކަމަށް ތާރިގް ވިދާޅުވިއެވެ.
ތާރިގްގެ ވާހަކައިގައި ވަނީ އިންޑިޔާ އިން ރާއްޖޭގައި އެގައުމުން ބޭނުންވާ ގޮތަށް ކަންތައްތައް ކުރަމުންދާ ކަމަށް ވިދާޅުވެ ސީރިޔަސް ތުހުމަތުތަކެއް ކުރައްވާފައެވެ. އޭގެތެރޭގައި ޤައުމީ ސަލާމަތާއި ގުޅޭ ވާހަކަތައްވެސް ތާރިގް ވަނީ ދައްކަވާފައެވެ.
އަދި އެގޮތަށް ކަންތައް ހިނގާނަމަ ސިފައިންނާއި ރައީސް އާ ބައްދަލުވުންތަކެއް ހިނގާނެ ކަމަށް ތަކުރާރުކޮށް ތާރިގް ވަނީ ވިދާޅުވެފައެވެ.
ރާއްޖޭގައި އެންމެ ފުރަތަމަ ގިނަ ޕާޓީތައް އެކުލެވިގެން ބޭއްވި ރިޔާސީ އިންތިޚާބުން ވެރިކަމަށް ވަޑައިގެންނެވި ރައީސް މުހައްމަދު ނަޝީދުގެ ވެރިކަން ނިމުމަކަށް ގެނެސްފައިވަނީ ސިފައިންނާއި ފުލުހުން ގުޅިގެން ކުރިޔަށްގެންދިޔަ މުޒާހަރާތަކަށްފަހު އެވެ. އެއަށްފަހު ވެރިކަމަށް ވަޑައިގެންނެވީ ރައީސް ނަޝީދުގެ ނައިބު ރައީސަަކަށް ހުންނެވި ޑރ މުހައްމަދު ވަހީދު ހަސަން މަނިކެވެ. ޑރ ވަހީދު މިވަގުތު ހުންނެވީ ޕީޕީއެމްގެ އެޑްވައިޒަރުކަމުގެ މަގާމުގައެވެ.
