މެސީ އަކީ ބާސާއަށް ނަމޫނާ ކެޕްޓަނެއް: ކޫމަން

ލިއޮނެލް މެސީ އަކީ ބާސެލޯނާއަށް ނަމޫނާ ކެޕްޓަނެއް ކަމަށް އެ ޓީމުގެ ކޯޗު ނެދަލެންޑްސްގެ ރޮނާލްޑް ކޫމަން ބުނެފިއެވެ.

މި ފަހަރުގެ ޓްރާންސްފާ ބާޒާރުގައި މެސީ ވަނީ ބާސާ ދޫކޮށްލަން ނިންމައި، އެކަން އެ ކުލަބުގެ މެނޭޖުމަންޓަށް އަންގާފައެވެ. ބާސާއާއެކު މެސީ ހަދާފައިވާ އެއްބަސްވުން އަންނަ އަހަރުގެ ހޫނު މޫސުމުގައި ހަމަވަން އޮތްއިރު، މިހާރު އޮތް ގޮތުންނަމަ މި ޓްރާންސްފާ ބާޒާރުގައި މެސީ ގެންދަން ބޭނުންވާ ކުލަބަކުން، އެއްބަސްވުން އުވާލަން 700 މިލިޔަން ޔޫރޯ ދައްކަން ޖެހޭނެއެވެ. އެހެންކަމުން މެސީ ވަނީ އެއްބަސްވުން ބަދަލުކޮށް، މި ޓްރާންސްފާ ބާޒާރުގައި ހިލޭ އެ ކުލަބު ދޫކޮށް ދިޔުމުގެ ފުރުސަތު ތަނަވަސްކޮށްދިނުމަށް އެދެފައެވެ.

އެކަމަކު މެސީގެ އެއްބަސްވުމަށް ލުއި ދިނުމަށް ބާސާގެ މެނޭޖުމަންޓުން އެއްބަސްނުވުމާ ގުޅިގެން، މެސީ ވަނީ އޭނާގެ ނިންމުން ބަދަލުކޮށް މި ސީޒަނުގައި ބާސާގައި މަޑުކުރުމަށް ނިންމާފައެވެ.

މެސީ މީގެ ކުރިން ވަނީ ފާޅުކަން ބޮޑު ގޮތެއްގައި ބާސާގެ ރައީސް ޖޯސެފް މާރިއާ ބާޓޮމެއޫގެ މެނޭޖުމަންޓަށް ފާޑުކީ ނަމަވެސް، ދާދި ފަހުން މެސީ ވަނީ ބާސާ ދޫކޮށްލަން ކުރި މަސައްކަތުގެ ތެރޭގައި ގޯހެއް ހެދިފައިވާނަމަ އެކަމަކަށް ކުލަބު އެންމެންގެ ކިބައިން މާފަށް އެދި، ބާސާއާއެކު ސުލްޙަވެފައެވެ.

ސްޕެނިޝް ލީގުގައި އާދީއްތަ ދުވަހުގެރޭ ސެވިއްޔާއާ ދެކޮޅަށް ބާސާ ކުޅޭ މެޗުގެ ކުރިން އޮތް ނޫސްވެރިންގެ ބައްދަލުވުމުގައި ކޫމަން ބުނީ ޓްރާންސްފާގެ މައްސަލަ ނިމި ފުރަތަމަ ދުވަހުން ފަށައިގެން ޓީމަށާއި ޓީމުގެ ހުރިހާ ކުޅުންތެރިންނަށްވެސް މެސީ އެންމެ ފުރިހަމައަށް އެއްބާރުލުން ދެމުން އަންނަ ކަމަށެވެ. އަދި އެކަން ދަނޑުމަތީގައިވެސް އޭނާ ސާބިތުކޮށްދެމުން އަންނަ ކަމަށާއި، މިހާތަނަށް މެސީއާ މެދު އެއްވެސް ޝަކުވާއެއްވެސް ނެތް ކަމަށްވެސް ކޫމަން ވަނީ ބުނެފައެވެ.

ލީގުގައި ބާސާއިން އެންމެ ފަހުން ކުޅުނު މެޗުގައި ރަށުން ބޭރުގައި ސެލްޓާ އަތުން 3-0 ން މޮޅުވިއިރު، އެ މެޗުގައި މެސީ ވަނީ މޮޅު ކުޅުމެއް ދައްކާފައެވެ. ކޫމަން ބުނީ އެ މެޗުގައި ކެޕްޓަނެއްގެ ދައުރު މެސީ އެންމެ ފުރިހަމައަށް އަދާކުރި ކަމަށާއި، އެއް ކުޅުންތެރިއަކު މަދުކޮށް ކުޅުނުއިރު މުޅި ޓީމަށް އެހީވުމަށް މެސީ ކުރި މަސައްކަތް ފާހަގަކުރާ ކަމަށެވެ. އަދި އޭނާއަށް އަބަދުވެސް ދުނިޔޭގެ އެންމެ މޮޅު ކުޅުންތެރިއަކީ މެސީ ކަމަށާއި، މެސީ އަކީ އެހެން ކެޕްޓަނުންނަށް ނަމޫނާއެއް ކަމަށްވެސް ކޫމަން ވަނީ ބުނެފައެވެ.

މީގެ ކުރިން ސްޕެއިނުގެ ނޫހަކަށް ދިން އިންޓަވިއުއެއްގައި މެސީ ވަނީ އޭނާއާ ބެހޭގޮތުން މީޑިއާގައި ދެކެވޭ އެކި ވާހަކަތަކަށް ނިމުމެން ގެންނަން ބޭނުންވާ ކަމަށް ބުނެފައެވެ. އެގޮތުން އޭނާއަށް ކުށެއް ކުރެވިފައިވާނަމަ އޭގެ ފުރިހަމަ ޒިންމާ ނަގާ ކަމަށާއި، ގޯހެއް ހެދިފައިވާނަމަ އެކަމަށް މާފަށްވެސް އެދޭ ކަމަށްވެސް ބުންޏެވެ. އަދި މެސީ ވަނީ އޭނާގެ ކޮންމެ ނިންމުމެއް ވެސް އަންނާނީ ބާސާއަށް ރަނގަޅަކަށް ކަމަށް ބުނެފައެވެ.

އެއްބަސްވުމާ އެއްގޮތަށް މި ސީޒނުގައި ބާސާގައި މަޑުކުރަން މެސީ ނިންމާފައިވީ ނަމަވެސް، އުމުރުން މިހާރު 33 އަހަރުގެ މެސީގެ އެއްބަސްވުން ހަމަވުމާއެކު، އަންނަ ސީޒަން ނިމުމުން އޭނާ ހިލޭ ޓްރާންސްފާއެއްގެ ދަށުން ކުލަބު ދޫކޮށްލާނެ ކަމަށް ބެލެވެއެވެ.

ބާސާގެ ސީނިއާ ޓީމުން 2004 ވަނަ އަހަރު ކެރިއަރު ފެށި މެސީއަކީ ބާސާގެ ތާރީޚުގައި އެޓީމަށް އެންމެ ގިނަ ލަނޑު ޖަހާދީފައިވާ ކުޅުންތެރިޔާއެވެ. އެގޮތުން މިހާތަނަށް 634 ލަނޑު މެސީ ކާމިޔާބުކޮށްފައިވާއިރު، އޭނާ ވަނީ ބާސާއާއެކު ސްޕެނިޝް ލީގު 10 ފަހަރު ހޯދާފައެވެ. އަދި ޗެމްޕިއަންސް ލީގު ހަތަރު ފަހަރު ހޯދާފައި ވާއިރު، މެސީ ވަނީ މިހާތަނަށް ދުނިޔޭގެ އެންމެ މޮޅު ކުޅުންތެރިޔާއަށްދޭ ބަލޮންޑޯ އެވޯޑް ހަ ފަހަރު ހޯދާފައެވެ. މެސީ އަކީ މި އެވޯޑް އެންމެ ގިނައިން ހޯދި ކުޅުންތެރިޔާއެވެ.