ރައްޔިތުންގެ މަޖިލީހުގެ މާމިގިލި ދާއިރާގެ މެމްބަރު އަދި ޖުމްހޫރީ ޕާޓީގެ ލީޑަރު ގާސިމް އިބްރާހީމް އަނެއްކާ ވެސް ފުލުސް އޮފީހަށް ހާޒިރުވުމަށް އަންގައިފި އެވެ.
ގާސިމް ފުލުސް އޮފީހަށް ހާޒިރު ވުމަށް އަންގާފައި ވަނީ ބުދަ ދުވަހުގެ ހަވީރު 16:00 އަށެވެ. އެނގިފައިވާ ގޮތުގައި ގާސިމް ފުލުސް އޮފީހަށް ހާޒިރުވުމަށް އަންގާފައި ވަނީ މިހާރު ބަލަމުންދާ މައްސަލައިގަ އެވެ.
ރައްޔިތުންގެ މަޖިލީހުގެ ރައީސް އަބްދުﷲ މަސީހު މުހައްމަދުގެ މައްޗަށް ހުށަހެޅި އިތުބާރު ނެތްކަމުގެ މައްސަލައާއި ގުޅިގެން މަޖިލީހުގެ މެމްބަރުންނަށް ރިޝްވަތު ދިންކަމުގެ ތުހުމަތުގެ އިތުރުން ދައުލަތުގެ ސަލާމަތީ ބާރުގެ ފަރާތްތަކަށް ނުފޫޒު ފޯރުވާ، ސަރުކާރާ ދެކޮޅު ހަރަކާތްތަކެއް ހިންގަމުންދާ ކަމުގެ ތުހުމަތުތަކެއްކޮށް، މީގެ ކުރިން ގާސިމް ހައްޔަރު ކޮށްފައިވެސް ވެއެވެ. މިމަހުގެ ހަ ވަނަ ދުވަހު ގާސިމް ހައްޔަރުކުރުމަށްފަހު ގާސިމް ދޫކޮށްލާފައިވަނީ އޭގެ ހަ ދުވަސް ފަހުން ގާސިމް ދޫކޮށްލުމަށް ހައިކޯޓުން އަމުރު ކުރުމާ ގުޅިގެންނެވެ.
ބުދަ ދުވަހުގެ ހަވީރު ގާސިމް ފުލުސް އޮފީހަށް ހާޒިރުވުމަށް އަންގާފައިވާއިރު، މިދިޔަ އާދިއްތަ ދުވަހު ފުލުހުން ވަނީ ކޯޓު އަމުރެއްގެ ދަށުން ގާސިމް ދިރިއުޅުއްވާ ގެ މާފަންނު ވިލާ އާއި ގާސިމްގެ ކުންފުނިތައް ހިންގާ ވިލާ ބިލްޑިންގގެ އިތުރުން ވިލާ ހައުސް ވެސް ބަލާ ފާސްކޮށްފައި ވެއެވެ. ނަމަވެސް އެއިން އެއްވެސް ތަނަކުން ފުލުހުންގެ ތަހުގީގަށް ބޭނުންވާ އެއްވެސް އެއްޗެއް ފެނިފައެއް ނުވެއެވެ.
ނަމަވެސް ހަމަ އެދުވަހު ފުލުހުން ވަނީ ކޯޓު އަމުރެއްގެ ދަށުން ގާސިމް ފޯނު ވެސް އަތުލާފަ އެވެ.
ފުލުސް އޮފީހަށް ހާޒިރުވުމަށް ގާސިމަށް އަމްގާފައިވާއިރު، ގާސިމް ހިމެނިވަޑައިގަންނަވާ ގޮތަށް ގުޅިފައިވާ އިދިކޮޅު ސިޔާސީ ޕާޓީތަކުގެ ލީޑަރުން ގެންދަވަނީ ރާއްޖޭގައި ހުންނަ ބޭރުގެ ފަރާތްތަކަށް ރާްޖޭގެ ސިޔާސީ ހާލަތާމެދު ކަންބޮޑުވާކަން ހާމަކޮށް، އެފަރާތްތަކާއެކު މަޝްވަރާތައް ކުރަމުންނެވެ. އެގޮތުން އދ. ގެ ރެސިޑެންޓް ކޯޑިނޭޓަރު ޝޮކޮ ނޮޑާ އާ އަންގާރަ ދުވަހު ބައްދަލު ކުރައްވާފައިވާއިރު، ހޯމަ ދުވަހު އިންޑިޔާގެ ހައިކޮމިޝަނަރު އަކްލޭޝް މިޝަރާ އާވެސް ބައްދަލުކުރައްވާ މަޝްވަރާ ކުރައްވާފައިވެއެވެ.
