ކޮވިޑް ކޭސްތައް އިތުރުވާން ފެށުމާއި އެކު މެޑްރިޑް އަނެއްކާވެސް ލޮކްޑައުނަކަށް

ކޮވިޑް-19 ގެ ކޭސްތައް އިތުރުވާން ފެށުމާއި އެކު ސްޕެއިންގެ ވެރިރަށް، މެޑްރިޑް، ލޮކްޑައުން ކުރަން ނިންމައިފިއެވެ.

އެގޮތުން ކޮވިޑް-19 ކޮންޓްރޯލްކުރުމަށް އެ ގައުމުން އެޅި މި ފިޔަވަޅާއި އެކު މެޑްރިޑްގައި ހަ މީހުންނަށް ވުރެ ގިނަ މީހުންނަށް އެއް ފަހަރާ އެއް ތަނެއްގައި އެއްވެ ނޫޅެވޭނެއެވެ. އަދި ސިޓީ ތެރޭގައި އެއްތަނުން އަނެއް ތަނަށް ދެވޭނީ ހަމައެކަަނި މަސައްކަތަށް، ކިޔެވުމަށް ނުވަތަ ސިއްހީ ހިދުމަތެއް ހޯދުމަށެވެ.

މެޑްރިޑްގައި ކޮވިޑް-19 ކޮންޓްރޯލްކުރުމަށް މި ފިޔަވަޅުތައް އަޅަން ނިންމަވިކަން އިއުލާނު ކުރައްވަމުން ސްޕެއިންގެ ހެލްތު މިނިސްޓަރު ސަލްވަޑޯ އިލާ ވަނީ މެޑްރިޑަކީ ހާއްސަ ސިޓީއެއް ކަމަށާއި މެޑްރިޑްގެ ރައްކާތެރިކަން ވަނީ މުޅި ސްޕެއިންގެ ރައްކާތެރިކަމާއި ގުޅިފައި ކަމަށް ވިދާޅުވެފައެވެ.

މެޑްރިޑްގައި އެޅިގެން މިދިޔަ ފިޔަވަޅުތަކަކީ ސްޕެއިންގެ މުނިސިޕަލްޓީތަކުގެ ތެރެއިން ފާއިތުވި 14 ދުވަހުގެ ތެރޭގައި ކޮންމެ އެއް ލައްކަ މީހުންގެ ތެރެއިން 500 މީހުން ޕޮޒިޓިވްވެފައިވާ މުނިސިޕަލްޓީތަކުގައި އާއި ކޮވިޑަށް ޓެސްޓު ކުރުމަށް ނަގާފައިވާ ސާމްޕަލްތަކުގެ ތެރެއިން 10 އިންސައްތަ އަށް ވުރެ ގިނަ ސާމްޕަލް ޕޮޒިޓިވްވެފައިވާ ސަރަހައްދުތަކުގެ އިތުރުން ބައްޔަށް ފަރުވާ ހޯދަމުންދާ މީހުންގެ ތެރެއިން 35 އިންސައްތަ މީހުން އައިސީޔޫގައި ފަރުވާ ހޯދަމުންދާ ސަރަހައްދުތަކުގައި އެޅިގެންދާނެ ފިޔަވަޅުތައް ކަމަށް ސްޕެއިންގެ ހަބަރުތައް ބުނެއެވެ.

މެޑްރިޑުން ވަނީ ފާއިތުވި ހަފްތާ އެކަނި ވެސް 1586 ކޭސް ފެނިފައެވެ. ސްޕެއިންއިން ކޮވިޑް-19 ޖެހުނު މީހުންގެ އަދަދު ހަތް ލައްކަ ހަތްދިހަ ހާހަށް ވުރެ މައްޗަށް އަރާފައިވާ އިރު، އެގައުމުން ބަލިޖެހުނު 31,973 މީހުން ވަނީ މަރުވަފެއެވެ.