ޔުއެފާ ޗެމްޕިއަންސް ލީގުގައި އެފްސީ ބާސެލް އަތުން މެންޗެސްޓަރ ޔުނައިޓެޑް ބަލިވިއިރު، ބެންފީކާގެ މައްޗަށް ސީއެސްކޭއޭ މޮސްކޯ ކުރިހޯދައިފި އެވެ.

ޔުއެފާ ޗެމްޕިއަންސް ލީގުގެ ގްރޫޕް އޭގައި ބުދަ ދުވަހުގެރޭ ރަށުން ބޭރުގައި ސްވިޓްޒަލެންޑްގެ ބެންފީކާ އަތުން އިނގިރޭސި ޕްރިމިއަރ ލީގުގެ މެންޗެސްޓަރ ޔުނައިޓެޑް ބަލިވީ އެއް ލަނޑު ސުން ލަނޑުންނެވެ.

މިމެޗުން ޕޮއިންޓެއް ހޯދުމަށް ޔުނައިޓެޑުން ކުރި އުއްމީދުތައް ފުނޑުފުނޑުވީ، މެޗު ނިމެން މިނެޓަކަށް ވެފައިވަނިކޮށް ބާސެލްގެ މައިކަލް ލެންގް ޖަހައިދިން ލަނޑުންނެވެ.

މިމެޗުގެ ފުރަތަމަ ހާފް ޔުނައިޓެޑުން ޑޮމިނޭޓްކޮށް، މެޗުގައި ކުރި ހޯދުމަށް ގިނަ ފުރުޞަތުތަކެއް ތަނަވަސްކުރިއެވެ. އެގޮތުން ޔުނައިޓެޑްގެ މަރުއާނޭ ފެލައިނީ އާއި މާކޯސް ރޯޚޯ އުފެއްދި ދެހަމަލާއެއް، ގޯލްގެ ދަނޑިއަށް އަމާޒުވެފައިވެއެވެ.

މެޗަށް ފަހު ވާހަކަ ދައްކަމުން ޔުނައިޓެޑްގެ ކޯޗު ހޯސޭ މޮރީނިއޯ ބުނީ، ލަނޑެއް ނުޖެހުނު ނަމަވެސް، ފުރަތަމަ ހާފްގެ ކުޅުން ވަރަށް ފުރިހަމަ ކަމަށެވެ. އަދި އެކަމުގައި ޝަކުވާއެއް ކުރާނެ ފުރުޞަތެއް ނެތް ކަމަށާއި، ކުޅުންތެރިން ބަދުނާމު ނުކުރާނެ ކަމަށް މޮރީނިއޯ ބުންޏެވެ.

އޭނާ ބުނީ، އެކުޅުން 10 މެޗުގައި ތަކުރާރުކޮށްފިނަމަ، އޭގެ ތެރެއިން ނުވަ މެޗު ފަސޭހަކަމާއެކު ޔުނައިޓެޑުން ކާމިޔާބު ކުރާނެ ކަމަށާއި، ބަލިވާނީ އެންމެ މެޗަކުން ކަމަށެވެ. އަދި ރޭގެ މެޗަކީ އެމެޗު ކަމަށް އޭނާ ބުންޏެވެ. ރޭގެ މެޗަކީ ޔުއެފާ ޗެމްޕިއަންސް ލީގުގެ ގްރޫޕް ސްޓޭޖްގައި ޔުނައިޓެޑް ބަލިވި ފުރަތަމަ މެޗެވެ.

މިމެޗުން ބަލިވި ނަމަވެސް ޔުނައިޓެޑް އޮތީ ގްރޫޕް އޭގެ އެއްވަނާގައެވެ. ގްރޫޕް ސްޓޭޖްގައި ކުޅުނު ފަސް މެޗުން 12 ޕޮއިންޓް ޔުނައިޓެޑަށް ލިބިފައިވާއިރު، ދެވަނާގައިވާ ބާސެލް އަދި ތިންވަނާގައިވާ ރަޝިއާގެ ސީއެސްކޭއޭ މޮސްކޯ އަށް ލިބިފައި ވަނީ 9 ޕޮއިންޓެވެ. ކުޅުނު ހުރިހާ މެޗަކުން ވެސް ބަލިވެ، ގްރޫޕް ސްޓޭޖްގެ ފުލުގައިވާ ޕޯޗުގަލްގެ ބެންފީކާ އަށް ޕޮއިންޓެއް ލިބިފައެއްނުވެއެވެ.

މިގްރޫޕްގައި ކޮންމެ ޓީމަކަށް ވެސް ބާކީ އެއް މެޗު އޮތްއިރު، ގްރޫޕްގެ އެއްވަނަ މަގާމް ކަށަވަރު ކުރުމަށް ޔުނައިޓެޑަށް ބޭނުންވަނީ އެންމެ ޕޮއިންޓެކެވެ. ގްރޫޕްގެ ފަހު މެޗުގައި ސީއެސްކޭއޭ މޮސްކޯ އަތުން ހަތް ލަނޑު ސުން ލަނޑަށް ވުރެ ބޮޑު ތަފާތަކުން ބަލިވެގެން ނޫން ގޮތަކަށް ޗެމްޕިއަންސް ލީގުގެ ދެވަނަ ބުރުގެ ފުރުޞަތު ޔުނައިޓެޑަކަށް ނުގެއްލޭނެ އެވެ. އެމެޗު ކުޅޭނީ އަންނަ ޑިސެމްބަރު މަހުގެ ފަސްވަނަ ދުވަހު އެވެ.

މިގްރޫޕްގައި ރޭ ބެންފީކާ އަތުން އަމިއްލަ ދަނޑުގައި ސީއެސްކޭއޭ މޮސްކޯ މޮޅުވީ ދެ ލަނޑު ސުން ލަނޑުންނެވެ. މިމެޗުގެ 13 ވަނަ މިނިޓުގައި ސީއެސްކޭއޭ އަށް ކުރިހޯދައިދިނީ ޖިއޯޖީ ޝްޗެނިކޯފެވެ. ސީއެސްކޭއޭގެ ދެވަނަ ލަނޑަކީ 56 ވަނަ މިނިޓުގައި ބެންފީކާގެ ޖާޑެލް އަތުން ބައިކޮޅަށް ވަން ލަނޑެކެވެ.