ރާއްޖެ އާއި ކޮޗިންއާ ދެމެދު ފަށާފައިވާ ކާގޯ ފެރީގެ މަޢުލޫމާތު ވިޔަފާރިވެރިންނަށް ފޯރުކޮށްދިނުގެ މަސައްކަތް ފަށައިގަތުމަށް ތައްޔާރުވަމުން އަންނަ ކަމަށް ކުޅުދުއްފުށީގައި ހުންނަ ބިޒްނަސް ސެންޓަރ ކޯޕަރޭޝަނުން ބުނެފި އެވެ.
ބިޒްނަސް ސެންޓަރ ކޯޕަރޭޝަނުން ކުޅުދުއްފުށީ ބިޒްނަސް ސެންޓަރގެ މެނޭޖަރ އަރީޝާ މޫސާ ވިދާޅުވީ ހދ. އަތޮޅު ކައުންސިލްއާއި، މޯލްޑިވްސް ސްޓޭޓް ޝިޕިންގ ކޮމްޕެނީ ޕްރައިވެޓް ލިމިޓެޑްއާއި ގުޅިގެން އޮންލައިން ސެޝަންއެއް ބޭއްވުމަށް ތައްޔާރުވަމުންދާ ކަމަށެވެ.
އެގޮތުން ކޮންމެ ރަށެއްގެ ރަށު ކައުންސިލަކުން ވަނީ ވިޔަފާރިކުރާ ފަރާތްތަކުގެ ތެރެއިން މިފެރީން މުދާ ގެނައުމުގެ ޝައުޤުވެރިކަން ހުރި ފަރާތްތަކަށް އޮންލައިން ސެޝަންގައި ބައިވެރިވުމުގެ ފުރުސަތު ހުޅުވާލާފައެވެ. ނަން ނޯޓު ކުރުމުގެ ފުރުސަތު މިހާރު ހުޅުވާލާފައިވާ ކަމަށާއި ނަންނޯޓުކުރާ ފަރާތްތަކުން ވިޔަފާރީގެ ނަމާއި، އަަދި އެނޫންވެސް ކައުންސިލުތަކުން ރަޖިސްޓްރީވާއިރު ހިމަނަންޖެހޭ މައުލޫމާތުވަނީ އާންމުކޮށްފައެވެ.
އަރީޝާ ވިދާޅުވީ މިއީ ހަމައެކަނި ހދ އަތޮޅުގެ ރަށްތަަކަށް ހާއްސަކޮށްގެން ބާއްވާ ސެޝަންއެއް ނޫން ކަމަށާއި ހއ. އަދި ށ. އަތޮޅުގެ ވިޔަފާރިވެރިންނަށްވެސް ބައިވެރިވުމުގެ ފުރުޞަތު އެބައޮތް ކަމަށެވެ. ލިބޭ ތަރުހީބަށް ބެލުމަށްފަހު ބައިވެރިވުމުގެ ފުރުޞަތު އިތުރު ކޮށްލަން ގަސްތުކޮށްފައިވާ ކަމަށްވެސް އޭނާ ވިދާޅުވިއެވެ.
އަރީޝާ ފާހަގަކުރި ގޮތުގައި ކޮޗިން ކާގޯ ފެރީގެ ސަބަބުން ކުދި އަދި މެދު ފަންތީގެ ވިޔަފާރިވެރިންނަށް ހެޔޮ އަގުގައި މުދާ ލިބޭނެ ގޮތް މަގުފަހިވެގެން ދިއުމަކީ އެފަރާތްތަކުގެ ވިޔަފާރި އިތުރަށް ފުޅާވެ ސަރަހައްދުގެ އިޤްތިސާދުވެސް ކުރިއަރައިގެންދާ ކަމެއް ކަމަށެވެ.
"ރާއްޖެއެމްވީ"އާއި ވާހަކަދައްކަވަމުން ކުޅުދުއްފުށީ ކައުންސިލްގެ ރައީސް ޢަބްދުއްލަޠީފް ޙަސަން ވިދާޅުވީ އެކައުންސިލުންވެސް މިހާރު ރަޖިސްޓްރޭޝަންއަށް ހުޅުވާލާފައިވާ ކަމަށާއި އަންނަ ބުދަ ދުވަހުގެ 10:00 ހަމައަށް ހުޅުވާލާފައިވާ ކަމަށެވެ.
އިންޑިއާގެ ކޮޗިންއިން މުދާ ހިފައިގެން ހދ.ކުޅުދުއްފުއްޓަށް އައި ފުރަތަމަ ކާގޯ ފެރީ އެރަށަށް ބަނދަރުކޮށްފައިވަނީ މިދިޔަ ހޮނިހިރު ދުވަހުގެ ހެނދުނުއެވެ.
ފުރަތަމަ ދަތުރުގައި ކުޅުދުއްފުއްޓަށް 500 ޓަނުގެ ސިމެންތިއާއި، އަދި އެހެނިހެން ބާވަތްތަކުގެ މުދާ ހިމެނޭ 2 ކޮންޓެއިނަރު ގެނެސްފައިވެއެވެ. އަދި މާލެއަށްވެސް މިފެރީން މުދާ ގެނެސްފައިވެއެވެ.
އިންޑިއާގެ ކޮޗިންއިން ކާގޯއާ އެކީ އައި، މި ފުރަތަމަ ފެރީއަކީ އެއްފަހަރާ 3000 ޓަނުގެ މުދާ އުފުލޭ ބޯޓެކެވެ. އިންޑިއާ-ކޮޗިން ކާގޯ ފެރީގެ ރާއްޖޭގެ އެޖެންޓަކީ މޯލްޑިވްސް ސްޓޭޓް ޝިޕިންގއެވެ. މި ފެށި ކާގޯ ފެރީގެ ސަބަބުން އަގުހެޔޮކޮށް މުދާ ގެނައުމަށް ދިވެހި ވިޔަފާރިވެރިންނަށް މަގުފަހިވެގެންދާނެކަމަށް ސަރުކާރުން ބުނެއެވެ.
