ފިލްމީތަރި ޔުނާންގެ ދެމަފިރިން ފުލުހުންގެ ބެލުމުގެ ދަށަށް ގެންގޮސްފި
ފުލުހުންގެ ބެލުމުގެ ދަށަށް ގެންދެވުނީ ކޮން ސަބަބަކީ ހުރެކަން މިހާތަނަށް ސާފެއް ނުވޭ
ީޔުނާން ހައްޔަރު ކުރުމަށް ގޮވާލާ ބަޔަކު ކުރި މުޒާހަރާގެ ތެރެއިން
ފިލްމީތަރި މުހައްމަދު ޔުނާން އާއި އޭނާގެ އަންހެނުން ރިހުލާ ފުލުހުންގެ ބެލުމުގެ ދަށަށް ގެންގޮސްފިއެވެ.
ރާއްޖެއެމްވީ އަށް މައުލޫމާތު ލިބިފައިވާ ގޮތުގައި، މި ދެމަފިރިން ހައްޔަރުކުރުމަށް ގޮވާލާ އާދިއްތަ ދުވަހު ހަވީރު ހުޅުމާލޭގައި މުޒާހަރާވެސް ކޮށްފައި ވެއެވެ. މުޒާހަރާގެ ބައިވެރިން ޔުނާން މެން ދިރިއުޅެމުންދާ ގޭ ދޮށުގައި އަޑުއުފުލަން ތިބިއިރު، އެ ސަރަހައްދުގައި ފުލުހުންވެސް ވަނީ ހަރަކާތްތެރިވެފައެވެ.
އެ ސަރަހައްދުގައި ހުރި މީހަކު މައުލޫމާތު ދެމުން ބުނެފައިވަނީ، މުޒާހަރާ ކުރަމުން ގެންދަނީ ޔުނާން އޭނާގެ އާއިލާ ގުޅުން އޮންނަ ކުދިންތަކަކަށް ޖިންސީ ގޯނާކުރި މައްސަލައެއްގައި ކަމަށެވެ. މައުލޫމާތު ލިބިފައިވާ ގޮތުގައި އެމައްސަލަ ވަނީ ފުލުހުންގެ ފެމިލީ އެންޑް ޗިލްޑްރަން ޕްރޮޓެކްޝަން ޑިޕާޓްމަންޓަށްވެސް ހުށައަޅާފައެވެ.
ފުލުހުންގެ ވެހިކަލަށް ޔުނާން އާއި އަންހެނުން ރިހުލާ އަރުވައިގެން ގެންދާ ވީޑިއޯއެއްވެސް ރާއްޖެއެމްވީ އަށް ވަނީ ލިބިފައެވެ. މިހާތަނަށް މި މައްސަލައިގައި ފުލުހުން އެއްވެސް މައުލޫމާތެއް ހާމަކޮށްފައެއް ނުވެއެވެ. އަދި އެ މީހުން ފުލުހުންގެ ބެލުމުގެ ދަށަށް ގެންދިޔައީ ކޯޓު އަމުރެއްގެ ދަށުން ހައްޔަރުކޮށްގެންތޯ ނުވަތަ، ރައްކާތެރިކަން ފޯރުކޮށްދިނުމައްތޯ އަދި ސާފެއް ނުވެއެވެ.
