"އައްޑޫ އޮޕަރޭޝަންގައި 80 ކިލޯގެ މަސްތުވާތަކެތި އަތުލައިގެންފައިވޭ، އޮޕަރޭޝަންގައި ބައިވެރިވީ ދިވެހި ފުލުހުން"
4 އޮކްޓޯބަރު 2020 | އާދީއްތަ 07:36އޮޕަރޭޝަން ހިންގީ ޑްރަގް އެންފޯސްމަންޓް ޑިޕާރޓްމަންޓާއި އެހެން ޑިވިޜަންތައް ގުޅިގެން
ޕޮލިސް ކޮމިޝަނަރ މުޙައްމަދު ހަމީދު- ސީޕީ ވަނީ މި އޮޕަރޭޝަންގެ ބައެއް މައުލޫމާތު ޓްވިޓަރ މެދުވެރިކޮށް ހިއްސާ ކުރައްވާފައި
އައްޑޫ ސިޓީގައި ފުލުހުން ހިންގި ޚާއްސަ އޮޕަރޭޝަންގައި 80 ކިލޯގެ މަސްތުވާތަކެތި އަތުލައިގެންފައިވާ ކަމަށް ޕޮލިސް ކޮމިޝަނަރ (ސީޕީ) މުޙައްމަދު ހަމީދު ވިދާޅުވެއްޖެއެވެ.
ހޮނިހިރު ދުވަހު ފުލުހުން ހިންގި މި އޮޕަރޭޝަންގައި ގިނަ އަދަދެއްގެ މަސްތުވާތަކެއްޗާއެކު ބަޔަކު ހައްޔަރުކޮށްފައިވާކަން ހަމީދު ވަނީ ބަޔާން ކުރައްވާފައެވެ. އެގޮތުން މިއީ ފުލުހުންގެ ޑްރަގް އެންފޯސްމަންޓް ޑިޕާރޓްމަންޓާއި، ޑެރަގް އިންޓެލިޖެންސް ޔުނިޓު އަދި ޑިވިޜަނަލް އިންޓެލިޖެންސް ޑިޕާރޓްމަންޓުގެ އިތުރުން، މެރިން ޕޮލިސް އަދި ދެކުނު ފުލުހުން ގުޅިގެން ހިންގި ޚާއްސަ އޮޕަރޭޝަނެއް ކަމަށް އޭނާ ވަނީ ވިދާޅުވެފައެވެ.
އެ މައްސަލައިގެ ފަހުގެ ތަފްސީލުތައް ހިއްސާ ކުރައްވައި އާދިއްތަ ދުވަހު ހަމީދު ކުރެއްވި ޓްވީޓެއްގައި ވިދާޅުވީ، މި އޮޕަރޭޝަންގައި ގާތްގަނޑަކަށް 80 ކިލޯގެ މަސްތުވާތަކެތި އަތުލައިގެންފައިވާ ކަމަށެވެ. އަދި މިއީ ރާއްޖޭގެ އިންޓެލިޖެންސްއާއި ފުލުހުން ހިންގި އޮޕަރޭޝަނެއްކަން ވެސް ހަމީދު ކުރެއްވި ޓްވީޓުގައި ފާހަގަ ކުރައްވާފައިވެއެވެ.
ހަމީދު އިތުރަށް ވިދާޅުވީ، މި މައްސަލައިގެ ތަހުޤީޤު ބޭރުގެ ފަރާތްތަކާއި ގުޅިގެން ކުރިއަށް ގެންދަވާނެ ކަމަށާއި، މަސްތުވާތަކެތި ނައްތާލުމުގެ މަސައްކަތް ފުލުހުން ކުރާނެ ކަމަށެވެ.
މިއީ ރާއްޖޭގެ ފުލުހުން ހިންގި އޮޕަރޭޝަނެއްކަން ހަމީދު ފާހަގަ ކުރައްވާފައިވާއިރު، ހޮނިހިރު ދުވަހު ރާއްޖޭގެ ކަނޑުގެ ސަރަޙައްދުގައި ހިންގި މި އޮޕަރޭޝަނާ ގުޅޭ މައުލޫމާތު ފޯރުކޮށްދީފައިވަނީ ޕާކިސްތާނުގެ އެންޓި ނާރކޮޓިކްސް ފޯސް (އޭއެންއެފް) ގެ އިންޓެލިޖެންސް އިން ކަމަށް ކަރާޗީގެ ނޫހަކުން ރިޕޯޓް ކޮށްފައިވެއެވެ. އެގޮތުން މި އޮޕަރޭޝަންގައި އަތުލައިގަތް މަސްތުވާތަކެތީގެ އަގު އެތައް ބިލިއަނަކަށް އަރާނެ ކަމަށް ރިޕޯޓް ކޮށްފައިވެއެވެ.
