މަސައްކަތް ހަވާލުކުރި ކޮންޓްރެކްޓަރަށް ދިމާވި ކަންތައްތަކަކާއި ގުޅިގެން ނ. ލަންދޫ މިސްކަތް އިމާރާތްކުރުމުގެ މަސައްކަތް ހުއްޓުމަކަށް އައިސްފިއެވެ.
މިކަމާއި ގުޅޭގޮތުން ރާއްޖެ.އެމްވީ އަށް މައުލޫމާތު ދެއްވަމުން އެ ރަށު ކައުންސިލްގެ ރައީސް ޝިނާން އަބްދުލްޣަނީ ވިދާޅުވީ، މި އަހަރުގެ ތެރޭގައި ފެށި މަސައްކަތް މިހާރު ހުއްޓުމަކަށް އައިސްފައިވާ ކަމަށެވެ. އަދި މިހާރު ހުރި މިސްކިތަށް ދިމާވެފައިވާ ޖާގައިގެ ދަތިކަމުގެ މައްސަލަ ހައްލުކުރުމުގެ ގޮތުން، މިއީ ގިނަ ރައްޔިތުން ހައްލު ކުރުމަށް ބޭނުން ވެފައިވާ މައްސަލައެއް ކަމަށް ފާހަގަކުރެއްވިއެވެ.
މި މަސައްކަތް ކުރަން ސަރުކާރުން ހުރިހާ އެހީއެއް ވެދީފައި ވާ ކަމަށާ ނަމަވެސް މި މަސައްކަތް ހުއްޓިފައި ވަނީ މި މަސައްކަތް ހަވާލް ކުރި ފަރާތުގެ ސަބަބުން ކަމަށެވެ. އަދި މިހާރު އެ ކޮންޓްރެކްޓް ބާތިލް ކުރެވިފައި ވާކަމަށާ މިހާރު އެހެން ފަރާތަކާ މި މަޝްރޫއު ހަވާލް ކުރުމުގެ މަސައްކަތް ކުރިއަށް ދާކަމަށް ޝިނާން ވިދާޅުވިއެވެ. ކުރީގެ ކޮންޓްރެކްޓަރު މަސައްކަތް ހުއްޓާލަން ޖެހުނު ސީދާ ސަބަބެއް ޝިނާން ހާމަކޮށްފައެއް ނުވެއެވެ.
މި މަޝްރޫއު އަކީ ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހް ރިޔާސީ ކެމްޕެއިންގައި އެރަށަށް ވަޑައިގެން ވެވަޑައިގެންނެވި ރިޔާސީ ވައުދު ފުޅެކެވެ. މިނިސްޓްރީ އޮފް އިސްލާމިކް އެފެއާޒްއިން ހިންގާ މަޝްރޫއު އަކީ ސައުދީ އަރަބިއާ ސަރުކާރުގެ ހިލޭ އެހީގެ ދަށުން ފަންޑު ކުރެވޭ މަޝްރޫއުއެކެވެ. ލަންދޫ މިސްކިތުގެ މަސައްކަތަށް 2020 ވަނަ އަހަރުގެ ބަޖެޓުގައި ވަނީ 3،218،757ރ. ކަނޑައަޅާފައެވެ.
