ދާންދޫ މާރާމާރީގައި ހާލު ސީރިއަސްވި މީހާގެ ސިކުނޑިއަށް ލޭ އެޅި މާލޭގައި ފަރުވާދެނީ
3 އޮކްޓޯބަރު 2020 | ހޮނިހިރު 00:34މި މާރާމާރީއާ ގުޅިގެން ފުލުހުން ވަނީ ކޯޓު އަމުރެއްގެ ދަށުން 9 މީހަކު ހައްޔަރުކޮށްފަ
ގއ. ދާންދޫ އޭރިއަލް ޝޮޓެއް، އެރަށުގައި ބުރާސްފަތި ދުވަހުގެ ރޭ ވަނީ ބޮޑު މާރާމާރީއެއް ހިންގާފަ
ގއ. ދާންދޫގައި ބުރާސްފަތި ދުވަހުގެ ރޭ ހިންގި ގްރޫޕް މާރާމާރީއާ ގުޅިގެން ހާލު ސީރިއަސްވި ޒުވާނާގެ ސިކުނޑިއަށް ލޭ އެޅި މާލޭގައި ފަރުވާދޭން ފަށައިފިއެވެ.
ދާންދޫގައި ހިނގި މި މާރާމާރީ އަކީ ކެފޭއެއްގެ ތެރޭގައި ތިބި ބަޔަކު ދެކެވެމުންދިޔަ ވާހަކައާ މެދު ހިތްހަމަ ނުޖެހިގެން އެއްބަޔަކު އަނެއް ބަޔަކާ ދެމުދު ހިނގާދިޔަ މާރީއެކެވެ.
ދާންދޫއިން ރާއްޖެއެމްވީއަށް މައުލޫމާތު ދިން ފަރާތަކުން ބުނެފައިވަނީ ތޫނު އެއްޗެއް ބޭނުން ކޮށްގެން ހިންގި މި މާރާމާރީ އަކީ އެރަށު "ސީނާގޭ، އަހުމަދު މުޙައްމަދު" ނަމަކަށް ކިޔާ މީހަކު ހިންގި މާރާމާރީއެއް ކަމަށެވެ. އަދި މި މާރާމާރީގައި ޒަހަމްވެގެން ހާލު ސީރިއަސްވި މީހާއަށް ހަމަލާ ދީފައި ވަނީ ވެސް އޭނާ ކަމަށެވެ.
މި މާރާމާރީގައި ޖުމްލަ ތިން މީހަކަށް އެކި ވަރުގެ އަނިޔާ ލިބުނު އިރު، ސީރިއަސް ހާލަތަށް ދިޔަ ޒުވާނާއަށް ގއ. އަތޮޅު ހޮސްޕިޓަލުން ފަރުވާ ދިނުމަށްފަހު އިތުރު ފަރުވާ ދިނުމަށް ހުކުރު ދުވަހުގެ މެންދުރުފަހު ވަނީ މާލެ ގެނެސްފައެވެ.
ދާންދޫ އިން ވާހަކަ ދެއްކި މީހާ ބުނީ ހާލު ސީރިއަސްވި ޒުވާނާގެ ބޮލަށް ތޫނު އެއްޗަކުން ހަމަލާ ދިނުމުގެ ސަބަބުން ސިނކުޑިއަށް ލޭ އެޅިފައިވާ ކަމަށް އޭނާގެ އާއިލާގެ ފަރާތުން ބުނެފައިވާ ކަމަށެވެ.
މި މާރާމާރީއާ ގުޅިގެން ފުލުހުން ވަނީ ކޯޓު އަމުރެއްގެ ދަށުން 9 މީހަކު ހައްޔަރު ކޮށްފައެވެ. އޭގެ ތެރޭގައި 18 އަހަރުން ދަށުގެ ކުއްޖަކު ވެސް ހިމެނޭ ކަމަށް ރާއްޖެއެމްވީއަށް ވަނީ މައުލޫމާތު ލިބިފައެވެ. އަދި މި މައްސަލަ އިތުރަށް ތަހުގީގު ކުރަމުންދާ ކަމަށް ފުލުހުން ވަނީ ބުނެފައެވެ.
