ސީޕްލޭންގެ ފާއިދާ ކުރާނީ ހަމައެކަނި އައްޑޫގެ ރައްޔިތުންނަކަށް ނޫން، މިއީ ތަރައްޤީގެ ފާލަމެއް: ސޯބެ
މިފަސް އަހަރު ނިމެންވާއިރަށް 8000 އެނދު ތަރައްޤީވާނެ
އައްޑޫ ސިޓީގެ މޭޔަރ އަބްދުﷲ ސޯދިގް (ސޯބެ)
ގަން އިންޓަރނޭޝަނަލް އެއަރޕޯޓާއި ހުވަދު އަތޮޅާ ދެމެދު ސީޕްލޭން ދަތުރުތައް ފެށުމުގެ އެއްބަސްވުމުގައި ސޮއިކޮށްފައިވާއިރު މިކަމުގެ ސަބަބުން ފާއިދާ ކުރާނީ ހަމައެކަނި އައްޑޫ ސިޓީއަށް ނޫން ކަމަށާއި މިއީ މުޅި ދެކުނުގެ ތަރައްޤީއަށް އެޅިގެންދާނެ ވަރަށް ބޮޑު ފާލަމެއް ކަމަށް އައްޑޫ ސިޓީގެ މޭޔަރ އަބްދުﷲ ސޯދިގް (ސޯބެ) ވިދާޅުވެއްޖެ އެވެ.
ރާއްޖެޓީވީގެ ފަލަސުރުޚީ ޕްރޮގްރާމްގައި ވާހަކަދައްކަވަމުން ސޯބެ ވިދާޅުވީ އައްޑޫގައި ހުރި ޓުއަރިސްޓް އެނދުތަކާއި ހުވަދުއަތޮޅުގައި ހުރި އެނދުތަކާއި ގުޅިގެން ދިއުމަކީ މިސަރަހައްދަށް އިޤްތިޞާދީ ގޮތުން ލިބޭނެ ވަރަށް ބޮޑު ކުރިއެރުމެއް ކަމަށެވެ. މިކަމުގެ ސަބަބުން ކުރިއަރަގައިގެންދާނީ ހަމައެކަނި ފަތުރުވެރިކަން ނޫން ކަމަށާއި ދެކުނަކީ ރާއްޖޭގެ ނިސްބަތުން ބަލާއިރު މަސްވެރިކަން ކުރާ ސަރަހައްދެއް ކަމުން ގަން އިންޓަރނޭޝަނަލް އެއަރޕޯޓާއި އެކީ މަސް އެކްސްޕޯޓް ކުރުމާއި، މިނޫންވެސް ވަރަށް ގިނަ ފާއިދާތަކެއް މަސްވެރިކަމުގެ ސިނާއަތުގައި މަސައްކަތްކުރާ ފަރާތްތަކަށް ލިބިގެންދާނެ ކަަމަށް ސޯބެ ވިދާޅުވި އެވެ.
އައްޑޫ ސިޓީގައި މިވަގުތު ފަތުރުވެރިކަމަށް ބޭނުން ކުރަމުންދާ 1100 އެނދު ހުރިއިރު، މިފަސް އަހަރު ނިމެންވާއިރަށް 8000 އެނދަށް ތަރައްޤީ ކުރުމުގެ ގޮތުން ތަފާތު ގިނަ މަޝްރޫއުތައް އެކުލަވާލެވިފައިވާ ކަމަށް ސޯބެ ވިދާޅުވި އެވެ. އެގޮތުން ގަމުގައި އެކި ފަންތީގެ ހޮޓާ ތަރައްޤީ ކުރުމާއި، ސިޓީ ހޮޓާ ތަރައްޤީ ކުރުން ހިމެނޭ ކަމަށް ސޯބެ ވިދާޅުވިއެވެ.
އެންމެ މުހިއްމު ކަމެއް ކަމަށް ދެކެނީ އިޤްތިޞާދީ ގޮތުން ކުރިއެރުންތަކެއް ލިބޭނެ ކަންތައްތަކެއް ފެށިފައިވުންކަން ފާހަގަކޮށް ސޯބެ ވިދާޅުވީ މީގެކުރިން އައްޑޫގެ ގިނަ މަޝްރޫއުތައް ހިނގާފައިވަނީ ވަރަށް ލަހުން ކަމަށްވާއިރު މިއަދު މިފެށުނު މަޝްރޫއުތަކާއި އެކު ބާރު ސްޕީޑުގައި މަޝްރޫއުތައް ކުރިއަށްގެންދާނެ ކަމަށް އުއްމީދު ކުރައްވާ ކަމަށެވެ. އަދި އައްޑޫގެ ތަރައްޤީއަކީ އެސަރަހައްދުގެ ރައްޔިތުންގެ ވަރަށް ބޮޑު ހުވަފެނެއް ކަމަށާއި އެކަމުގެ ހަޤީޤީ ކުލަ ޖެހިގެންދާ މަންޒަރު މިއަދު ފެންނަމުންދާ ކަމަށް ސޯބެ ވިދާޅުވި އެވެ.
