އަޅުގަނޑުގެ ހާލު އަންނަނީ ރަނގަޅުވަމުން: ޓްރަމްޕް
4 އޮކްޓޯބަރު 2020 | އާދީއްތަ 03:42ޓްރަމްޕުގެ ހާލުކޮޅު ގޯސްވެއްޖެކަމަށް މީޑިއާތަކުގައި ރިޕޯޓްކުރިތާ މާގިނައިރުތަކެއް ނުވަނީސް ޓްރަމްޕްވަނީ ވީޑިއޯ މެސެޖެއް އާންމުކުރައްވާފައި
އެމެރިކާގެ ރައީސް ޑޮނަލްޑް ޓްރަމްޕް
ކޮވިޑް-19ށް ޕޮޒިޓިވްވެ ފަރުވާ ދެމުން އަންނަ އެމެރިކާގެ ރައީސް ޑޮނަލްޑް ޓްރަމްޕްގެ ހާލުކޮޅު ރަނގަޅު ކަމަށް އެމަނިކުފާނު ވިދާޅުވެއްޖެއެވެ.
މެރީލޭންޑްގައި ހުންނަ އަސްކަރީ ހޮސްޕިޓަލެއް ކަމަށްވާ ރީޑް ނެޝަނަލް މިލިޓަރީ މެޑިކަލް ސެންޓަރަށް ގެންގޮސް ފަރުވާދެއްވަން ފެށިފަހުން އާންމު ކުރެއްވި ވީޑިއޯ މެސެޖެއްގައި ވިދާޅުވީ ހާލުކޮޅު ރަނގަޅުވަމުން އަންނަ ކަމަށާއި، އަނބިކަނބަލުން މެލޭނިއާ ޓްރަމްޕުގެ ހާލުކޮޅު ވެސް ރަނގަޅު ކަމަށެވެ.
ޓްރަމްޕުގެ ހާލުކޮޅު ރަނގަޅު ކަމަށް ވިދާޅުވެ ވީޑިއޯ މެސެޖެއް އާންމު ކުރައްވާފައިވަނީ އެމަނިކުފާނުގެ ހާލުކޮޅު ގޯސް ކަމަށް ބުނެ ވައިޓްހައުސްގެ ސޯސްއަކާއި ހަވާލާ ދެއްވާ މީޑިއާތަކުގައި ހަބަރު ފެތުރިތާ މާ ގިނައިރުތަކެއް ނުވަނީސްއެވެ. "އެސޯސިއޭޓެޑް ޕްރެސް" ބުނާ ގޮތުން ޓްރަމްޕަށް ނޭވާލުން ދަތިވާ މައްސަލަ ވަރަށް ބޮޑަށް ކުރިމަތިވެފައިވެއެވެ. އަދި ޓްރަމްޕްގެ ހުންވެސް ވަރަށް ގަދަ ކަމަށް ނަން ހާމަކުރަން ނޭދޭ އެމެރިކާގެ މަސްއޫލުވެރިޔާ ވަނީ އޭޕީއަށް މައުލޫމާތުދެއްވާފައެވެ.
އެމެރިކާގެ ރައީސް ޑޮނާލްޑް ޓްރަމްޕް ކޮވިޑް-19ށް ފަރުވާ ހޯއްދެވުމަށް ހޮސްޕިޓަލަށް ވަޑައިގެންނެވުމުގެ ކުރިން އޮކްސިޖަންގެ ފަރުވާ ނެންގެވި ކަމަށް ބޭރުގެ މީޑިއާތަކުން ރިޕޯޓު ކޮށްފައިވެއެވެ. މީޑިއާތަކުން ރިޕޯޓު ކޮށްފައިވާ ގޮތުގައި ހުކުރު ދުވަހުގެ ހެނދުނުން ފެށިގެން ޓްރަމްޕް އުޅުއްވީ ނޭވާލުމަށް އުނދަގޫވާތީއެވެ.
ނަމަވެސް، ޓްރަމްޕްގެ ހާލުކޮޅާއި ގުޅިގެން އެމަނިކުފާނަށް ފަރުވާދެއްވާ ޑޮކްޓަރު ފުރަތަމަ ވިދާޅުވެފައިވަނީ އެމަނިކުފާނުގެ ހާލުކޮޅު ރަނގަޅުވަމުން އަންނަ ކަމަށެވެ. އަދި އެމަނިކުފާނަށް އޮކްސިޖަންގެ ފަރުވާ ދެއްވިތޯ ކުރެވުނު ސުވާލުތަކަށް އޭނާ ޖަވާބެއް ދެއްވާފައެއްވެސް ނުވެއެވެ. އަދި އެމަނިކުފާނުގެ ފުށުން ކޮވިޑުގެ އަލާމާތްތައް ފެންނަތޯ ކުރެވުނު ސުވާލުތަކަށް ވެސް ޖަވާބެއް ދެއްވާފައެއް ނުވެއެވެ.
ޓްރަމްޕް ކޮވިޑަށް ޕޮޒިޓިވްވުމާއި ގުޅިގެން ކުރިއަށް އޮތް އެމެރިކާގެ ރިޔާސީ އިންތިހާބުގެ ކެމްޕޭންތަކަށް ހުރަސް އެޅިގެންދާނެ ކަމަށް މަސްރަހު ދިރާސާ ކުރާ ފަރާތްތަކުން ބުނެއެވެ. މީގެ އިތުރުން ޓްރަމްޕުގެ ކެމްޕޭން މެނޭޖަރު ވެސް ވަނީ ކޮވިޑް-19ށް ޕޮޒިޓިވްވެފައެވެ.
