އެމްއައިބީގެ އޭޓީއެމްއެއް ތިލަފުށީ ގައި

މޯލްޑިވްސް އިސްލާމިކް ބޭންކު (އެމްއައިބީ) އިން ކ. ތިލަފުށީ ގައި އޭޓީއެމް ސެންޓަރެއް ހުޅުވައިފިއެވެ.

ތިލަފުށީ ބަނދަރު ކުރީމަތީ އޮންނަ ކޮށީގައި، ބެހެއްޓި އޭޓީއެމް ހުޅުވައިދެއްވީ ގްރޭޓާ މާލެ އިންޑަސްޓްރިއަލް ޒޯން (ޖީއެމްޒެޑް) ގެ މެނޭޖިން ޑިރެކްޓަރ އިބްރާހިމް ރަޝީދު (މާމިގިލި އިބޫ) އެވެ.

އިބޫއާ އެކު އޭޓީއެމް ސެންޓަރު ހުޅުއްވައިދެއްވަމުން ''ރާއްޖެ.އެމްވީ''އާ ވާހަކަ ދައްކަވަމުން އެމްއައިބީގެ ސީއީއޯ އަހުމަދު ރިޒާ ވިދާޅުވީ، އެ ބޭންކުގެ އޭޓީއެމް އެއް ބެހެއްޓީ ޖީއެމްޒެޑްގެ އެދުމުގެ މަތިން ކަމަށެވެ. ރިޒާ ވިދާޅުވީ، އޭޓީއެމް ހުޅުވުން ލަސްވީ ކޮވިޑް-19 ގެ ހާލަތާ ގުޅިގެން ކަމަށެވެ. އެމްއައިބީ އިން ބުނީ، އެ ބޭންކުގެ އެހެން އޭޓީއެމުންތަކުން ވެސް ލިބޭ ހިދުމަތްތައް ތިލަފުށީ ގައި ހުޅުވި އޭޓީއެމުން ލިބޭނެ ކަމަށެވެ.

އެކަމާއި ގުޅޭ ގޮތުން ވާހަކަ ދައްކަވަމުން އިބްރާހިމް ރަޝީދު ވިދާޅުވީ، ތިލަފުއްޓަކީ 5000 ހާހެއްހާ މީހުން މަސައްކަތް ކުރާ ރަށަކަށްވާއިރު އޭޓީއެމްއެއްގެ މުހިއްމުކަން އެތަން ވަރަށް ބޮޑު ކަމަށެވެ. އޭނާ ވިދާޅުވީ، ކުރިޔަށް އޮތް ތަނުގައި އެމްއައިބީގެ އެކައުންޓްތަަކަށް ޗެކަށް ފައިސާ ޖަމާކުރުމުގެ އިންތިޒާމް ހަމަޖެހިގެން ދިޔުމަށް އުއްމީދު ކުރައްވާ ކަމަށެވެ.

ތިލަފުށީ ގައި ހުޅުވި އޭޓީއެމްއާ އެކު އެމްއައިބީ އިން ވަނީ މިހާތަނަށް 18 އޭޓީއެމްއެއް ހުޅުވާފައެވެ.