ލޯނު އެއްބަސްވުމެއްގެ ދަށުން ބެންފީކާއަށް ކުޅެމުން އަަންނަ ބްރެޒިލުގެ ފޯވާޑް ކާލޮސް ވިނީޝިއަސް ޓޮޓެންހަމް ހޮޓްސްޕާއާ ގުޅިއްޖެއެވެ.

އުމުރުން 25 އަހަރުގެ ފޯވާޑް ޓޮޓެންހަމާ ގުޅުނީ ލޯނު އެއްބަސްވުމެއްގެ ދަށުން މި ސީޒަނުގެ ނިޔަލަށެވެ. އެކަމަކު މި އެއްބަސްވުމުގެ ދަށުން މި ސީޒަނަށްފަހު ޓޮޓެންހަމުން ބޭނުންވެއްޖެ ނަމަ، ވިނީޝިއަސްގެ އެއްބަސްވުން ދާއިމީ ކުރުމުގެ ފުރުސަތު އެބައޮތެވެ. އެގޮތުން އެއްބަސްވުން ދާއިމީކުރާނަމަ ޓޮޓެންހަމުން 36 މިލިޔަން ޕައުންޑް ދައްކަން ޖެހޭނެ ކަމަށްވެސް ރިޕޯޓުތައް ބުނެއެވެ.

ނާޕޮލީ ދޫކޮށް މިދިޔަ އަހަރުގެ ހޫނު މޫސުމުގައި 15 މިލިޔަން ޕައުންޑަށް ބެންފީކާއާ ގުޅުނު ވިނީޝިއަސް ވަނީ މިދިޔަ ސީޒަނުގައި މޮޅު ކުޅުމެއް ދައްކާފައެވެ. އެގޮތުން މިދިޔަ ސީޒަނުގައި އޭނާ ވަނީ ބެންފީކާއަށް ކުޅެދިން 47 މެޗުގައި 24 ލަނޑު ޖަހާފައެވެ.

ޓޮޓެންހަމުން މި ޓްރާންސްފާ ބާޒާރުގައި ފޯވާޑެއްގެ ސޮއި ހޯދިއިރު، ދާދި ފަހުން ދިން އިންޓަވިއުއެއްގައި އެ ޓީމުގެ ކޯޝު ހޯސޭ މޮރީނިއޯ ވަނީ އެޓީމަށް އިތުރު ފޯވާޑެއް ބޭނުންވާ ކަމަށް ބުނެފައެވެ.

ޓޮޓެންހަމުން މި ޓްރާންސްފާ ބާޒާރުގައި ވަރަށް ބޮޑަށް ހަރަކާތްތެރިވަމުން އަންނައިރު، އެ ޓީމުން މީގެ ކުރިން ވަނީ ރެއާލް މެޑްރިޑަށް ކުޅެމުން އައި އެ ޓީމުގެ ކުރީގެ ފޯވާޑް ގެރެތު ބޭލް އާއި ޑިފެންޑަރު ސާޖިއޯ ރެގީލޯނުގެ ސޮއިވެސް ހޯދާފައެވެ.