އަޔަކްސްއަށް ކުޅެމުން އައި ޒުވާން ޑިފެންޑަރު ސާޖިނިއޯ ޑެސްޓް ބާސެލޯނާއަށް ބަދަލުވެއްޖެއެވެ.

އުމުރުން 19 އަހަރުގެ ޑިފެންޑަރު ބާސާއަށް ބަދަލުވީ 21 މިލިޔަން ޔޫރޯގެ ފީއަކަށެވެ. އަދި ބޯނަހުގެ ގޮތުގައި އިތުރު ފަސް މިލިޔަން ޔޫރޯ ދައްކަން ޖެހޭނެ ކަމަށް ރިޕޯޓުތައް ބުނެއެވެ. ބާސާއާއެކު ޑެސްޓް ފަސް އަހަރުގެ އެއްބަސްވުމެއް ހެދިއިރު، މި މުއްދަތުގެ ތެރޭގައި އެއްބަސްވުން އުވާލާނަމަ 400 މިލިޔަން ޔޫރޯ ދައްކަން ޖެހޭނެއެވެ.

ނެދަލެންޑްސްއަށް އުފަން ޑެސްޓަކީ އެމެރިކާގެ ގައުމީ ފުޓްބޯޅަ ޓީމުން ޖާގަ ހޯދާފައިވާ ކުޅުންތެރިއެކެވެ. އެގޮތުން އެމެރިކާގެ 17 އަހަރުން ދަށުގެ ގައުމީ ފުޓްބޯޅަ ޓީމާއި، 20 އަހަރުން ދަށުގެ ގައުމީ ފުޓްބޯޅަ ޓީމަށް ކުޅުނު ޑެސްޓް، އެމެރިކާގެ ސީނިއާ ފުޓްބޯޅަ ޓީމުން ފުރުސަތު ހޯދީ މިދިޔަ އަހަރުގެ ސެޕްޓެމްބަރު މަހުއެވެ.

އަދި އަޔަކްސްގެ ޔޫތު އެކެޑަމީން ތަމްރީނުވި ޑެސްޓް އަޔަކްސްގެ ސީނިއާ ޓީމުން ޖާގަ ހޯދާފައިވަނީ މިދިޔަ އަހަރުގެ ޖުލައި މަހުގައެވެ. އޭގެ ފަހުން ޑެސްޓް ވަނީ އަޔަކްސްއަށް 38 މެޗު ކުޅެދީ ދެ ލަނޑު ޖަހާފައެވެ.

ބާސާއިން ޑެސްޓުގެ ސޮއި ހޯދިއިރު، ސްޕެނިޝް ލީގުން ދާދި ފަހުން ވަނީ ބާސާއަށް ކުޅުންތެރިން ގަނެވޭނީ ކުޅުންތެރިން ވިއްކައިގެން ކަމަށް އެ ކުލަބަށް އަންގާފައެވެ. އެއީ ފާއިތުވި ފަސް އަހަރަށް ބަލާއިރު ބާސާގެ އާމްދަނީއަށް ބޮޑު ވެއްޓުމެއް އައިސްފައިވާތީއެވެ. އެހެންކަމުން ބާސާއިން ޑެސްޓުގެ ސޮއި ހޯދީ ޕޯޗުގަލްގެ ޑިފެންޑަރު ނެލްސަން ސެމޭޑޯ ވުލްވްސްއަށް ވިއްކާލައިގެން ލިބުނު ފައިސާއިންނެވެ. ބާސާއިން އުމުރުން 26 އަހަރުގެ ޑިފެންޑަރު ވުލްވްސްއަށް ވިއްކާލީ 29 މިލިޔަން ޕައުންޑުގެ އަގަކަށެވެ.

ބާސާއިން މީގެ ކުރިން ވަނީ އުރުގުއޭގެ ފޯވާޑް ލުއިސް ސުއަރޭޒާއި، ބްރެޒިލްގެ މިޑްފީލްޑަރު އާތޫރް މެލޯ އާއި، ކްރޮއޭޝިއާގެ މިޑްފީލްޑަރު އިވާން ރަކިޓިޗް އަދި ޗިލީގެ މިޑްފީލްޑަރު އާޓޫރޯ ވިޑާލްވެސް ވިއްކާލާފައެވެ.