ރާއްޖެއަށް ޑިމޮކްރެސީ ގެންނަން އިންސްޕަޔަރވީ ގާންދީ ގެންގުޅުއްވި އުސޫލުތަކުން: ރައީސް ނަޝީދު
އެމަގުން އެމްޑީޕީން ކުރި މަސައްކަތުގެ ނަތީޖާއެއްގެ ގޮތުންއައު ޤާނޫނު އަސާސީ އެކުލަވާލެވުނު: ރައީސް ނަޝީދު
ރައްޔިތުންގެ މަޖިލިހުގެ ރައީސް މުހައްމަދު ނަޝީދު
މަހާތްމާ ގާންދީ ގެންގުުއްވި އަނިޔާއާ ދެކޮޅު މަދަނީ ބަސްނޭހުމުގެ ސިޔާސަތަކީ އެމްޑީޕީން ރާއްޖެއަށް ޑިމޮކްރަސީ ގެނައުމުގައި އެންމެ ބޮޑަށް އިންސްޕަޔަރވި ކަންތައް ކަމަށް އެމްޑީޕީގެ ރައީސް މުހައްމަދު ނަޝީދު ވިދާޅުވެއްޖެއެވެ.
ރައީސް ނަޝީދު މިހެން ވިދާޅުވީ މިއަދު ފާހަގަ ކުރަމުންދާ ގާންދީގެ 150 ވަނަ އުފަންދުވަހާ ގުޅުވައި އެމަނިކުފާނު ކުރެއްވި ޓްވީޓެއްގައެވެ.
ޓްވީޓުގައި ރަައީސް ނަޝީދު ވިދާޅުވީ އެ މަގުން އެމްޑީޕީން ކުރި މަސައްކަތުގެ ނަތީޖާއެއްގެ ގޮތުން 2008 ވަނަ އަހަރު އައު ޤާނޫނު އަސާސީ އެކުލަވާލެވުނު ކަމަށެވެ. އަދި ހަމަ އެ އަހަރު ދިމިގްރާތީ ގޮތުން ރާއްޖޭގައި ފުރަތަމަ ރިޔާސީ އިންތިޚާބު ބޭއްވެގެންދިޔަ ކަމަށް ވިދާޅުވިއެވެ.
މަހާތްމާ ގާންދީއަކީ އިނގިރޭސީންގެ އަޅުވެތިކަމުން އިންޑިޔާ މިނިވަންކުރުމަށް މަސައްކަތްކުރެއްވި ބޭފުޅާއެވެ. ގާންދީ ގެންގުޅުއްވި އަނިޔާ އާ ދެކޮޅު ސިޔާސަތަކީ މުޅި ދުނިޔެއަށް މަޝްހޫރު ސިޔާސަތުތަކެކެވެ.
