ފަތުރުވެރިކަމުގެ ދާއިރާގައި ހަރަކާތްތެރިވާ ފަރާތްތަކުގެ މައުލޫމާތު އެއް ތަނަކުން ލިބޭނެ އެޕްލިކޭޝަނެއް ތައާރަފުކޮށްފި
މޮބައިލް އެޕްލިކޭޝަންގައި ލިސްޓް ކުރުމުގެ ފުރުސަތު ހިލޭ ވަނީ ހުޅުވާލާފައި
ފީލް އިންވަސްޓްމަންޓްގެ ފަރާތުން މީޑިއާތަކަށް އިންޓަވިއު ދެއްވަނީ
ރާއްޖޭގެ ފަތުރުވެރިކަމުގެ ދާއިރާގައި ހަރަކާތްތެރިވާ ފަރާތްތަކުގެ މައުލޫމާތު އެއް ތަނަކުން ލިބޭނެ މޮބައިލް އެޕްލިކޭޝަނެއް "ފީލް މޯލްޑިވްސް" ގެ ނަމުގައި ފީލް އިންވަސްޓްމަންޓްގެ ފަރާތުން ތައާރަފުކޮށްފިއެވެ.
ފީލް އިންވަސްޓްމަންޓްގެ އެސިސްޓަންޓް ޖެނެރަލް މެނޭޖަރ އިބްރާހިމް ހުލައިލް ވިދާޅުވީ މިމޮބައިލް އެޕްލިކޭޝަން މެދުވެރިކޮށް ރާއްޖޭގެ ގެސްޓް ހައުސްތަކާއި ރިސޯޓްތަކާއި ސަފާރީތަކުގެ މައުލޫމާތު ލިބިގެންދާނެ ކަމަށާއި ފަތުރުވެރިކަމުގެ ދާއިރާގައި ހަރަކާތްތެރިވާ ފަރާތްތައް މޮބައިލް އެޕްލިކޭޝަންގައި ލިސްޓް ކުރުމުގެ ފުރުސަތު ހިލޭ ހުޅުވާލާފައިވާ ކަމަށެވެ.
މޮބައިލް އެޕްލިކޭޝަން މެދުވެރިކޮށް ރާއްޖޭގެ ހުރިހާ ގެސްޓް ހައުސްތަކާއި ރިސޯޓްތަކުގެ ބުކިންގް ހެއްދުމުގެ ފުރުސަތު އަގޯޑާ މެދުވެރިކޮށް ވަނީ ހުޅުވާލާފައެވެ. އަދި މި އެޕްގައި ހިމެނީ ޝޮޕް ލައިވް މެދުވެރިކޮށް ސޮވެނިއަރ ފިހާރަތަކުގައި ހުންނަ ސާމާނުތައް ގަތުމުގެ ފުރުސަތު ވަރަށް އަވަހަށް ހުޅުވިގެންދާނެ ކަމަށް ވެސް އެ ކުންފުނިން ބުންޏެވެ.
މީގެ އިތުރުން އެ އައިޓަމެއް ފަތުރުވެރިޔާ ގަތުމަށް ފަހު ވެލާނާ އިންޓަރނޭޝަނަލް އެއަރޕޯޓް އަށް ފުރަން ދިޔުމުން އެ ގަތް އައިޓަމް ހަވާލުކުރެވިގެންދާނެ ކަމަށް ފީލް އިންވެސްޓްމަންޓުން ބުންޏެވެ. އަދި ރާއްޖޭ އިން ބޭރުގައި ދިރިއުޅޭ ފަރާތްތަކުން ޝޮޕް ލައިވް މެދުވެރިކޮށް އައިޓަމެއް ގަތުމުން ޕޯސްޓް މެދުވެރިކޮށް ފޯރުކޮށްދޭނެ ކަމަށް ވެސް އެ ކުންފުނިން ބުންޏެވެ.
މި މޮބައިލް އެޕް ބޭނުންކޮށްގެން ދިވެހިރާއްޖޭގެ ކޮންމެ ފަތުރުވެރިކަމުގެ މަންޒިލަކަށް ޑިސްކައުންޓް އަގަކާ އެކު ދަތުރު ކުރެވޭނެ މަގު ފަހިވެގެންދާނެއެވެ.
މި މޮބައިލް އެޕް ގޫގުލް ޕްލޭ ސްޓޯރުންނާއި އެޕަލްގެ ޕްލޭ ސްޓޯރުން ޑައުންލޯޑް ކުރެވޭނެއެވެ.
