ފުޓުބޯޅަ އެސޯސިއޭޝަން އޮފް މޯލްޑިވްސް (އެފްއޭއެމް) ގެ ހިންގާ ކޮމިޓީއަށް މާޒިޔާ ސްޕޯޓްސް އެންޑް ރެކްރިއޭޝަންގެ ސީއީއޯ ހުސެއިން ޝާފިއު (ކޮކީ) އާއި ގައުމީ ޓީމުގެ ކުރީގެ މެނޭޖަރ މުހައްމަދު ހާނިމް އާއި އީގަލްސްގެ ޖެނެރަލް ސެކެޓްރީ މުފާވިޒް ހާޝިމް (މުފާ) އައްޔަންކޮށްފިއެވެ.
ރާއްޖެއެމްވީއަށް އެނގިފައިވާ ގޮތުގައި ހިންގާ ކޮމިޓީއަށް ކޮކީ، މުފާ އަދި ހާނިމް ހަމަޖެއްސީ މިދިޔަ ހަފްތާގައި އޮތް އެފްއޭއެމްގެ ހިންގާ ކޮމިޓީގެ ބައްދަލުވުމެއްގައެވެ.
ނަމަވެސް މިކަމާ ގުޅޭ ގޮތުން އެފްއޭއެމްގެ ބަހެއް އަދި ނުލިބެއެވެ. ރާއްޖެއެމްވީން ތަކުރާރުކޮށް، އެކި ކަންކަމުގައި އެފްއޭއެމްއަށް ގުޅުމުން އަދި މެސެޖު ކުރުމުން ވެސް ޖަވާބެއް ނުދެއްވާތާ ހަފްތާއަކަށް ވުރެ ގިނަ ދުވަސް މިހާރު ވަނީ ވެފައެވެ.
މި ތިން މެމްބަރުން ހިންގާ ކޮމިޓީއަށް އައްޔަން ކޮށްފައި ވަނީ އެ ކޮމިޓީއަށް އިންތިހާބު ކުރި ރައްޔިތުންގެ މަޖިލީހުގެ މެމްބަރުން ކަމުގައިވާ ތިނަދޫ ދާއިރާގެ މެމްބަރ އަބްދުﷲ އަހުމަދު އާއި ފުވައްމުލަކު ދެކުނު ދާއިރާގެ އަލީ ޝާހު އަދި ހަނިމާދޫ ދާއިރާގެ ހުސެއިން ޝާހުދީ މަގާމުން ދުރުކުރުމަށް ފަހުގައެވެ.
އެފްއޭއެމްގެ އަސާސީ ގަވާއިދު ބުނާ ގޮތުން ހިންގާ ކޮމިޓީގެ މެމްބަރަކު މަގާމުން ވަކިވެއްޖެ ނަމަ، އެ މަގާމަކަށް ހިންގާ ކޮމިޓީގެ އިއްތިފާގުން މެމްބަރަކު އައްޔަން ކުރުމުގެ ބާރު ލިބިގެންވެއެވެ.
ނަމަވެސް އެންމެ އަވަހަށް އޮންނަ އާންމު ޖަލްސާއެއްގައި މެމްބަރު ކްލަބްތަކުގެ ތާއީދު އެ ފަރާތަކަށް އޮތްތޯ ބެލުމަށް ވޯޓަކަށް އަހަން ވާނެއެވެ.
އެފްއޭއެމްގެ ހިންގާ ކޮމިޓީގައި މިހާރު ތިބޭނީ ޖުމްލަ ނުވަ މެމްބަރުންނެވެ. އެއީ ރައީސް ބައްސާމް އަދީލް ޖަލީލް އާއި ސީނިއާ ވައިސް ޕްރެޒިޑެންޓް އަހުމަދު ޝާކީބް އާއި ވައިސް ޕްރެޒިޑެންޓް އައިޝަތު ނާޒިމާގެ އިތުރުން މެމްބަރުންގެ ގޮތުގައި ހިމެނޭ މުހައްމަދު އަލީ އާއި މުއާޒް ރަޝީދު އާއި މުހައްމަދު ޝިފާއު އާއި ހުސެއިން ޝާފިއު އާއި މުފާވިޒް ހާޝިމް އަދި މުހައްމަދު ހާނިމްއެވެ.
