ގައުމީ ގުރުއާން މުބާރަތް: 2 ބުރަކަށް ބަހާލައިގެން މިފަހަރު ވާރޗުއަލްކޮށް!
އޮކްޓޯބަރު މަހުގެ ނިޔަލަށް އޮޑިޝަން ރެކޯޑިންފް ފޮނުވޭނެ، ފައިނަލް ބުރު ފަށާނީ ޑިސެމްބަރު 3 ގައި
33 ވަނަ ގައުމީ ގުރުއާން މުބާރާތް ނިންމުމުގެ ރަސްމިއްޔާތުގެ ތެރެއިން
ކޮވިޑާއި ގުޅިގެން އަޅާފައި ހުރި ފިޔަވަޅުތަކާއި ގުޅިގން ގައުމީ ގުރުއާން މުބާރާތް ވާރޗުއަލްކޮށް ކުރިޔަށް ގެންދިޔުމަށް ނިންމާފައިވާކަމަށް އިސްލާމިކް މިނިސްޓަރ ޑރ. އަހުމަދު ޒާހިރު އަލީ ވިދާޅުވެއްޖެއެވެ.
ރާއްޖެޓީވީގެ "ފަލަސުރުހީ" ޕްރޮގްރާމްގައި ވާހަކަދައްކަވަމުން މިނިސްޓަރ ވިދާޅުވީ، ވާރޗުއަލްކޮށް ގުރުއާން މުބާރާތް ބޭއްވުމަށް ނިންމީ ކީރިތި ގުރުއާނަށް ދަރިވަރުންގެ ހިތްތަކުގައި ލޯބިޖައްސައި އަހުލުވެރި ކުރުވަން ކަމަށެވެ.
އެގޮތުން، ދުނިޔޭގައި ހަލުވިކަމާއި އެކު ފެތުރެމުންދާ ކޮވިޑް-19 އާއި އެކުވެސް ހުރިހާ ފަރާތްތަކަށްވެސް ބައިނަލްއަގްވާމީ މުބާރާތްތަކުގަޔާއި ރާއްޖޭގެ އިންތިޒާމްކުރާ އެކިއެކި މުބާރާތްތަކުގައި ބައިވެރިވުމުގެ ފުރުސަތު ތަނަަވަންސްކޮށްދިނުން އެއީ އެންމެ ބޮޑު އެއް މަގްސަދުކަމަަށް މިިނިސްޓަރ ވިދާޅުވިއެވެ. ގައުމީ ގުރުއާން މުބާރަތައް ބޮޑު ތަރުހީބެއް ލިބެމުން އަންނައިރު މި ހާލަތުގައިވެސް މުބާރަތް ނުބާއްވަން ބޭނުންނުވާކަމަށް މިނިސްޓަރ ފާހަގަކުރެއްވިއެވެ.
ވާރޗުއަލްކޮށް މުބާރާތް ކުރިޔަށް ގެންދިއުމަށް ހަމަޖެހިފައިވަނީ އޮޑިޝަން ބުރަކާއި ފައިނަލް ބުރެއް ހިމެނޭގޮތަށް ދެ ބުރަކަށް ބަހާލައިގެން ކަަން ފާހަގަކުރައްވައި މިނިސްޓަރ ވިދާޅުވީ، މުބާރާތުގައި 8 އުމުރުފުރާ ހިމެނޭކަމަށެވެ.
އެގޮތުން، މި ހަފްތާ ތޭރޭ މިކަމާއި ގުޅޭ އިތުރު ތަފްސީލް އިއުލާންކޮށް އޮކްޓޯބަރު މަހުގެ ނިޔަލަށް އޮޑިޝަނަށް ހުށަހެޅޭ ހުރިހާ ރެކޯޑިންގްސްތައް އިތުރަށް ބަލައި ނިންމައި ފައިނަލް ބުރު ޑިސެމްބަރު މަހުގެ 3 ވަނަ ދުވަހުން ފެށިގެން ކުރިޔަށް ގެންދިޔުމަށް މަސައްކަތް ކުރަމުން ގެންދާކަމަށް މިނިސްޓަރ ވިދާޅުވިއެވެ.
މުބާރާތުގައި 3 ކެޓެގެރީއެއް ހިމެނެއެވެ. އެއީ ބަލައިގެން ކިޔަވާ ކުދިންނާއި ނުބަލައި ކިޔަވާ ކުދިންނާއި ހާފިޒުންގެ ބައިކަން ފާހަގަކުރައްވައި މިނިސްޓަރ ވިދާޅުވީ، ކޮންމެ އުމުރުފުރާއަކުން ވެސް މި ތިން ކެޓެގެރީގައި ބައިވެރިވުމުގެ ފުރުސަތު އެބައޮތްކަމަށެވެ.
މިގޮތަށް އިންތިޒާމްކުރުމުގެ ސަބަބުން އޮޑިޝަނުން ހޮވޭ ކުދިންނަށް ފައިނަލް ބުރަށް ތައްޔާރުވުމަށް ނޮވެމްބަރ މަސް އެއްކޮށް ލިބޭއިރު، ބަލައިގެން ކިޔަވާ ކުދިންނަށްވެސް ވަކި ހިސާބަކުން ފެށިގެން ކިޔެވުމަށް ކަނޑައެޅޭނަކަމަށް މިނިސްޓަރ ވިދާޅުވިއެވެ.
80 މާރކްސް ނުވަތަ އެޔަށް ވުރެ މަތިން މާކްސް ލިބޭ ހުރިހާ ފަރާތްތަކެއް ފައިނަކް ބުރަށް ދާނެއެވެ. އެގޮތުން، ދެ ޖިންސު ވަކިވަކިން 40 ފަރާތް ފައިނަލްބުރަށް ދާއިރު ޖުމްލަ 640 ކުދިން އެ ކެޓެގެރީގައި ވާދަކުރާނެކަމަށް މިނިސްޓަރ ވިދާޅުވިއެވެ.
މިނިސްޓަރ ވިދާޅުވީ ފައިނަލް ބުރުގައި ކިޔަވާއިރު ހާއްސަ އިންތިޒާމްތަކެއް ކޮންމެ ރަށެއްގައިވެސް ހަމަޖެހިފައި ހުންނާނެކަމަށެވެ. އެގޮތުން، ކިޔަވަން ޖެހޭނީ މިނިސްޓްރީން ކަނޑައަޅާތަނެއްގައި ކަމަށާއި ތަން ހަމަޖެއްސުމުގެ މަސައްކަތައް މިނިސްޓްްރީ އޮފް އެޑިއުކޭޝަނާއި ވާހަކަ ދައްކައި، މިނިސްޓްރީގެ އެހީތެރިކަމާއި އެކު ސްކޫލެއްގައި ހަމަޖައްސާނެކަމަށެވެ. އަދި، ފައިނަލް ބުރުގައި ކިޔަވާއިރު އެ ފަރާތްތައް މޮނިޓަރ ކުރުމަށް ކޮންމެ ރަށެއްގައި 5 މެމްބަރުންގެ ކޮމިޓީއެއް އެކުލަވާލައިވޭނެއެވެ.
ފައިނަލް ބުރުގައި ކިޔަވަންޖެހެނީ އިންޓަނެޓް މެދުވެރިކޮށް ވަގުތުން ކަން ފާހަގަކުރައްވައި މިނިސްޓަރ ވިދާޅުވީ، ދިމާވެދާނެ އިންޓަނެޓް މައްސަލައަކަށް ބަލައި، މޮނީޓަރ ކުރުމަށް ކަނޑައަޅާފައިވާ ކޮމިޓީގެ ކޮންމެވެސް އެއް ބޭފުޅަކު ރެކޯޑް ކޮށް އިސްލާމިކް މިނިސްޓްރީއަށް ފޮނުވަންޖެހޭ ގޮތަށް ވިލަރެސް ކޮމިޓީއިން ނިންމާފައިވާކަމަށެވެ. މީގެ ސަބަބުން، އޯޑީއޯ މައްސަލައެއް ދިމާވިޔަސް، އަޑު ކެނޑިކެނޑިގެން އަޔަސް، އިންސާފުކުރުމަށް ބުރުލެއް ނާރާނެކަން މިނިސްޓަރ ފާހަގަކުރެއްވިއެވެ.
ފައިނަލް ބުރަށް ދިއުމަށް، އޮޑިޝަން ރެކޯޑް ކޮށް ފޮނުވަންޖެހެނީ އެ ފަރާތެއްގެ އަމިއްލައަށެވެ.
ކީރިތި ގުރުއާނާ ބެހޭ ގައުމީ މަރުކަޒުން އަބަދުވެސް ބައިނަލްއަގްވާމީ އެކި މުބާރާތުގައި ބައިވެރިވުމަށް ކުދިން ހޯދައި ކުދިން ކުރިޔެކޭވެސް އެއްގޮތަށް ފޮނުވޭނެކަން ފާހަގަކުރައްވައި މިނިސްޓަރ ވިދާޅުވީ، ކޮންމެ އަހަރަކު ރޯދަ މަހު ރާއްޖެއިން ބޭރުން ހާފިޒުން ގެންނައިރު، ހާފިޒުންގެ ކެޓެގެރީ ބާއްވާ، ކުރިޔަށް އޮތް ތަނުގައި ތަރާވީސް ނަމާދުކުރަންވެސް މޮޅު ދިވެހިން ތިބުން މުބާރާތުގެ ސަބަބުން މަގުފަހިވެގެންދާނެކަމަށެވެ.
