ބްރޯޑްކާސްޓް އަދި ރީބްރޯޑްކާސްޓްކުރުމުގެ ލައިސަންސަށް އެދެމަށް ހުޅުވާލައިފި
4 އޮކްޓޯބަރު 2020 | އާދީއްތަ 14:32ލައިސަންސް ދޫކުރުމަށް ހަމަޖެހިފައިވަނީ ފަސް އަހަރުގެ މުއްދަތަށް
ބްރޯޑްކޮމްއިން ކުރިޔަށް ގެންދިޔަ ބައްދަލުވުމެއްގެ ތެރެއިން
މުޅި ރާއްޖެއަށް ބްރޯޑްކާސްޓް ކުރުމާއި ރީބްރޯޑްކާސްޓްކުރުމުގެ ލައިސަންސަށް އެދި ހުށަހެޅުމުގެ ފުރުސަތު މޯލްޑިވްސް ބްރޯޑްކާސްޓިންގ ކޮމިޝަން (ބްރޯޑްކޮމް) އިން ހުޅުވާލައިފިއެވެ.
ބްރޯޑްކާސްޓިންގ ދުވަސް ފާހަގަކުރުމުގެ ގޮތުން ބްރޯޑްކޮމްއިން ބޭއްވި ނޫސްވެރިންގެ ބައްދަލުވުމުގައި ކޮމިޝަންގެ ރައީސް މަރިޔަމް ވަހީދާ ވިދާޅުވީ ބްރޯޑްކާސްޓް ކުރުމާއި ރީބްރޯޑްކާސްޓްކުރުމަށް ހުޅުވާލަނީ ކޮންއިރަކުންތޯ އެއީ ގިނަ ބަޔަކު ކޮމިޝަނަށް އަމާޒުކޮށް ކުރަމުން އަންނަ ސުވާލެއް ކަމަށެވެ. އެއާއެކު އެފުރުސަތު ހުޅުވާލާފައިވާއިރު ލައިސަންސަށް އެދި ހުށަހެޅުމުގެ ފުރުޞަތު 5 އަހަރުގެ މުއްދަތަށް ވަނީ ހުޅުވާލާފައެވެ.
ރީބްރޯޑްކާސްޓްކުރުމުގެ ލައިސަންސަށާއި ބްރޯޑްކާސްޓް ކުރުމުގެ ލައިސަންސް ދޫކުރުމަށް ބްރޯޑްކޮމްއިން ނިންމާފައިވާ މީޑިޔަމްތަކަކީ ޓެރެސްޓްރިއަލް، ކޭބަލް ނެޓްވާރކް، ސެޓެލައިޓް، މޯބައިލް ނެޓްވާރކް، އިންޓަރނެޓް އަދި ކޮމިޝަނުން ފާސްކޮށްފައިވާ އެހެން މީޑިޔަމްތަކެވެ.
ބްރޯޑްކޮމް އިން ބުނީ ލައިސަންސަށް އެދި ހުށަހަޅާ ފޯރމް ކޮމިޝަނުގެ ވެބްސައިޓް www.broadcom.org.mv އިން ޑައުންލޯޑް ކުރެވެން ހުންނާނެއެވެ. އަދި މި ފޯމު ކޮމިޝަނުގެ ރިސެޕްޝަންއިން ލިބެން ހުންނާނެ ކަމަށްވެސް ބްރޯޑްކޮމްއިން ބުނެއެވެ. މީގެއިތުރުން މީގެކުރިން ކޮމިޝަނުން ދޫކޮށްފައިވާ ދެ ލައިސަންސް އައު ފޯމެޓަށް ބަދަލުކުރުމަށް އެދި ހުށަހެޅުމުގެ ފަހު ތާރީޚަކީ އަންނަ އަހަރުގެ އޭޕްރީލް މަހުގެ 3 ވަނަ ދުވަހުއެވެ. އަދި މިމުއްދަތުގައި އައު ފޯމެޓަށް ލައިސަންސް ބަދަލުކުރަން އެއްވެސް ހަރަދެއް ކުރަން ނުޖެހޭނެ ކަމަށް ބްރޯޑްކޮމް އިން ބުނެއެވެ.
ކޮމިޝަން އުފެދުނީއްސުރެ މިހާތަނަށް 39 ފަރާތަކަށް ބްރޯޑްކާސްޓް ކުރުމުގެ ލައިސަންސް ދީފައިވެއެވެ. އެއީ 11 ރޭޑިޔޯ ޗެނަލް، 28 ޓީވީ ޗެނަލެވެ. މީގެއިތުރުން ރީބްރޯޑްކާސްޓް ކުރުުމުގެ ޚިދުމަތްދޭ 121 ބަޔަކު އުޅޭއިރު މީގެތެރޭގައި މުޅި ރާއްޖޭގައި ރީބްރޯޑްކާސްޓްކުރުުމުގެ ޚިދުމަތްދިނުމަށް 5 ފަރާތަކަށް ވަނީ ލައިސަންސް ދީފައެވެ.
ނޫސްވެރިންގެ ބައްދަލުވުމުގައި މަރިޔަމް ވަހީދާ ވިދާޅުވީ ބްރޯޑްކާސްޓިންގ ދާއިރާ ތަރައްޤީކުރުމަށް ކޮމިޝަނުން އެކިފަރާތްތަކާއެކު މަސައްކަތްކުރަމުންދާ ކަމަށެވެ. އެގޮތުން ދާއިރާގެ މީހުން ތަމްރީން ކުރުމުގެ އެކިއެކި ފުރުސަތުތައް ހޯދުމަށް ކަމާގުޅޭ ދާއިރާތަކާއި މަޝްވަރާކުރަމުންދާ ކަމަށް މަރިޔަމް ވަހީދާ ވިދާޅުވިއެވެ. އަދި ކުރިޔަށް އޮތްތަނުގައި މީޑިޔާގައި މަސައްކަތްކުރާ މީހުން މިދާއިރާއިން އިތުރު ތަމްރީން ހޯދުމަށް ސްކޯލަރޝިޕްތައް ލިބިގެންދާނެ ކަމަށް މަރިޔަމް ވިދާޅުވިއެވެ.
